3 Jinamanñatacmi nin:

“Tayta Diosman cañaywan uycunqui walan-walanmi watayü-cama ishcay allin uwishta.

4 Jucnin uwishcätam wälallanpa uycunqui;

juccätañatacmi tardinpa uycunqui.

5 Micuyta uyculñatacmi ishcay quïlu allinnin arinacta,

litru ulïbus asaytiwan chapüśhacta uycunqui.

6 Caytamari Sinai ulꞌüćhu camachishämannu muyun-muyun cañaywan uycapäcunqui Tayta Diosman tuqui mishqui aśhnä ćhaycunanpä.

7 Jićhaywan uycuyćhümi juc uwishpä-cama juc litru caycunꞌa.

Chay bïnuctam Tayta Diosta alawayninwan carpaman jićhaycunꞌa.

8 Tardinpa juc uwishcäta uycuśhayquićhüpis wälanpa uycuśhayquinümi ćhacla micuy uycuytapis jićhaywan uycuytapis uycunqui.

Caycunam Tayta Diosman tuqui mishqui aśhnä ćhaycunꞌa.

9 “Jamana muyunninćhüñatacmi ishcay allinnin watayü-cama uwishta uycunꞌa.

Jinaman tawa quïlu allinnin arinacta asaytiwan chapüśhacta,

jićhaywan uycunantinta uycunꞌa.

10 Muyun-muyun cañaywan uycuśhayquipïtapis jamana muyunninćhu caycunactamari jićhaywan uycunantinta uycunꞌa.^a

11 “Quillap allaycuynin muyunćhümi Tayta Diosman ishcay malta wäcacta,

juc ulu uwishta,

watayü-cama allinnin anćhish ulu uwishtapis cañaycunꞌa.

12 Süta quïlu partin allinnin arinacta asaytiwan chapüśhactam juc malta wäcapä-cama uycunꞌa.

Tawa quïlu arina asaytiwan chapüśhactañatacmi juc ulu uwishcäpä uycunꞌa.

13 Ishcay quïlu arinacta asaytiwan chapüśhactam juc watayü-cama uwishpä uycunꞌa.

Chay cañaywan uycuymari Tayta Diosman tuqui mishqui aśhnä ćhaycunꞌa.

14 Jićhaywan uycuyćhüñatacmi ishcay litru bïnu,

juc malta wäcapä-cama canꞌa.

Juc litru partinñatacmi juc ulu uwishcäpä canꞌa.

Juc litrüñatacmi juc watayu uwishpä-cama caycunꞌa.

Caycunactamá cañaycälinqui quillan-quillan,

watan-watan,

llullu quillaćhu.

15 Chaynu muyun-muyun cañaycälishayquipïpis,

chuyanchaycuśha cananpä juc capishtam Tayta Diosman uycunꞌa jićhaywan uycunantinta.

16 “Ñatac allaycuna quillaćhu,

ćhunca tawayu (14) muyunćhu Tayta Dios Libraycuśhan Fistactam lulanꞌa.^b

17 Chay quillalläćhümi ćhunca pichayu (15) muyuncäćhu anćhish muyun fistachaculcanꞌa.

Anćhish muyunnintinmi mana libadürayu tantacta micapäcunꞌa.^c

18 Chay allaycuynin muyuncäćhüñatacmi chuya fista muyun canꞌa.

Chay muyunćhu manamari mayanpis ima lulaytapis lulapäcunꞌachu.

19 Jinaman ishcay malta wäcacta,

juc ulu uwishta,

watayü-cama anćhish allinnin uwishtam Tayta Diosman cañaywan uycunꞌa.

20 Chaynütacmi ćhacla micuy uycuyćhuꞌa:

süta quïlu partin allinnin arinacta asaytiwan chapüśhacta juc malta wäcapä-cama uycunꞌa.

Tawa quïlu partin allinnin arinactatacmi juc ulu uwishpä-cama uycunꞌa.

21 Ishcay quïlu arinactatacmi watayü-cama anćhish uwishpä-cama uycunꞌa.

22 Chaynütacmi juchacta chuyanchaycunanpä juc capishta uycunꞌa.

23 Wälanpa muyun-muyun cañaywan uycuśhannümi lluy caycunactapis uycunꞌatac.

24 Chaynüpam anćhishnintin muyunca walan-walan cañaywan uycunꞌa.

Chaycunam Tayta Diosman tuqui mishqui aśhnä ćhaycunꞌa.

Muyun-muyun uycuśhancunapïtapis chaycunactamari jićhaywan uycuytapis uycapäcunꞌa.

25 Anćhish muyuncäćhüñatacmi chuya fista muyun caycunꞌa.

Chay muyunca amam mayanpis ima lulayllactapis lulapäcunꞌachu.

26 “Chaynütacmi ‘Cusicha Fistaćhu’^d wamä cusichayquicunacta Tayta Diosman uyculꞌa chuya juntunacuyta lulapäcunqui.

Chay muyunćhu aman mayanpis ima lulayllactapis lulapäcunꞌachu.

27 Chayćhümi ishcay malta wäcacta juc ulu uwishta,

watayü-cama anćhish uwishta Tayta Diosman cañaywan uycunꞌa.

Chaymari Tayta Diosman tuqui mishqui aśhnä ćhaycunꞌa.

28 Süta quïlu partin allinnin arinactam asaytiwan chapüśhacta juc malta wäcapä-cama uycunꞌa.

Tawa quïlu partin arinactatacmi juc ulu uwishpä-cama uycunꞌa.

29 Ishcay quïlu arinactatacmi watayü-cama anćhish uwishpä-cama uycunꞌa.

30 Chaynütacmi juchan chuyanchaycuśha cananpä juc capishta uycunꞌa.

31 Chayurá lluy chaycunacta uycunqui muyun-muyun cañaywan uycuśhayquitawan,

ćhacla micuy uycuśhayquitapis;

chaynütac cañaywan juc cuti uycuśhayquitapis jićhaywan uycuśhayquitapis uycunquitacmi.

Uycuśhayqui uywacunaca allinnin-camamari caycälinꞌa.