2 Chaypïta upyapäcunanpä yacu mana captinmi muyülïninman juntunacuycul Moisespa Aaronpa cuntran malcaca limacuyalcan.

3 Jinalmi Moisesta nicuyalcan:

“¡Allinćha canman cala malcamasïcunanu Tayta Diospa puntanćhu supayapäläliptí!

4 ¿¡Imapätá Tayta Diospa malcanta cay chunyäcäman puśhapämälanqui!?

¿¡Cayćhu uywantincuna wañupäcunätachu munalanqui imamá!?

5 ¿Imapämi Egiptopïta julapämälanqui pasaypi cala chunyäcäman puśhapämänayquipä?

Cayćhuꞌa manam ima mujullapis,

ïgus,

übas,

granadilla lantacunallapis,

nï upyanapä yacullapis talicunchu” nil.

6 Moiseswan Aaronñatacmi malcapi caluman yalulcul,

tincuna carpap puncunpïta calućhu pampäman cäranpis ćhänancama unꞌulacaycälila.

Chayćhümi Tayta Diospa sumä caynin licalïmula.

7 Tayta Diosñatacmi Moisesta nin:

8 “Garutiquita chalaculcul wawꞌi-caśhayqui Aaronwan jinantin malcäta juntuy.

Jinalcul lluypa ñawquin yacu yalamunanpä wancacta niycuy.

Chayćha wancäpi yacu yalamunꞌa lluy nunacunaca,

uywacunaca upyapäcunanpä” nil.

9 Niptinmi Tayta Diospa puntanćhu cä garuticta nishanmannu Moises apticulcula.

10 Jinaman Moiseswan Aaron jinantin malcäta wancap puntanman juntuycälilmi “¡Cullu linlicuna,

uyalipäcuy!

¿¡Cay wancäpïchun yacucta julamuśhun upyachipäcunacpä imatá!?”

nicuyalcan.

11 Nilculmi Moises maquinta pallalcul ishcay cuti garutinwan wancäta wipyäla.

Jinaptinmi wancäpi alli-alli yacu yalämuptin malcawan uywacunaca upyapäcula.

12 Ñatac Tayta Diosmi Moisestawan Aaronta nin:

“Amcuna mana chalapacalcämäśhayquipi,

Israel caśhtacunäpa ñawquin chuyapä mana licapämäśhayquipïtamari,

cay malcaman chaynütac limalicuśhá allpaman mana yaycapäcunquichu” nil.

13 Chay yacuctam “quijacuy”^a nïwan śhutichäla.

Chayćhümi Israel caśhtacunaca Tayta Diosta quijaculcäla;

chayćhütacmi chuya caśhanta paycunaman camalachilapis.

14 Chay Cadesćhu Moises cayalcalmi willacücunacta caćhala Edom nasyunpa mandäninta caynu nimunanpä:

“Israel caśhtacunaca aylluyquim capäcú.

Am tuquictam yaćhayanqui ima ñacaycunacta pasapäcuśhätapis.

15 Awquillücuna Egipto nasyunman liculcal achca watacunam chayćhu yaćhapämula.

Chayćhümi awquillücunactapis yaꞌacunactapis usuchipämäla.

16 Chaymi Tayta Diosta mañaculcaptí uyaliycälimäla.

Jinalmi anjilninta caćhamula Egiptop maquinpïta julapämänanpä.

Chaymi cay Cades malcayquip lindancunaćhüña canan cayalcá.

17 Ama chaynu caychu,

cay malcayquip ćhawpinpa pasaycälichillämay.

Manamá talpuyniquicunap üba lantayquicunap pasapäcuśhächu,

nïtac püsuyquicunapïtapis yacuyquita upyapäcuśhächu.

Jatun caminunllanpam pasaculcälläśhä malcayquipi yalunäcama” nil.

18 Niptinmi Edom nasyunpa mandacünin nin:

“Malcämanꞌa manam jaluycälimunquimanpischu.

Pasaćhaculcaptiquiꞌa cachacücunawanmi camacaycälälishayqui” nil.

19 Niptinmi Israel caśhta lïcunaca nipäcun:

“Jatun caminullayquipam pasaycälilläśhä.

Sïchuśh mayannïpis ütac uywäcunapis yacuyquita upyäläliptinꞌa pägaycälishayquim.

Pasaycälichipämänallayquipämi mañaculcac” nil.

20 Niptinmi mandacüca nin:

“Caypa manam pasapäcunquimanchu” nil.

Chaypïtam Edom mandacüca alli-cama armädu cachacuncunawan yalapäcula.

21 Chaynu Israel caśhtacunäta atajacaycäliptinmi juc lädu caminup lipäcunanpäña ashipäcula.^b

22 Chaymi lluy Israel caśhtacunaca Cadespïta yalapäcul Hor nishan ulꞌüman ćhäpäcula.

23 Chay Edompa sircanćhu cä Hor ulꞌućhu cayalcaptinmi Tayta Dios Moisestawan Aaronta nin:

24 “Aaron wañucunꞌañamari.

Quijacuy nishan yacućhu amcuna cullu linli capäcuśhayquipam Israel caśhtacunäman limalicuśhá allpaman manaña yaycunꞌachu.

25 Aarontawan chulin Eleazartá Hor ulꞌup chupquinman puśhay.

26 Chayćhümi Aaronpa sasirdüti cä müdananta lluśhtiycul chulin Eleazarta müdachinqui.

Chayćhümari Aaron wañunꞌa” nil.

27 Chay Tayta Dios nishanmannümi Moises lulaycula.

Chaymi jinantin malcap ñawquin Hor ulꞌüman ishpipäcula.

28 Chayćhümi Aaronpa sasirdüti cä müdananta Moises lluśhtilcul chulin Eleazarta müdächila.^c

Aaronmi chay ulꞌüćhu wañucula.^d

Moiseswan Eleazarñatacmi ulꞌup chupquinpïta cutilpapämula.

29 Aaron wañucuśhanta malcaca yaćhälälilmi quimsa ćhunca (30) muyun waꞌapäcula.