Fistacunacta lulapäcunanpämi nin
23
Chaypïtam Moisesta Tayta Dios nin:
2 “Israel caśhtacunäta caynu nimuy.
Tayta Diospa fistachaculcänayqui fistaca,
sumä chuya fista muyuncunaca caycunam:
3 “ ‘Süta muyunmi ima lulayniquitapis lulapäcunqui.
Anćhish muyuncäñatacmi jamana muyun canꞌa;a
Tayta Diospä japächäśha muyunmari canꞌa.
Chaymi mayćhu chayćhu cayalpis chuya muyuncäćhu imactapis ama lulapäcunquichu.
Tayta Dios Libraycuśhan Fistacta lulananpämi nin
4 “ ‘Cay fistacunäćhu Tayta Dios altuman juluycuśha cananpämi camachila.
Caycunamari camachishan fistacunaca:
5 “ ‘Tayta Dios Libraycuśhan Fistamari allaycuy quillaćhu,
ćhunca tawayu muyun tardilpuyninćhu allaycunꞌa.b
6 “ ‘Chaynütac wamä quillällaćhu ćhunca pichayu muyuncäćhu Tayta Dios altuman juluycuśha cananpämi Mana Libadürayu Tanta Fistac allaycunꞌa.
Chay anćhish muyunmi mana libadürayu tantacta micapäcunqui.
7 Wamä muyuncäćhu manam ima lulaytapis lulapäcunquichu;
chay muyun juntunacuna chuya muyunmari caycunꞌa.
8 Anćhish muyunmi Tayta Diosman cañaywan uycunayquicunäta uycunqui.
Chay anćhish muyuncäñatacmi juntunacuna chuya muyun canꞌa.
Chaymi uyway nunap ima lulayllantapis ama lulapäcunquichu’ ” nil.
Wamä Cusicha Fistacta lulananpämi nin
9 Chaypïtam Moisesta Tayta Dios nin:
10 “Israel caśhtacunätam caynu ninqui:
‘Amcunacta uycuśhá allpäćhüña cayalcal wamä cusichayquipi sasirdütimanmi malay trïgucta apapäcunqui.
11 Chay jamana muyuncäpa walantintañatacmi sasirdütica malay trïgucta altuman pallalcul Tayta Diosman uycunꞌa allin ćhasquiycuśha caycälinayquipä.
12 Chay malay trïgucta uycuśhan muyuncällatacmi watayu allinnin uwishta Tayta Diosman cañaycunꞌa.
13 Jinaman ćhacla micuy uycunacta tawa quïlu partin allinnin arinacta asaytiwan chapüśhacta uycunꞌa.
Caymi canꞌa Tayta Diospä sumä tuqui mishqui aśhnayä cañaywan uycuśhan.
Chaynütacmi jićhaywan uycunanpäpis juc litru bïnucta uycunꞌa.
14 Tayta Diosman uycunayquicama amam micapäcunquichu tantacta nï ćhawa ütac ancäśha mujuctapis.
Cay camachicuyca lluy milayniquicunapämi mayćhu yaćhapäcuptinpis wiña-wiñaypä canꞌa.
Simäna Fistacta lulananpämi nin
15 “ ‘Chay malay trïgucta altuman pallalcul Tayta Diosman uycuśhayquip atïnin jamana muyuncäpïmi anćhish simänacta fintapäcunqui.
16 Chay walantin jamana muyuncäpïmi fintapäcunqui picha ćhunca (50) muyunta.
Chayćhülämari Tayta Diosman muśhü cusichayquita uycunqui.
17 Chaynütacmi wamä cusichayquipi ishcay tantacta altuman pallalcul Tayta Diosman uycunacta wasiquipi apapäcunqui.
Chay tantam canꞌa tawa quïlu allinnin arina libadürawan chapüśhapi-cama.
18 Chay tantawan cuscactatacmi watayu anćhish allinnin ulu uwishta,
juc malta wäcacta,
ishcay uwishtapis cañaywan uycunactanu uycapäcunqui.
Chay uycuymi Tayta Diosman tuqui mishqui aśhnä ćhaycunꞌa.
Chaycunawan cuscactatacmi ćhacla micuy uycunacta,
jićhaywan uycunactapis uycapäcunqui.
19 “ ‘Chaynütacmi chuyanchaycuśha cananpä uycunacta juc ulu capishta uycunꞌa.
Watayü-cama ishcay uwishtam allin cawsaśhanpi uycunꞌa.
20 Chay ishcay uwishcätawan wamä cusichapi tantactam sasirdütica altuman pallalcul Tayta Diosman uycunꞌa.
Chayurá Tayta Diosman uycapäcunanpä sasirdüticunällamari cayan.
21 “ ‘Cay muyuncällaćhütacmi chuya juntunacuyta lulapäcunqui.
Jinaman amatacmi ima lulayllactapis lulapäcunquichu.
Cay camachicuyca mayćhu yaćhäpäcuptiquipis lluy milayniquicunapämi wiña-wiñaypä canꞌa.d
22 “ ‘Cusicha timpu ćhämuptin amam manya-manyapiꞌa calaypa-calanquichu nïtac pampäman usücunätapis pallayanquichu.
Chaycunactá wacchacunäpä,
mana Israel caśhtacunäpämi caćhaycunqui.
Yaꞌamari Tayta Diosniqui cayá’ ” nil.e
Curnitillawan alawana muyun cananpämi nin
23 Chaypïtam Moisesta Tayta Dios nin:
24 “Israelcunäta caynu nimuy:
‘Anćhish quilläpa allaycuyninmi amcunapä jamana muyun canꞌa;
curnitillacunawanpis alawanayqui chuya muyunmari canꞌa.
25 Chay muyun Tayta Diosmanmi cañaywan uycälinqui.
Jinaman amam ima lulayllactapis lulapäcunquichu’ ” nil.
Jucha pampachanacuy muyun cananpämi nin
26 Chaypïtam Moisesta Tayta Dios nin:
27 “Chay anćhish quilläpa ćhunca muyunninćhümi jucha pampachanacuy muyun canꞌa.
Chayćhümi ayunal Tayta Diosta alawapäcunqui,
cañaywan uycunacunactapis uycunqui.
28 Chay muyun chuyanchaycuna muyun captinmi ima lulaytapis ama lulapäcunquichu.
Chay muyunmi Tayta Dios juchayquicunacta pampachanꞌa.
29 Chay muyun mayanpis mana ayunäcá malcanpi alüśhamari canꞌa.
30 Chay muyun mayanpis ima lulaytapis luläcätá yaꞌa quiquïmá malcanpïta wicapäśhä.
31 “Chayurá amam ima lulaytapis lulapäcunquichu.
Cay camachicuyca mayćhu yaćhäpäcuptiquipis lluy milayniquicunapämi wiñaypä canꞌa.
32 Chay muyun amcunapä jamana muyun caśhanpam ayunapäcunqui.
Cay jamana muyunmi allaycunꞌa isun muyun tardi aśhta walantin tardicama” nil.
Cusichap Camacaynin Fistacta lulananpämi nin
33 Chaypïtam Moisesta Tayta Dios nin:
34 “Israel caśhtacunäta caynu nimuy:
‘Chay anćhish quillap ćhunca pichayu muyunninćhu allayculmi anćhish muyun canꞌa Tayta Diosta alawanapä Cusichap Camacaynin Fistaca.f
35 Allaycuna muyuncäćhümi juntunacuna chuya muyun caycunꞌa.
Amamari ima lulaytapis lulapäcunquichu.
36 Anćhishnintin muyunmi cañaywan uycunacta Tayta Diosman uycälinqui.
Pusäyänan muyuncäćhüñatacmi juntunacul,
alawapäcul cañaywan uycunacta Tayta Diosman uycälinqui.
Cay muyuncunaćhu ima lulaytapis amamari lulapäcunquichu.
37 “ ‘Caycunam Tayta Diospä unanchaśhan fistacunaca cayan,
amcuna juntunacul uycälinayquipä.
Muyunninćhu-cama camachishanmannümi uycälinqui:
cañaywan uycunacta,
ćhacla micuy uycunacta,
uycuyta,
jićhaywan uycunactapis.
38 Caycunacta lulaycälinquim jamana muyunćhu Tayta Diosta imaypis uycuśhayquicunaćhu ütac limalicuśhayquićhu ütac śhunꞌuyquipi yalamuśhanta uycuśhayquićhüpis.
39 “ ‘Ñatac anćhish quillaćhu,g
ćhunca pichayu (15) muyuncäćhu cusichayquicunacta lluy cusichälälil Tayta Diosta alawayniquiwanmi anćhish muyun fistachaculcanqui.
Chay allaycunan muyuncäwan pusä muyuncämi jamana muyun canꞌa.
40 Chay allaycunan muyuncäćhümi lantacunap allinnin lapincunacta apapäcunꞌa:
palmïracunap,
juninnin pallaysapa lantacunap,
mayu patanćhu wiñä sauce lantacunap pallaynincunactapis.
Jinantin anćhish muyunnintinmi Tayta Diospa fistanćhu cushiculcanqui.
41 Watan-watanmi anćhish quilläćhu Tayta Diosta alawayniquiwan anćhish muyun fistachaculcanqui.
Cay camachicuymari milayniquicunapä wiña-wiñaypä canꞌa.
42 Chay anćhish muyunnintinmi nasïdunpi Israel caśhtacunaca chucllacunallaćhu yaćhapäcunꞌa.
43 Chayćha Egiptop maquinpi julamul chucllacunaćhu yaćhachishäta milayniquicuna yaćhapäcunꞌa.
Yaꞌamari Tayta Diosniqui cayá’ ” nil.
44 Caynu Tayta Diospa fistancunacta lulapäcunanpämi Israel caśhtacunäta Moises niycula.