De Schriewa von disen Breef wia Judas jewast, de Brooda von Jakobus, dee dän Breef von Jakobus jeschräwen haud, un see wieren de haulf Breeda von Jesus jewast. Judas haud disen Breef aun de auljemeene gleubje Vesaumlungen jeschräwen, om äant fa de Errlierasch to woarnen, dee äant veleiden wullen.

Judas haud sikj sea opp daut oole Tastament veloten, aus hee disen Breef jeschräwen haud. Waut hee fa de Vesaumlungen to sajen haud, wull hee schreftlich bejrinden kjennen. Wanea hee disen Breef jeschräwen haft es nich kloa. Eenje meenen daut es no dän jewast, daut Petrus sien tweeden Breef jeschräwen haud. Judas sien Breef likjent sikj sea met Petrus sien tweeden Breef, wiel en aulebeid woarnen see de Gleubje fa de Errlierasch.

De Errlierasch betoonden daut de Gleubje väl weeten sullen, wiel see nämlich von äa Kjantnis aufhenjich wieren, om jeistlich frie to woaren. See meenden see wieren jeschlajchtlich frie soo to läwen aus see wullen. See jleewden sikj kluak to sennen, un see meenden daut de Jemeinde Leidasch wisten nich wuavon see jerät hauden, wan see sikj aun de biblische Lieren jehoolen hauden. See meenden sikj nämlich mea to weeten äwa jeistliche Dinja, aus dee waut Gott sien Heiljen Jeist en sikj hauden. See interesieeden sikj sea fa Dinja, waut met de Enjel to doonen haud, uk wan see jeistliche Dinja nich vestunden. See hauden de auljemeene Vesaumlunks Jlieda fa irdisch jehoolen, un see meenden see selfst wieren jeistlich, un daut see de woare Kjinja Gottes äwaläajen wieren. Un soo haud Judas disen Breef aun de gleubje Vesaumlungen jeschräwen om äant to woarnen, un om äant jeistlich aun to spornen, daut see sikj gaunz fa de woare Lieren von Gott sien Wuat enstonen sullen.