Israel caśhtacunämi Canaan läducunäta llallin
21
Canaan lädućhu cä Arad malcap mandäninmi Neguevćhu yaćhala.
Cay mandacücämi Israela caśhtacunaca Atarim läduman lï caminup śhayämüta yaćhälun.
Chaymi paycunawan chalanaculcul waquincunactá prïsu puśhacula.
2 Chayćhülämi Israel caśhtacunaca Tayta Diosman limalicucuyalcan:
“Cay ćhïnimänïta maquïman ćhulaycamuptiquiꞌa malcanta mana caśhanmanmi muyülächishä” nil.
3 Chay Israelpa mañacuyninta Tayta Dios uyaliyculmi Canaan läducunäta maquinman ćhulaycüla.
Jinaptinmi nunacunätapis,
quiquin malcactapis mana caśhanman muyüchila.
Chaymi chay sityucta Hormab nipäcula.
Brunsipi culibraycäta licalmi salbaculcan
4 Chay Hor ulꞌupïtam Israel caśhtacunaca yaluculcan Puca Lamar läduman,
Edomc nasyunta muyupäcunanpä.
Ñatac malcaca lishanmaspam jucmanyälälin.
5 Chaymi limayta allacaycälin Tayta Diospawan Moisespa cuntran:
“¿Imapämi Egiptopïta julapamälanqui cay chunyäcäćhu wañuculcänäpä?
Manamari micuypis nï yacupis canchu.
Cay Maná nishan micuycällapïtá amïlälïñamá” nil.
6 Niptinmi paycunacta caćhülälinanpä juyu culibraycunacta Tayta Dios caćhämula.
Jinaptinmi achca Israel caśhtacuna wañuculcäla.d
7 Chaymi malcaca Moisesman aśhuycälil nicuyalcan:
“Ampa cuntrayqui,
jinaman Tayta Diospa cuntran limapäcuśhäwan juchactam lulälälí.
Tayta Diosta mañacullay cay culibraycunäta yaꞌacunapi chincachinanpä” nil.
8 Niptinmi Tayta Dios:
“Chay culibraycätanülla lulaycul caśhpiman bandiraycüluy.
Chayta licäcämi mayan caćhüśha cayalpis cawsanꞌa” nin.
9 Chaymi Moises brunsipïta culibrayta lulaycul caśhpiman bandiraycüla.e
Jinaptinmi culibrap caćhüśhaca chay brunsipi cä culibraycäta lical cawsapäcula.
Israel caśhtacunämi Moab läduman lipäcun
10 Chaypïta Israel caśhtacunaca pasapäculmi Obot lädućhu jamapäcula.
11 Chay Obotpïta pasapäculñatacmi Ije-abarim chunyäcäćhu jamapäcula.
Chay cayan Moab lädu inti ishpimunan lädućhümi.
12 Chaypïta pasapäculñatacmi Zered pampaćhu jamapäcula.
13 Chaypïta pasapäculñatacmi Arnon mayup chimpan chunyäcäćhu jamapapäcula;
chay mayu Amhor läducamam liyan.
Chay mayumari Amhor läducunacta Moab läducunapi laquiyan.
14 Chaymi gïrrapä cä Tayta Diospa librunćhu caynu niyan:
“Sufaf lädućhu cä Vaheb läductam pasapäculá;
wayucunäpa,
Arnon mayup patantam lipäculá.
15 Ar läduman lï mayu patanpam pulipäculá;
Moabpa culindanpam pasapäculá” nil.
16 Chaypïta Beer nishan püsucamam pasaculcäla.
Chayćhümi Moisesta Tayta Dios nin:
“Jinantin malcäta juntuycuy yacucta unäpä” nil.
17 Israel caśhtacunäñatacmi taquipäcula cay nil:
“¡Püsuman yacu yalamuchun!
¡Püsupïta taquishun!
18 Puydïcunaca garutinwan ućhcupäcuśhancämá;
mandacücunaca bäranwan ućhcuśhancämá” nin.
Chay chunyäcäpïta Matana lädumanmi pasapäcula.
19 Chay Matanapïñatacmi Nahaliel läduman pasapäcula;
chaypïtá Bamot lädumanmi pasapäcula.
20 Bamotpïtañatacmi Moabćhu cä pampancunaman pasapäcul Pisga ulꞌup chupquinman ćhäpäcula;
chaypïtamari jinantin chunyä pampäta licanchic.
Israel caśhtacunämi Amhor läducunäta llallin
21 Chaypïtam Israel caśhtacunaca willacücunacta caćhala Amhor lädup mandacünin Sehonman cay nil:
22 “Ama chaynu caychu,
cay malcayquip ćhawpinpa pasaycälichillämay.
Manamá talpuyniquicunap üba lantayquicunap pasapäcuśhächu,
nïtac püsuyquicunapïta yacuyquitapis upyapäcuśhächu.
Jatun caminunllanpam pasaculcälläśhä yalunäcama” nin.
23 Mandacü Sehonñatacmi Israel caśhtacunaca pasananta mana munalachu.
Chaymi Israelcunäpa cuntran cachacuncunawan chunyäcäman yalapämula.
Jinalmi Jahazaman ćhaycul israelcunäwan chalanacälälin.
24 Israel caśhtacunäñatacmi ispädanwan camacaycälälil allpancunacta pudiracaycälin,
Arnon mayupïta aśhta Jaboc mayucama ütac Amon ayllucunäpa culindancama.
Cay culindanmi mana pasayta atipäna allin-cama cacula.
25 Chaynüpam Israel caśhtacunäpa,
Amhor lädup Hesbon malcanpïta lluy malcancunacta chalacaycälila yaćhapäcunanpä.
26 Amhor lädup mandacünin Sehon yaćhaśhanmi Hesbon malca cala.
Paymi Moabpa mandacüninwan puntacta gïrraćhu cayal llallichicülul Arnon mayucama allpanta waycachicüla.
27 Chaymi cay taquicunapis cayan:
“¡Mandacü Sehon yaćhaśhan Hesbon malcaman śhapämuy!
¡Sehonpa malcan śhalcachisha cachun!
28 Hesbonpïta ninam yalämun;
Sehonpa malcanpïta ninam sumbaypa sumbayan.
Moabćhu cä Ar malcactam camacaycülun;
Arnonpa ulꞌuncunaćhu yaćhäcunätam lupälun.
29 ¡Ay,
Moab lädu!
¡Taytacha Quemospa nunancuna jüdicacüśhañam cayalcanqui!
Chay taytachayquim nunayquicunacta chiꞌichin;
chuliquicunactapis Amhor lädup mandacü Sehonpa maquinmanmi jitaycülun.
30 Paycunam pasaypi mana caśhanman muyüchisha capäcula,
Hesbonpïta aśhta Dibon malcäcama;
Nofa läducamamari pampaman muyüchisha cala;
Medebacamamari pulumächisha cala” nil.
Israel caśhtacunämi Basan läducunäta llallin
31 Chaynüpam Israel caśhtacunaca Amhor lädup allpanman yaycapäcula.
32 Jinaman Jazer malcäta licapämunanpämi waquin nunacunacta Moises caćhala.
Chaypïtam Israel caśhtacunaca chay malcacta muyülïninćhu cä tacsha malcacunätapis pudiracuycul Amhor läducunäta alapacälälila.
33 Chaypïtañam Basan läduman cutipämula.
Ñatac Basanpa mandacünin Ogmi lluy cachacuncunawan yalälälimula Edrei lädućhu supayapachinaculcänanpä.
34 Chayćhümi Moisesta Tayta Dios nin:
“Ama manchacuychu.
Og mandacücäta lluy cachacuntinta,
jinantin malcantinta,
lluy allpantinta maquiquimanmi ćhulaycamú.
Hesbonćhu yaćhä Amhor lädup mandacünin Sehonwan lulaśhayquinümi paywan lulanqui” nil.
35 Chaynüpam Israel caśhtacunaca jucllactapis cawsayniyüta mana caćhaycul wañülächila Ogta,
chulincunacta,
lluy cachacuncunactapis;
jinaman lluy allpancunapïpis pudiracaycälilamari.