Anlapä licaśha cäcunaca chuyanchaculcänanpämi nin
19
Chaypïtam Moisestawan Aaronta Tayta Dios nin:
2 “Yaꞌa Tayta Diosmi caytapis camachí:
Israel caśhtacunaca allinnin pucanilä malta wäcacta,
manalä yügu ćhulaśhacta apapämuchun.
3 Chaytam sasirdüti Eleazarman uycälinqui.
Payñatacmi yaćhapäcuśhayquipi waśhaman jululcul puntanćhu wañuchinꞌa.
4 Chaypïtam sasirdüti Eleazar dïdunta yawarcäman challpaycul tincuna carpap puntan läduman chächuycunꞌa.
5 Chaynütacmi ñawpäninćhu wäcactapis cañaycunꞌa.
Cañanꞌa utanta,
aychanta,
yawarninta,
acantapis.
6 Chaypïta chay wäca lupaśhancämanmi sasirdütica jitaycunꞌa cedro ilucta,
hisopo jaćhap pallayninta,
puca lataśhtapis.
7 Jinalculmi sasirdütica almacunꞌam;
müdanancunactapis täśhacunꞌa.
Chaypïta jamapäcuśhanman sasirdütica cutiycunmanmi;
ñatac tutalpunancamam anlapä licaśha canꞌa.
8 Chaynütacmi wäcacta caña nunapis almacunꞌa,
müdanancunactapis täśhacunꞌa.
Tutalpunancamatacmi anlapä licaśha canꞌa.
9 “Allin chuya cä wayapam wäca cañaśha cäcäpa ućhpanta pallalcul yaćhapäcuśhayquip waśhaćhu unanchaśhanman ćhulaycunꞌa.
Chay ućhpam Israel caśhtacunaca chuyanchaculcänan yacupä canꞌa.
Chayꞌa juchacta pampachanapä uycunamari.a
10 Mayanpis chay ućhpacta palläca müdananta täśhanꞌam.
Tutalpunancamañatacmi anlapä licaśha canꞌa.
Cay camachicuyca Israel caśhtacunäpäwan amcunaćhu yaćhä juc caśhtacunäpämi wiña-wiñaypä canꞌa.
11 “Wañüśha nunacta yataycücá anćhish muyunmari anlapä licaśha canꞌa.
12 Chaymi quimsayänan muyuncäwan anćhish muyuncäćhu chuyanchacuna yacuwan chuyanchacul chuya caycunꞌa.
Ñatac quimsayänan muyuncäćhu nïtac anćhish muyuncäćhüpis mana chuyanchaculꞌa manamá chuyachu canꞌa.
13 Mayanpis nuna wañüśhacta yataycul mana chuyanchacücá Tayta Diospa chuya carpantam anlaman muyuchin.
Chaynu nunaca Israel caśhtapïta chincachishamari canꞌa.
Payꞌa chuyanchana yacuwan mana chächuchicuśhanpamá anlapä licaśha canꞌa.
14 “Mayanpis chucllanćhu wañüluptinꞌa cay camachishämannümi lulanqui chay chucllaćhu cäcunäwan;
chaynütac chay chucllaman lluy yaycücunaca anćhish muyun anlapä licaśham canꞌa.
15 Chaynütacmi cutuśh tasunniläca mana tuqui quillpaśha cäcäpis anlapä licaśha canꞌa.
16 “Chaynütacmi ćhaclaćhu cä ispädawan wañüśhacta,
ütac quiquillanpi wañüśhacta,
ütac nunacunap tulluncunacta,
ütac sipultüracta yataycücá anćhish muyun anlapä licaśha canꞌa.
17 “Chaynu anlacü nunacunäta chuyanchanapä tasunnilämanmi wäca cañaśhanpa ućhpanta ćhulaycunqui;
jinaman mayupi yacucta jillpuycunqui.
18 Jinaman chuya cä nunam hisopo jaćhap pallayninta chay yacuman challpaycunꞌa.
Jinalculmi chächuycunꞌa tindaman,
lluy cäninman,
chayćhu cä nunacunäman,
tullucta yataycücunäman,
wañüchisha nunacunäman,
wañüśhacunäman,
sipultüracunämanpis.
19 Chay anlaman muyüśha nunacta chuya nunämi chächuycunꞌa quimsa muyuncäćhu,
jinaman anćhish muyuncäćhüpis.
Chaynu anćhish muyun chuyanchacuśhancäćhümi müdananta täśhanꞌa,
jinaman almacunꞌapis.
Tutapañatacmi chuyapä licaśha canꞌa.
20 Ñatac anlacü nunaca mana chuyanchacuyninwan Tayta Diospa carpanta jalutacuśhanpïtamari malcapïta wicapäśha canꞌa.
Chaynu anlapä licaśha cayal chuyanchacü yacucta mana chächuśhá jina anlallam canꞌa.
21 Cay camachicuyca lluy milayniquicunapämi wiña-wiñaypä canꞌa.
Chay chuyanchacü yacuwan chächücäpis müdananta täśhanꞌam.
Chay chuyanchacü yacucta yataycücäpis tutalpunancamam anlapä licaśha canꞌa.
22 Imapis anlapä licaśha nuna yataycuśhancá anlaman muyuśham canꞌa.
Chaynütacmi chay nunacta yataycücäpis tutalpunancama anlapä licaśha canꞌa” nil.