Nazareonu Tayta Diosta sirbinanpïtam nin
6
Chaypïtam Moisesta Tayta Dios nin:
2 “Israel caśhtacunäta caynu nimuy:
‘Juc wayapa ütac walmipis Tayta Diosta nazareonu sirbinanpä japächaculcul limalicücá,
3 manam bïnucta,
sidracta upyanmanchu.
Manatacmi upyanmanchu übapïta cä binagricta,
nï imapi puꞌuśha cä binagricta;
nïtac übactapis,
päsastapis.a
4 Chay nazareno limalicuynin caśhancama übapi imallactapis manam micunanchu,
mujullantapis ni alanllantapis.
5 “ ‘Nazareo limalicuynin caśhancama manam ächantapis lutucunꞌachu.
Tayta Diosta sirbinanpä japächacuśhancama chuya caśhanpamari ächanta wiñachicunꞌa.
6 Chaynu Tayta Diosman limalicuśhan caśhancama manam nuna wañüśhamanpis aśhuycunmanchu.
7 Chaynütac taytan,
maman,
panin ütac wawꞌi-caśhan wañuptinpis manam aśhuycunanchu,
anlaman mana muyunanpä.
Aśhwanpa Tayta Diosman limalicuśhanmannümi chuyalla caycuśhanta umanćhu apaycunan.
8 Tayta Diosman limalicuśhanca caśhancama chuyallamari caycunan.
9 “ ‘Ñatac unꞌaypi lädunćhu mayanpis wañüluptinꞌa chuyanchacuśhan ächanmi anlaman muyülunꞌa.
Chaymi anćhish muyunpïta chuyanchacunan muyuncäćhu ächanta lluyta lutuchicunꞌa.
10 Pusäyänan muyuncäćhüñatacmi tincuna carpap puncunman ishcay ulpayta ütac ishcay mallwa ulpayta sasirdütiman apanꞌa.
11 Sasirdütiñatacmi jucninta chuyanchacunanpä uycunꞌa,
juccätañatac cañaycunꞌa.
Chaynüpam wañüśhacta yataycuśhanwan anlaman muyuśhanpi chuyanchaycuśha cananpä sasirdütica lulaycunꞌa.
Jinaptinmi chay muyunlla ächan chuyaman muyunꞌa.
12 Chaypïta Tayta Diosman limalicuynin muśhüpïtam allaycunꞌa.
Chay ächan anlaman muyuśhanpïmari chay punta japächacuśhanca mana caśhanmanña licalïlun.
Chuyanchacunanpä watayu uwishtam apanan.
13 “ ‘Cay japächacuśhan nazareo limalicuynin camacäluptinmi camachicuymannu lulaycunꞌa:
Tincuna carpap yaycunanmanmi linꞌa.
14 Chayćhümi watayu allinnin ulu uwishta Tayta Diospä cañaycunꞌa;
jinaman watayu allinnin ćhina uwishtam chuyanchacunanpäpis uycunꞌa.
Jinaman allinnin ulu uwishtatacmi allin cawsaśhanpïpis uycunꞌa.
15 Chaynütacmi mana libadürayu canaśhta junta tantacta,
allinnin arinacta asaytiwan chapüśhacta,
libadürannä panquïqui asaytiwan llusïshactapis jićhaywan uycunꞌa.
Jinaman ćhacla micuyta,
yacu uycunactapis uycunꞌam.
16 “ ‘Chaymi chuyanchacunanpä sasirdütica Tayta Diosman uycunꞌa,
chuyanchaycunanpäpis cañaycunꞌa.
17 Jinamanmi allin cawsaśhanpi Tayta Diosman ulu uwishcäta uycunꞌa.
Chaywan cuscactatacmi canaśhta junta libadürannä tantacta,
ćhacla micuy uycunactawan yacu uycunactapis sasirdütica uycunꞌa.
18 Chaypïta tincuna carpap puncunćhümi nazareo limalicu nunaca ächanta siplay-siplayta lutucunꞌa.
Jinalculmi chay chuyanchaśhan ächanta allin cawsaśhanpi uycuśhancäpa lulïninchu nina waläcäman jitaycunꞌa.
19 “ ‘Chaynu ächanta lutucüluptinmi sasirdütica chay libadürannä tanta canaśhtapi jucnin tantacta,
libadürannä panquïquicta,
ulu uwishpa caćhpan ancäśhactapis ćhulaycunꞌa japächacu nunap maquinman.
20 Chaypïtam lluy caycunacta sasirdütica altuman pallalcul Tayta Diosman uycunꞌa.
Caypis uywap pïchun altuman pallalcul uycuśhancänümi,
caćhpan uycuśhancänümi sasirdütillapä caycunꞌa;
caycuna chuyamari.
Cayta luläluptinꞌa japächacü nunaca bïnucta upyanmanmi.
21 “ ‘Lluy cay camachicuymari Nazareonu sirbinanpä japächacul limalicu nunacunäpä cayan.
Caycunactatacmi chay limalicuyninćhu Tayta Diosman uycälinꞌa.
Jinaman capuśhanpatacmi uycälinꞌapis.
Cay Nazareonu limalicuypa cä camachicuymannümi limalicuśhanta lulaycälinꞌa’ ”b nil.
Allin caycunanpämi sasirdütica niycun
22 Chaypïtam Moisesta Tayta Dios nin:
23 “Aarontawan lluy chulincunacta niycamuy:
‘Israel caśhtacunäta allin capäcunanpä niyculꞌa caynümi ninqui:
24 “ ‘Tayta Diosmi allin canayquipä licaycul ñawillanćhu uywaycuśhunqui.
25 Tayta Diosmi śhunꞌunpänu licaycul llaquipayninta camalaycachishunqui.
26 Tayta Diosmi cuyacuywan licaycul allin jawca cawsayta uycuśhunqui’ nil.
27 “Chaynu yaꞌapïta Israel caśhtacunäta niycuptiquim allin capäcunanpä niycuśhä” nil.