Potifarpa wasinćhümi Jose allincällacta lulaycun
39
Chay nigusyanti Ismael läducunaca Joseta Egipto malcäman ćhaycachilmi mandacü Faraonpa cachacuncunap puydïnin Potifarman lanticülun.
2 Ñatac Tayta Dios Josetaa yanapaptinmi Potifarpa wasinćhu ima lulayninćhüpis sumä alli-allin caycula.
3 Chaynu Tayta Dios yanapäśhanta,
chaynütac ima cänincunaćhüpis allinta yanapaycuśhantapis patrunnin tuquictam yaćhapaycula.
4 Chaynu allin chalapacuna Jose captinmi wasinćhu lluy ima cänincunap licäninpä Potifar ćhulaycula.
5 Chay pachapïmi Tayta Dios Jose-laycu Potifarpa wasinćhu,
ćhaclanćhu lluy ima cänincunactapis allinpä licaycul milaycachila.
6 Chaynu captinmi Potifar lluy-lluyta Josepa maquinmanña ćhulaycul lulaycunapi nï imapis uculañachu,
sinuꞌa micunallanpïtañamari.
Ñatac Joseꞌa tuquish,
allin müsum cacula.
7 Chaymi juc timpupïta patrunnin Potifarpa walmin Joseta munapälul:
“Puñuycuśhun” nin.
8 Ñatac Joseꞌa manam munalachu.
Chaymi:
“Wayapayquim yaꞌaman chalapacamayninwan lluy ima cänintapis maquïman ćhulaycaman.
9 Cay wasićhu lluy ima cänintapis maquïman uycamaptinmi munaylläćhu lulaycunäpä imapis cayan.
Amtañatacmi cay wasićhu walmin caśhayqui-laycu nï maquïman ćhulaycamälachu.
¿Imanuypatá cay jatun juchacta Tayta Diospa ñawpäninćhu lulayäman?”
nin.
10 Ñatac walmica puñupäcunanpä muyun-muyun jicutayaptinpis Joseꞌa manam awnilachu.
11 Juc muyunćhüñatacmi jucnin cuartuman Jose lulanancäta lulä yaycuptin mana pipis chay wasićhu capäculachu.
12 Chaymi Potifarpa walmin Joseta müdananpi chalacuycul:
“Canan puñuśhun” nicuyan.
Chaynu walmica chalacuycuptinmi Joseñatac müdananta lluśhtiycul ayicun.
13 Chaynu licuptinmi walmica müdana caćhaycuśhanta licapayal quïdälun.
14 Jinalmi ayaycaćhacuyan:
“¡Licapäcuy!,
cay lantishan Hebreo lädu uyway nuna abusayta munacayämaptinmi alli-allicta ayaycaćhacuyá.
15 Chaynu ayaycaćhayta allacuycuyaptïmi müdananta caćhaycul ayicun” nil.
16 Nilmi chay müdanacta wayapan ćhämunancama ćhulala.
17 Ćhämuptinmi nishancänülla nicuyan:
“Hebreo caśhta uyway nuna puśhamuśhayquim burlacamämanpä chalacaycaman.
18 Ñatac llapan callpäwan apalcaćhayta allacuycuyaptïmi müdananta caćhaycul ayicun” nil.
19 Chaynu uyway nunan walminta imacta lulay munaśhantapis uyalilculmi Potifar alli-allicta piñacüla.
20 Chaymi Joseta chalalcachil mandacü Faraonpa prïsuncuna wićhaläśhancäman wićhächila.
Chayćhümi Jose wićhaläla.
21 Ñatac Tayta Diosmi Josewanb cayal carsilpa puydï täpäninwanpis allinpä licaycachila.
22 Chaymi carsilpa puydï täpänin lluy wićhaläcunäta Josepa maquinman ćhulaycula.
Jinaptinmi Jose lluy imactapis licaycüca,
lulaycüca cala.
23 Chaynu Jose Tayta Diospa yanapayninwan ima lulaśhanćhüpis allin caycuptinmi carsilpa puydïnin täpäca ima lulaypïpis manaña ancha imapis uculañachu.