Moab lädup mandacünin Balacmi ayachin Balaamta
22
Chaypïta Israel caśhtacunaca pasapäculmi Moab lädu ulꞌucunäćhu jamapapäcula;
cay cayan Jordan mayup inti ishpimunan lädućhu,
Jerico malcap chimpanćhümari.
2 Ñatac Ziporpa chulin Balacmi yaćhäla Israel caśhtacunaca Amhor läducunäwan imacta lulapäcuśhantapis.
3 Chaynütacmi Moab nunacunaca chucchucuyalcan Israel caśhtacunaca achca-achca capäcuśhanta licälälil.
4 Chaymi Moab nunacunaca Madianpa yaśhancunacta nicuyalcan:
“Micuypi wañüśha wäca,
pastucta calaypa caläcänüćha,
caychica nunacunaca lluy muyülïninchicćhu imanchictapis calaypa calälunꞌa” nil.
Chay timpućhu Ziporpa chulin Balacmi Moab läducta mandäca cala.
5 Paymi Petor lädućhu cä Beorpa chulin Balaamtaa ayachimula;
Balaammi Eufrates mayup sircanćhu Amav lädućhu cä Petor malcaćhu yaćhala.
Mandacü Balacmi nunancunacta caćhala Balaamman cay nil:
“Egiptopi ayimu malcam jinantin malcacunäman lancälälimun;
jinalmi cananꞌa puntäćhüña cacuyalcan.
6 Apuraylla śhalcamul cay malcacta mana allin cananpä niycullay;
yaꞌapïtapis mas munayniyümi cacullan.
Ichapis yanapayniquiwan llallilcul malcäpïta alapacülläman.
Tuquictam yaćhaycú allin cananpä niycuśhayquica allin caśhanta,
mana allin cananpä niycuśhayquipis mana allin caśhanta” nin.
7 Chaymi Moab lädup,
Madian malcap yaśhancuna Balaam musyananpä pägunta apaculcul lipäcula.
Chay Balaamman ćhayculmari Balac nishanta willaycälila.
8 Chaymi Balaam nin:
“Cayćhu canan tuta jamaycäliy.
Tayta Dios nimäśhanmannüćha yaꞌa niycälishayqui” nil.
Chaymi Moabpa puydïnincuna chayćhu Balaamwan quïdaculcäla.
9 Chay tutam Tayta Dios Balaamman licalilcul nin:
“¿Mayancunam cay jamapacuśhüniqui nunacunaca?”
nil.
10 Niptinmi Balaam nin:
“Pay Moab mandacüca,
Ziporpa chulin Balacpa caćhamuśhancunämi.
Balacmi caynu nichimuña:
11 ‘Egiptopi ayimü malcam jinantin malcacunäman lancälälimun;
jinalmi cananꞌa puntäćhüña cacuyalcan.
Apuraylla śhalcamul cay malcacta mana allin cananpä niycullay.
Ichapis yanapayniquiwan llallilcul malcäpïta alapacülläman’ ” nil.
12 Niptinmi Balaamta Tayta Dios nin:
“Paycunawan ama liychu;
amatac chay malcacta mana allin cananpä niychu.
Chay malcacta quiquïmi allin cananpä nilá” nil.
13 Chay wälam Balaam śhalcuculcul Balac caćhamuśhan puydïcunäta nin:
“Malcayquiman cutipäcuy.
Tayta Diosmari amcunawan linäta mana munamanchu” nil.
14 Niptinmi Moab lädu puydïcunaca Balac caśhanman cuticulcal nipäcun:
“Yaꞌacunawan Balaam manam śhamuyta munanchu” nil.
15 Ñatac Balac yapam caćhala puntacunäpïta mas achca alli-cama puydïnincunacta.
16 Paycunamari Balaamman lilcälil nipäcun:
“Ziporpa chulin Balac caynütam nishunqui:
Ama chaynu callaychu,
jucllañari śhamuy.
17 Yaꞌami sumä altuman juluycuśhayqui;
ima mañamäśhayquitapis lulaycuśhämi.
Canan-pachalla paćhcamuyña cay malcacta mana allin cananpä niycunayquipä” nil.
18 Niptinmi Balaam chay yaśhacunäta nin:
“Masqui Balac jinantin palasyunćhu cä illayninta,
ürunta uycamaptinpis yaꞌa manam imallactapis lulaycümanchu.
Aśhwanpam Tayta Diospa nimäśhallanta lulaycuná.
19 Chaynu captinpis canan tuta cayćhu jamaculcanquimanmi,
Tayta Dios cay tuta imacta nimäśhantapis caśhan yaćhaycunäpä” nil.
20 Chay tutam Balaamman Tayta Dios licalilcul nin:
“Cay nunacunaca anman śhayalcämuptinꞌa paycunawanꞌari liy.
Ñatac yaꞌa nishallätam lulaycunqui” nil.
Balaamtam aśhnun anyapan
21 Chay wälam Balaam śhalcuculcul ćhina aśhnunman sillaculcul Moab puydïcunäwan liculcan.
22 Balaam ćhina aśhnun sillacuśha liyaptinmi ishcay uywaynincunapis liwshipäcula.
Chaynu licuptinmi Tayta Dios sumä piñacüla.
Chaymi Tayta Diospa anjilnin caminu lishancäćhu mana pasachilachu.
23 Chay caminućhu Tayta Diospa anjilnin ispädan apticüśha cayäta licälulmi ćhina aśhnuca caminüpïta juc läduman licula.
Ñatac Balaam caminüman cutiycachimuyninwanmi aśhnüta maꞌacuyan.
24 Chaypïtam Tayta Diospa anjilnin quićhqui caminunninćhu,
wicpi caypi lumiwan cunćhäśha üba lantap ćhawpinćhu śhaycucuycun.
25 Chay ćhina aśhnuca anjilcäta licälulmi jucnin pilaman arimacuycul Balaampa ćhaquinta ñiticuyan.
Chaymi Balaam yapañatac maꞌacuyan.
26 Tayta Diospa anjilninñatacmi ichá puntalcul mana may lädumanpis ichalcunapä cä mas quićhquinninman śhaycucuycula.
27 Chayćhu Tayta Diospa anjilninta ćhina aśhnuca licälulmi jitalacuycula.
Jinaptinmi Balaam piñacülul caśhpiwan ćhina aśhnüta camacäcuyan.
28 Chayćhümi Tayta Dios ćhina aśhnüta limälïchiptin Balaamta nin:
“¿Imanälactan quimsa cutiña maꞌayämänayquipä?”
nil.
29 Niptinmi Balaam:
“Yaꞌapïchun burlacuñayqui.
¡Maquïćhu ispäda captinꞌa cananpachaćh wañüchicman!”
nin.
30 Niptinmi ćhina aśhnuca:
“¿Manachun muyun-muyun sillacuśhayqui aśhnuyqui cayá imamá?
¿Imaytá caynu amwan yaꞌa lulalá?”
nin.
Niptinmi Balaam:
“Aw,
chaynümi” nin.
31 Chayćhümi Tayta Dios Balaampa ñawinta quićhaycula.
Jinaptinmi Tayta Diospa anjilnin ispädan apticüśha puntanćhu śhäcuyäta licälun.
Chaymi Balaam pampämam cäranpis ćhänancama unꞌulacuycula.
32 Tayta Diospa anjilninñatacmi nin:
“¿Imapïmi ćhina aśhnuyquita quimsa cuti maꞌalunqui?
Moabman lishayquica mana allin captinmi yaꞌa atajacuyculac.
33 Ćhina aśhnuca licämalmi quimsa cuti aśhuyta ćhapala.
Chaynu mana captinꞌa am wañüśhañaćh cayanquiman,
masqui pay cawsayaptinpis” nil.
34 Niptinmi Balaam nin:
“Mana allintam lulälú.
Caminüćhu atajamäśhayquita manam yaćhalächu.
Linäpä mana allin captinꞌa cuticuśhäćha” nil.
35 Niptinmi Tayta Diospa anjilnin nin:
“Cay nunacunäwan linquimanmi.
Ñatac ima ninayquipäpis yaꞌa nishallätam limanqui” nil.
Chaynüpam Balaam lila Balacpa puydïnincunawan.
36 Chay Balaampa śhamuśhanta mandacü Balac yaćhälulmi Moab lädup Arnonpa culindanman ćhasquïnin yalamula.
37 Chayćhümi Balac nin:
“¿Manachun ayachimulac imamá?
¿Imapïmi mana paćhcamulanquichu?
¿Manachun yaꞌa altuman juluycucman imamá?”
nil.
38 Niptinmi Balaam nin:
“Cayꞌari,
cayćhüña cayá.
Ñatac quiquilläpïta imactapis manam limaśhächu;
Tayta Dios shimïman ćhulamuśhallantamari limaśhä” nil.
39 Chaypïtam Balaamwan Balac liculcan Quiriat-huzot malcaman.
40 Chayćhümi wäcacunacta uwishcunacta Balac wañulcachil apachila Balaamman,
paywan cä puydïnincunamanpis.
41 Chay walantintam Balac puśhala Balaamta Bamot-baal läduman.
Chaypïtam Israel caśhtacunap jamapäcuśhanpa partillanta licapäcula.