Anla cäcunäta alapacunanpämi nin
5
Chaypïtam Moisesta Tayta Dios nin:
2 “Israel caśhtacunäta nimunqui:
‘Mayanpis liprayu cäcäta,
ütac umri cayninpïta walmi cayninpïta quiquillan ćhalćhapacücäta,
ütac wañüśhacta yataycuyninwan anla cäcätapis chay capäcuśhayquipi alapacälälinanpä.
3 Masqui umripis walmipis cacuchun alapacälälinꞌam.
Chaynüpam yaꞌa yaćhaśhá malcacta anlaman mana muyuchipäcunꞌachu’ ” nil.
4 Chaymi chaynu cawsäcunäta Israel caśhtacunaca Tayta Dios Moisesta nishanmannu yaćhapäcuśhancunapi lluy alapacalälila.
Waycaśhancäta cutiycachinanpämi nin
5 Chaypïtam Moisesta Tayta Dios nin:
6 “Israel caśhtacunäta nimuy:
‘Walmipis umripis nuna-masinwan ima mana allintapis lulälulꞌa Tayta Diostam ipanchälun;
jinalmi juchayüña cayan.
7 Chay mana allin lulayninta waycaśhan nunaman willapaculmi waycaśhancäta cutiycachinꞌa;
jinaman chay mana allin lulaśhanpi picha partiman ćhaninta laquilcul jucnin partictalämi yapaycunꞌapis.
8 Ñatac chay waycäśha nunaca wañucuptin,
jinaman ayllunpis mana captinꞌa chay chuyanchaycunanpä uycuśhanca Tayta Diospäñam canꞌa,
sasirdütiman uycuśhä.
Jinaman chay nunaca juchanpïta sasirdütimanmi juc ulu uwishtapis uycunꞌa juchan pampachaycuśha cananpä. a
9 “ ‘Israel caśhtacunaca uycunanpä lluy ima japächaycuśhancunacta sasirdütiman uycuśhancunaca sasirdütipäñam caycunꞌa.
10 Quiquincunapä japächaycuśhanca quiquinpämi cayan;
ñatac sasirdütiman uycuśhancá sasirdütipämi cayan’ ” nil.
Sïlacuypi imacta lulananpämi nin
11 Chaypïtam Moisesta Tayta Dios nin:
12 “Israel caśhtacunäta nimuy:
‘Má,
juc walmi mana allin caminuman yalulcul wayapanta ipanchälunꞌa.
13 Sïchuśh chay walmi wayapan mana yaćhayaptin juc umriwan puñülunꞌa;
chaynu pacallap anlacuśhanta mana mayanpis yaćhanꞌachu,
nï mayanpis talinꞌachu.
14 Chaynu cayaptin wayapan tantiatyälul sïlacuptin rasunpa captinpis ütac walmin mana anlacuyaptinpis yanꞌalpi sïlaculpis,
15 sasirdütïmanćha walminta puśhanꞌa.
Chayćhüćha walminpïta ishcay quïlu siwä arinacta uycunꞌa.
Sïlacuypi uycunan captinmari chay uycuśhancäman asayticta mana jillpuycunꞌachu nïtac insinsiuctapis ćhulaycunꞌachu.
Cay uycunaca cayan mana allincäta yalpachina uycunam.
16 “ ‘Sasirdütiñatacmi Tayta Dios caśhanman walmicta puśhaycunꞌa.
17 Jinalculmi cutuśhpi bäsuman chuya yacucta ćhulaycunꞌa.
Jinaman carpapi ash allpactapis jitalpuycunꞌa.
18 Jinalculmi Tayta Diospa puntanćhu walmicta śhaycaycachinꞌa ächan pasquïshacta;
jinaman aptiycachinꞌa sïlacuypi yalpana uycunancäta.
Sasirdütiñatacmi mana allin cananpä ćhacćha yacucta aptilanꞌa.
19 Chayćhümi sasirdütica walmicta limalicachinꞌa:
“Wayapayquip maquinćhu cayal juc wayapawan mana puñuptiquiꞌa,
nï anlaman muyuptiquiꞌa mana allin cananpä ćhacćha yacuca manam imanaśhunquipischu.
20 Ñatac wayapayquip maquinćhu cayal wayapayquita ipanchaycul juc wayapawan caśhayquipi anlatacüluptiquiꞌa,
21 (sasirdütim walmicta limalicachinꞌa ñacananpä) Tayta Dios mana allincäta anman ćhächimuchun,
malcayquip licaśha canayquipä,
machüra canayquipä,
patayquipis punquïsha cananpä.
22 Cay mana allin cananpä ćhacćha yacum aychayquiman yaycul patayquita punquilcachimul machüraman muyuchishunqui” nil.
Niptinmi walmica ninꞌa:
“Chaynu cachun,
chaynu cachun” nil.
23 “ ‘Chaypïta cay ñacaycunacta sasirdütica isquirbiyculmi ćhacćha yacuwan chincaycachinꞌa.
24 Jinaman mana allin cananpä ćhacćhä yacucta walmica upyäluptinmi aychanman yaycunꞌa lluy ćhacćhänanpä.
25 “ ‘Chaypïta sasirdütim walmip maquinpïta ćhasquinꞌa sïlacuypi ćhacla micuy uycuśhancäta.
Jinalculmi uycuna pataccäćhu altuman pallalcul Tayta Diosman uycunꞌa.
26 Chay uycuśhancäpïmi sasirdütica aptillacta jululcunꞌa yalpana cananpä.
Chaytam uycuna patacćhu cañaycunꞌa.
“ ‘Chaypïtam sasirdütica ćhacćha yacucta walmicta upyachinꞌa.
27 Sïchuśh anla cayal,
wayapanta ipanchayal ćhacćhä yacucta walmica upyälulꞌa ćhacćhäcämi yaycülunꞌa.
Jinaptinmi patanpis caćhpanpis punquilcuptin machüraman licalïlunꞌa.
Chaynüpam chay walmi mana allinpä licaśha malcanćhu canꞌa.
28 Ñatac mana anlacul aśhwanpa chuyalla cayaptinꞌa imapis manam pasaycunꞌachu nïtac machürapis licalinꞌachu.
29 “ ‘Chayurá caymari sïlacuycunapä camachicuyca:
Wayapanpa munayninćhu walmica cayal wayapanta ipanchalcul anlacüluptinꞌa,
30 ütac yanꞌalpi wayapan sïlacuywan wañütucuyaptinꞌa sasirdütim chay walmicta Tayta Diosman puśhaycunꞌa.
Chayćhümi camachicuy nishantanülla sasirdütica lulaycunꞌa.
31 Wayapacá juchannä licaśham caycunꞌa;
walmïñatacmi ichá juchanpi ñacayta apaycunꞌa’ ” nil.