Michïrup asaytinta lulananpämi nin
24
Chaypïtam Moisesta Tayta Dios nin:
2 “Carpaćhu michïrucunaca imaypis walayalcänanpä Israel caśhtacunaca apapämuchun allinnin ulïbus asayticta.
3 Chay michïrucunäta Aaronmi ćhulanꞌa Tayta Dios caśhanman walächi latananpä.
Chay latanꞌa tincuna carpaćhu limalicuśhan babulta laquï curtïnap puntan lädućhümi.
Cay camachicuymari milayniquicunapä wiña-wiñaypä canꞌa.
4 Ürunllanllanpi cä jatun michïrümanmi latachicuncunäta ćhulanꞌa imaypis Tayta Diospa puntanćhu acchinanpä.
Tantacta Tayta Diosman uycunanpämi nin
5 “Allinnin arinapi ćhunca ishcayniyu tantacta lulay,
tawa quïlu llasä-camacta.
6 Jinalculmi Tayta Diospa ñawpäninman ürunllanllanpi luläśha mïsap jananman ćhulanqui ishcayćhu tawäśhacta;
chay tawäśhaćhu sütancämi canꞌa.a
7 Chay tawanacüśha cäcäman allinnin insinsiucta ćhulay.
Chay insinsium tantäpa pudirnin Tayta Diosman cañaywan uycuśhannu ćhaycunꞌa.
8 Cay tantacta jamana muyunninćhümi imaypis Tayta Diospa ñawpäninman ćhulaycälinqui,
Israelpa milaynincunaman wiña-wiñaypä limalicuśhan caśhanpa.
9 Cay tantaca Aaronpäwan lluy milaynincunapä cananpämi camachisha canꞌa.b
Cayta Chuya Sityućhümari micapäcunꞌa.
Tayta Diosman cañaywan uycuśhancunapïta lluy caymari mas chuyannin cayan” nil.
Tayta Diosta jalutacücäta mućhuchinanpämi nin
10-11 Chay Israel caśhtacunäćhümi juc nuna cala.
Paypa papäninmi Egipto lädu cala,
mamanñatacmi Israel caśhta,
Danpa ayllun,
Dibrip chulin Selomit cala.
Cay Israel mamayu nunam chay yaćhapäcuśhanćhu juc Israel caśhtawan pilyälul Tayta Diosta jalutacülun.
Chaymi Moisesman puśhalälila.
12 Chayćhümi wićhalachipäcula imanuy cananpäpis Tayta Dios ninancama.
13 Tayta Diosñatacmi Moisesta nin:
14 “Chay jalutacücäta yaćhapäcuśhayquipi waśhaman julapäcuy.
Jalutacuśhanta uyalïcunaca maquinta paypa umanman ćhulaycapäcuptinmi lluy nuna cäcunäñatac tamshälälinꞌa.
15 Chaypïta Israel caśhtacunätam ninqui:
‘Mayanpis Tayta Diosta jalutacücá juchanpïta wañuchisham canꞌa.
16 Masqui mana Israel caśhta ütac Israel caśhta calpis Tayta Diosta jalutacücá wañuywanmi mućhuchisha canꞌa;
lluy nunacunämari tamshälälinꞌa.
17 “ ‘Mayanpis nuna-masinta wañuchïcá wañuchishatacmi canꞌa.c
18 “ ‘Mayanpis uywacta wañuchïcá uywawantacmi śhalcachinꞌa.
19 “ ‘Mayanpis nuna-masinta däñäcá quiquinpis däñaśham canꞌa:
20 Paquïcá quiquinpis paquisham canꞌa,
ñawinpïtá ñawinwan,
quilunpïtá quilunwantac.d
Nuna-masinta imapis dañädüśhannümi quiquinpis dañädüśha canꞌa.
21 “ ‘Uywacta wañuchïcá uywawantacmi śhalcachinꞌa.
Ñatac nuna-masinta wañuchïcá quiquinpis wañuchishamari canꞌa.
22 “ ‘Cay camachicuycällam Israel caśhtacunapäpis ütac juc caśhtacunapäpis canꞌa.e
Yaꞌamari Tayta Diosniqui cayá’ ” nil.
23 Cay camachicuycunätam Israel caśhtacunäman Moises nila.
Chaymi paycuna Tayta Diosta jalutacücäta yaćhaśhanpi julalcamul tamshälälila.
Tayta Dios Moisesman camachishanmannümari Israel caśhtacunaca lulapäcula.