Abimelectam Abraham artipan
20
Ñatac Abraham chay caśhancäpïtam Neguev läduman lila.
Cadeswan Shur nishanpa ćhawpin Gerarćhümi yaćhala.
2 Chayćhümi Abraham “panïmi”a nila walmin Saracta.
Chaymi Gerar malcap mandacünin Abimelec cuscananpä Saracta puśhachimula.
3 Ñatac chay tutam suyñuyninćhu Abimelecta Tayta Dios nin:
“Cay wayapayu casädu walmiwan cuscaśhayquipïmi wañunqui” nil.
4 Ñatac Abimelec manalämi paywan puñulalächu.
Chaymi:
“¿Taytay,
mana juchacuyäcätapis wañuchinquichun?
5 Quiquin Abrahammi ‘panïmi’ nimäla;
Sarapis ‘tulïmi’ nimälam.
Chaymi allin śhunꞌüwan cayta lulalá.
Manam mana allin pinsaynïwanchu” nin.
6 Niptinmi Tayta Dios:
“Yaćhämi allin śhunꞌuwan lulaśhayquita.
Chaymi mana juchacunayquipä chay walmiwan nï tupaycachilacpischu.
7 Canan wayapanman cutiycachiy.
Pay,
Tayta Diospa willacüninmi;
chayćha cawsanayquipä mañacunꞌa.
Mana cutiycachilmi ichá lluy aylluntin rasunpa wañunqui” nin.
8 Chay wälalla śhalcuculculmi Abimelec lluy uywaynincunacta ayächimun,
suyñuyninćhu nishancäta willananpä.
Chayta uyalilmi llapanpis sumä manchapacälälin.
9 Chaypïmi Abrahamta ayalcachimul Abimelec nin:
“¿¡Imactam lulälälimanqui!?
¿Caynu jatun juchacta imapïtam jinantin mandacuśhá malcäman apaycamunqui?
¿Imaćhütan amta mana allinta lulälac?
Mana lulanayquitamari lulälunqui.
10 ¿Ima pinsayniquiwantan cayta lulamälanqui?”
nil.
11 Niptinmi Abraham:
“ ‘Cay malcaćhu Tayta Diosta mana manchacuyalcalꞌa walmï-laycu wañülächimanꞌaćh’ nilmi pinsalá.
12 Ñatac taytapiꞌa rasunpa panïmi;
mamapiꞌa juc-jucmi capäcú.
Chaymi paywan casaraculá.
13 Ñatac Tayta Dios intirućhu pulinäpä malcäpïta julämaptinmi walmïta:
‘Ama chaynu caychu may malcaman ćhäśhanchicćhüpis “tulïmi” nimanquim’ nilá” nin.
14 Chaymi Abrahamman walmin Saracta Abimelec cutiycächin,
jinaman uwishcunacta,
wäcacunacta,
uyway nunacunactapis uycülun.
15 Chayćhu Abimelecmi nin:
“Licay,
cay jinantinmi malcá;
munaśhayquićhuꞌari maycäćhüpis yaćhacuy” nil.
16 Nilculmi Saracta nin:
“Cay pasaśhuśhayquipïmi walanga (1,000) illayta tuliquiman uyá.
Caywanmi mayćhüpis unurniqui difindisha caycunꞌa” nil.