Canaan lädućhu mana aluśhan malcacunaca
3
Chaypi Tayta Dios cay malcacunäta caćhaycula Israel caśhtap ipa milaynincunacta pruybananpämi.
Cay ipa milaycunaca Canaan lädućhu pilyapäcuśhanta manamá licapäculachu.
2 Chay malcacunacta caćhaycüla ipa wiñay pilyayta mana yaćhäcunaca,
pilyayta yaćhapäcunanpämari.
3 Chaynu caćhaycuśhancunaca capäcula:
Filisteo läducunap picha puydïnincuna,
chaynütac lluy Canaan,
Sidon,
jinaman Hev läducunäpis.
Cay Hev läducunaca Baal-hermon ulꞌüpi aśhta Hamatcama Libanoćhümi yaćhapäcula.a
4 Caycunacta Tayta Dios caćhaycula israelcunäta pruybananpämá;
awquilluncunaman Moiseswan camachishan yaćhachicuycunäta cäsuculcäśhantapis ütac mana cäsuculcaśhantapis licananpämari.
5 Chaymari Israel caśhtacunaca yaćhayta allaycapäcula Canaan,
Het,
Amhor,
Ferez,
Hev,
Jebus läducunäwan cusca.
6 Chayćhümi Israel caśhtacunäpa wamla walaśh chulincuna chay malcacunap chulincunawan cuscälälil taytachancunacta alawayta allacaycälila.
Otonielmi Israel caśhtacunäta libraycun
7 Chaynümari Israel caśhtacunäpa lulaynincuna Tayta Diospa ñawquin mana allin cala.
Tayta Diosta unꞌayculmari Baalpa,
Aserap taytachancunacta alawapäcula.
8 Chaymi Tayta Dios sumä piñacuyninćhu Mesopotamiap mandacünin Cusan-risataimpa maquinman ćhulaycüla.
Cusan-risataimtam pusä wata sirbipaculcäla.
9 Chayćhüñatacmi Israel caśhtacunaca Tayta Diosta mañaculcäla.
Chaymi salbaycunanpä Cenazpa chulin Otonielta śhalcachila.
Paymi Calebpa śhullca wawꞌi-caśhan Cenazpa chulin cala.b
10 Tayta Dios Ispiritunta cay Otonielman uycuptinmi Israel caśhtacunäta caminaycul pilyä yalula.
Chayćhu paypa maquinman Tayta Dios Siriap mandacünin Cusan-risataimta ćhulaycuptinmi llallïla.
11 Chaypïmi tawa ćhunca (40) wata jawca cawsay caycula.
Chaypïtañamari Cenazpa chulin Otoniel wañucula.
Aodmi israelcunäta Moabpa maquinpïta libraycun
12 Chaypïta Israel caśhtacunaca caśhan mana allin lulaycunallactam Tayta Diospa ñawquin lulapäcula.
Jinaptinmi Moabpa mandacünin Eglonta Tayta Dios callpanchaycula israelcunäpä cuntran śhalcunanpä.
13 Chaymi Amon,
Amalec läducunäwan,
mandacü Eglon jucllachanacaycälil Israel caśhtacunäta camacäcuyalcan.
Jinalmi Palmïra nishan malcacta duyñuchacaycälila.
14 Cay Moab läducunäpa mandacünin Eglontam israelcunaca ćhunca pusäniyu (18) wata sirbipaculcäla.
15 Chayćhümi Israel caśhtacunaca Tayta Diosta ruygaculcäla.
Jinaptinmi Benjamin ayllupi Gerap chulin,
ichuśh nipäcuśhan Aodta śhalcachila.
Juc muyunćhümi Israel caśhtacunaca mandacü Eglonman uycupäcunancäta Aodwan apachipäcula.
16 Ñatac Aod ishcaynin lädun sumä afiläśha,
ćhawpi mitructanu ispädactam lulacüña.
Chaytam allï lädu wiyawninman,
müdananpa lulïninman ćhulacüla.
17 Jinalculmi chay apachishancäta Moab lädup mandacünin sumä wira Eglonman uycula.
18 Chay apachishancäta Aod uyculmi liwshï nunacunäwan yalapämula.
19 Ñatac Gilgalpa sircascanćhu taytachacuna caśhancäman ćhälälilmi Eglonman cutimula.
Ćhayculmi:
“Taytay,
pacallap willaycunacmi cayan” nin.
Niptinmi mandacüca yanapänincunacta:
“Upälla waśhaman yalupäcuy” nin.
20 Chaymi waywapacunan cuartunćhu mandacü Eglon japallan täcuyaptinña nin:
“Cay willacuy apamuśhäca Tayta Diospïmi” nil.
Cayta uyalïlulmi mandananpä täcuśhancäpi juclla śhalcülun.
21 Ñatac Aod ichuśh maquinwan allï lädunpi ispädanta julalcamulmi pataćhu mandacücäta tucsïlun.
22 Jinaptinmi ispädanpä chalacunpis chincanancama yaycüla,
wira cayninćhu chincanancamamari.
Chayćhu ispädacta mana juluptinmi mandacü Eglonpa ismayninpis tallicacämun.
23 Aodñatacmi cuartup puncunta lulipi lluy siguralcul bintananpa yalucula.
24 Chay Aod pasacuptinñam mandacücäpa yanapänincuna cutïlälimun.
Chaymi cuartup puncun wićhalayäta licälälil “ishpacuyanpisćhä” ninaculcäla.
25 Chaynu mana yalacälimuptinmi jucmanyäläliśhaña alcapäcuśhanpi quićhacunwan quićhaycälinanpä mandacünin pampäćhu wañüśha jitalayäta talïlälin.
26 Mandacücäpa yanapänincuna alcapäcuśhancamam Aod pasaculaña.
Chaymi Gilgal malcaćhu taytachacuna caśhanta pasälulꞌa Seirat läduman ayicula.
27 Ñatac Israel caśhancunäman ćhälulmi Efrainpa ulꞌunpi curnitillacta tucälun.
Chaymi Israel caśhtacunaca chay ulꞌüman juntunacälälimula.
Aodñatacmi paycunawan cusca jiꞌalpapäcunanpä puntanman ćhulacuycul nin:
28 “Atipämay,
Tayta Diosninchicmi ćhïnicüninchic Moab läducunäta maquinchicman ćhulaycämun” nil.
Niptinmi aticulcal Moab läduman chimpana Jordan mayup bädunta duyñuchacaycälila.
Jinalmi chayninpa pictapis manaña pasachipäculachu.
29 Chay timpum ćhunca walanganu (10,000) sumänin allin-cama Moab lädu pilyäcunacta camacaycälälila.
Manam jucllanpis cawsayniyu quïdalachu.
30 Chaynüpam Israel caśhtacunaca Moab läducunäta llallïlälila.
Chaypïtam paycunaćhu pusä ćhunca (80) wata jawca cawsay caycula.
Samgarmi israelcunäta Filisteo läducunäpa maquinpi libraycun
31 Chaypïta Anatpa chulin Samgar caminaycüpa ćhulaśha calmi garruchawanc süta paćhac (600) Filisteo läducunacta wañüchila.
Chaynüpamari Israel caśhtacunäta libraycula.