Deborawan Baracmi taquipäcun
5
Chay muyun Abinoampa chulin Baracmi Deborawan caynu taquipäcula:
2 “Tayta Diosta alawäśhun,
cay Israelćhu
puydïcunaca pilyananpä listullaña capäcuśhanpi;
pilyananpä quiquillanpi awnipäcuśhanpi.
3 ¡Puydïcuna uyalipämay!
¡Mandacücuna uyalipämay!
Tayta Diostamá yaꞌa quiquí alawäśhä.
Israel caśhtacunap Tayta Diosnintamá taquicunawan yaꞌa alawäśhä.
4 “Tayta Diosllay,
Seir ulꞌupïta yalamuptiquim,
Edom malcapi licuptiquim,
allpacunäpis śhaśhälun,
janay pachäpis cuyülun,
pucutaycäpis yacunta caćhalpämun.
5 Chayurá Tayta Diospa puntanćhuꞌa ulꞌucunäpis chucchülunmi.
Israelcunap Tayta Diosninpa puntanćhuꞌa Sinai ulꞌupis chucchülunmá.a
6 Anatpa chulin Samgarb timpucunaćhu,
Jael timpucunaćhu manañam caminunninta pulipäculañachu;
sasa yanꞌalnincunallapñam pulipäcula.
7 Israelćhu lluy malcacunaca caćhaycüśham cayalcäla.
Chaynu pasaypi cayaptinmi yaꞌa Debora śhalcamulá,
israelcunäpa mamannümari śhalcamulá.
8 “Mana lisishan taytachacunacta aclacäläliptinmi
gïrraca malcap jananćhüña cayäla.
Tawa ćhunca walanga (40,000) Israel caśhtacunäćhu
manam jucllay atajachicullanpis nïtac jucllay ispädallanpis calachu.
9 “Yaꞌa llapan śhunꞌüwanmi cushicú israelcunäpa
puydïnincunapä,
pilyananpä quiquillanpïta awnïcunäpä.
¡Tayta Diostari llapayqui alawapäcuy!
10 “Yulä ćhina aśhnuman sillacücuna,
alli-camacunamanlä täcücuna,
aśhta ćhaquillawan
pulïcunäpis llallishanchicpi sumäta uyalipäcuy.
11 Tayta Dios llallishanpïta uywacuna upyananćhu
latillucunacta tucalcul-tucalcul alawäśhantari uyalipäcuy;
Israel caśhtacunaca llallishanpïta taquipäcuśhantari uyalipäcuy.
Tayta Diospa nunancunamá
malcap puncunmanña jiꞌalpälälimun.
12 “¡Licaćhacuy Debora,
licaćhacuy!
¡Licaćhaculꞌari taquicunacta taquiy!
¡Abinoampa chulin Barac śhalcuyꞌari;
prïsuyquicunacta puśhacuy!
13 “Israelcunäpïta quïdä puydïnincunam
jiꞌalpapämula,
Tayta Diospa malcanmi
munayniyu nunacunäwan pilyä lipäcula.
14 Amalec lädućhu yaćhä Efrain ayllucunäpis śhapämulam.
Paycunap ipantam Benjamin ayllucunäpis lipäcula.
Maquir caśhtapïpis puydïnincunam śhapämula.
Zabulon ayllucunapïpis mandacünincunam śhapämula.
15 Isacar ayllup puydïnincunapis Deborawanmi lipäcula.
Isacar ayllucunaca Baracwanmi capäcula;
paypa ipantam pampaman jiꞌalpapäcula.
Ruben ayllucunäñatacmi ichá juc-jucman iwinaculcäla.
16 ¿Imapïmá uwishcunap canćhallanćhu quïdaculcälanqui?
¿Imapïmá uwishcunäpa waꞌayninta uyalishtin quïdaculcälanqui?
¡Ruben ayllucunaca juc-jucmanmá iwinaculcäla!
17 “Galaad ayllucunaca Jordan mayup chimpanćhümi quïdaculcäla.
Dan ayllucunaca barcu caśhancunäćhümi quïdaculcäla.
Aser ayllucunäpis lamarcäpa patanćhümi quïdaculcäla,
barcuncuna śhaycapäcunanćhümi tacyacaycälila.
18 Zabulon ayllucunämi ichá wañuytapis mana manchaculcälachu;
Neftali ayllucunämi ichá ulꞌucunäćhu pilyapäcula.
19 “Mandacücunam Taanac läduman śhapämul pilyapäcula;
Canaan lädu mandacücunam Meguido yacup
pampamcunaćhu pilyapäcula;
llallishancunapïtá manamá illayta nï imallactapis apaculcälachu.
20 Sïlüćhu uyllurcunäpis Sisarap cuntranmi pilyala;
janay pachäpïtamari pilyapämula.
21 Cison śhutiyu wayum ćhïnicüninchicta apälun;
Cisonćhu cä punta llüllam lluy chincächin.
Yaꞌañatacmi mana manchalillal puntaman lishä.
22 “Cawalluncuna cap-capyayllam yalälälin;
cawalluncunap ćhaquinćhu cascuncuna śhaclallacyayllam pasaculcan.
23 Tayta Diospa caćhan anjilninmi nin:
‘Merozćhuc yaćhäcuna mana allinpä licaśha capäcuchun.
Chayćhu yaćhäcunaca sumä mana allinpä licaśha capäcuchun.
Tayta Diospa pilyänincuna sumä-camawan pilyayaptin
yanapä mana śhamuśhanpïtari ñacapäcuchun’ nil.
24 “Canaan lädu Heberpa walmin Jael lluy
walmicunapïpis allinpä licaycuśha cachun;
chay yaćhapäcuśhanćhu lluy walmicunapïpis allinpä licaycuśhari cachun.
25 Sisara yacucta mañacuptin Jaelñatac lichicta uycülun;
sumä puydïpa upyananmanlämi nätaśhyäśhad lichicta uycülun.
26 Ichü maquintam ishtacäman ćhulaycula;
allï maquintam chuclla luläcunäpa mäsunman apaycula.
Chaywanmi Sisaracta sintïdućhu uycüla.
Chaymi uma sintïdunpa yaycülul pasäla.
27 Sisarañatacmi Jaelpa ćhaqui-ćhaquinćhu cululacucuyan;
jinacuyäśhanćhümi pampäman anćhanpälun,
chay anćhanpaśhanćhümi wañüla.
28 “Sisarap mamanmi llaquisha
bintananpa licapayämul nin:
‘¿Imapïmi wawïpa carritancuna mana ćhäcälimunñachu?
¿Imapïmi gïrranacunan carritan anchap dimurayämun?’
nil.
29 “Chaymi waquin yaćhaysapa walmicunäpis,
jinaman quiquinpis nin:
30 ‘Gïrraćhu lluy llallipäcuśhantaćh aypunacuyalcan.
Pilyäcunäćha jucnincä-cama ütac
ishcaynincä-cama wamlacunactapis aypunacuyalcan.
Sumä puydïnin llallï Sisaractá allinnin müdanacunactaćh
uyalcan,
imaymana culurwan burdäśha tïlacunactaćh jucta
ütac ishcayta cuncanman walcacunanpä uyalcan’ nil.
31 “¡Tayta Diosllay,
chaynuꞌari ćhïnicüniquicuna
camacaycüśha capäcuchun!
Cuyäniquicunañatac ichá intica sumä acchishannu chipipicyapäcuchun” nil.
Chaypïtañamari israelcunäćhu tawa ćhunca (40) wata jawca cawsay cala.