Sisaractam Deborawan Barac llallin
4
Caminaycü Aod wañüluptinmi Israel caśhtacunaca Tayta Diospa ñawquin caśhallan mana allinta lulapäcula.
2 Chaymi Hazorćhu yaćhä Canaan läducunäpa mandänin Jabinpa maquinman Tayta Dios ćhulaycüla.
Cachacuncunap puydïnin Sisaram Haroset-goim malcaćhu yaćhala.
3 Chay mandacü Jabinpa isun paćhac (900) jïrrupi carritancunam cacula,
jinaman ishcay ćhunca (20) watam israelcunäta juyupa ñacachila.
Chaymi israelcunaca Tayta Diosta ruygaculcäla.
4 Chay timpu Lapidotpa walmin Deboram israelcunäpa caminaycünin Tayta Diospa willacünin cala.
5 Chay Debora,
palmïra lantap siquinćhu täcunan captinmi chayta “Deborap palmïran” nipäcula.
Chay talicula Efrain ulꞌućhu Rama malcapwan Bet-el malcap linancäpa ćhawpiscanćhümi.
Chaymanmi israelcunaca Debora allichaycälinanpä lipäcü cala.
6 Juc muyunmi Baractaa ayächimun Debora.
Paymi cala Neftali ayllućhu cä Cedes malcayu Abinoampa chulin.
Chayćhümi Debora nin:
“Israelcunap Tayta Diosninmi nishunqui Tabor ulꞌuman lil Neftali,
Zabulon ayllucunapi ćhunca walanga (10,000) wayapacunacta juntumunayquipä.
7 Tayta Diosñatacshi Cison mayup patanman puśhamunꞌa Jabinpa cachacuncunap puydïnin Sisaracta jïrru carritantin-camacta,
cachacuntin-camacta.
Chayćhümi paycunacta maquiquiman ćhulaycamunꞌa” nil.
8 Niptinmi Barac:
“Am liwshimaptiquiꞌa lishämi.
Mana liwshimaptiquiꞌa manam lishächu” nin.
9 Niptinmi Debora:
“Liytá liwshishayquim.
Ñatac caynu lulayta munaśhayquipïmi amchu altuman mana juluycuśha canqui,
sinuꞌa walmip maquinmanmi Sisaracta Tayta Dios ćhulaycunꞌa” nin.
Chaynu nilculmi Deborawan Barac Cedes malcaman lipäcula.
10 Chayćhümi Barac juntüchin Neftali,
Zabulon ayllupi ćhunca walanga (10,000) wayapacunacta.
Paywanmi Deborapis lila.
11 Canan má,
Moisespa suydrun Hobabpa milaynin Hebermi lluy Ceneo läducunäpïta laquiculcul Zaanaim pampaćhu carpanta śhalcächisha capäcula,
encina nishan lantap chimpanćhu.
Chay cala Cedes malcap sircanćhümi.
12 Ñatac Sisaracta:
“Tabor ulꞌuman Abinoampa chulin Baracmi ishpicayalcämun” nil willaycäliptinmi,
13 pay,
isun paćhac (900) jïrrupi carritancunacta,
lluy cachacuncunacta juntuycachil Haroset-goimpi jiꞌalpapämula Cison mayup patanman.
14 Chayćhümi Baracta Debora nin:
“Jucllaña liy.
Canan muyunmá Sisaracta maquiquiman Tayta Dios ćhulaycamunꞌa.
Quiquin Tayta Diosmari puntayquita liyan” nil.
Niptinmi Tabor ulꞌupi ćhunca walanga cachacuncunawan (10,000) Barac jiꞌalpapämula.
15 Chayćhu pilyayta allacaycäliptinmi Tayta Dios Sisaracta manchächiptin imanaytapis mana atipapäcul carritanwan cäcunäpis,
cachacuncunapis chiꞌilälin.
Quiquin Sisarapis carritanpi jiꞌalpulculmi ćhaquillawanña ayicullan.
16 Baracñatacmi Sisarap carritancunactawan cachacuncunacta aticun aśhta Haroset-goimcama.
Chaymi chay muyun Sisarap lluy nunancuna ispädawan wañüchisha capäcula;
licachillapäpis manamari puchuyculachu.
17 Ñatac Hazorpa mandacünin Jabinwan allinpam apanaculcäla Ceneo lädu Heber ayllucunaca.
Chaymi Heberpa walmin Jaelpa carpanman ćhaquillap Sisara ayicula.
18 Chayćhu Jael ćhasquïnin yalalcamulmi nin:
“Taytay,
ama manchacuychu.
Pasaycamuy” nil.
Chaynu carpanman Sisara yaycüluptinmi Jaelñatac catawan pacaycula.
19 Chayćhümi Sisara nin:
“Yacupïmi wañuyällá.
Ama chaynu callaychu mañacullaśhayqui” nil.
Niptinmi winalä lichinta quićhaycul Jael uycula.
Jinalculmi caśhan chusiwan Sisaracta pampaycula.
20 Sisarañatacmi nin:
“Carpap puncullanćhuꞌari caycuy.
Mayanpis śhamul tapucuśhuptiquiꞌa,
‘manam mayanpis canchu’ ninayquipä” nil.
21 Sisarañatac pishipäśha cayal wañuśha-wañuśha puñülun.
Jinaptinmi Jael carpacta chalachina ishtacactawan mäsucta apticulcul yaćhayllap mana musyachillal aśhuycula.
Chayćhümi sintïdućhu tacäla pampäman lantacacanancama.
Chaynüpam Sisara wañüla.
22 Ñatac Sisaracta ashishtin Barac ćhäluptinmi Jael yalulcul nin:
“Pasaycamuyꞌari.
Ashishayqui nunacta canan licaycachishayqui” nil.
Niptin carpanman Barac yaycuyculmi talïlun sintïdunćhu ishtacan śhatïsha cućhpalayäta.