De Schriewa von disen Breef wia Jakobus jewast, de Brooda von Judas, dee dän Breef von Judas jeschräwen haud, un see wieren de haulf Breeda von Jesus jewast. Jakobus haud disen Breef von Jerusalem, aun de gleubje Juden jeschräwen, dee em Utlaunt vestreit wieren. Dit wia nich dee selwja Jakobus jewast, dee Johanes sien Brooda wia, dee nämlich to Jesus siene twalw Apostel jehieet haud. (Galata 1:19)

Jakobus wia een Leida en de gleubje Vesaumlunk von Jerusalem jewast, wua hee woarschienlich bat sien Doot jedeent haud. Un dis Breef es de ieeschta Breef jewast, dee to daut Niee Tastament jetalt haud. Jakobus haud dis Breef aun de vestreide gleubje Juden jeschräwen, om äant Moot too to spräakjen, un om äant to wiesen woo see von de Woarheit wajch jewaundat wieren.

Aus Christus siene gleubje Vesaumlunk aum Aunfank jejrint haud, dan bestunt dee bloos von Juden, dee sikj opp Jesus aus äaren Messias veloten hauden. No dän daut Jesus nom Himmel jefoaren wia, hauden siene twalw Jinja un ne kjliene Grupp von gleubje Juden sikj en Jerusalem biem Tempel vesaumelt, om daut Pinjstfast to fieren, un dan wia de Heilje Jeist äwa äant jekomen, om jeistlich en äant to wonen. Un soo wia Jesus siene jeistliche Vesaumlunk oppe Ieed entstonen.

Doa wieren väle Juden jewast, dee vom Utlaunt no Jerusalem jekomen wieren, om daut Pinjstfast to fieren. See wieren noch nich toom Gloowen aun Jesus jekomen, un aus see dan oba jehieet un jeseenen hauden, waut de Heilje Jeist met de Gleubje jedonen haud, aus hee en äant nenn jetrocken wia, dan wieren doa bie 3000 utlendsche Juden jewast, dee dan uk toom Gloowen jekomen wieren. See hauden Petrus siene Lieren aunjenomen, un dan wieren see trigj nom Utlaunt no Hus jereist, un doa wort äant lota fa äa Gloowen vefolcht. (Aposteljeschichte 2) Un soo see wie daut de goode Norecht sikj bosich enne Welt vespreet haud, uk wan de Apostel noch emma bloos en Jerusalem jewont hauden.

De Judenfierasch, dee Jesus omjebrocht hauden, hauden sikj emma fa sea jerajcht jehoolen, un see kunnen daut von äare met Juden nich aunnämen, daut see sikj opp Jesus aus äaren Messias veloten wudden. See hauden Jesus fa een Gotteslastra jenomen, wiel hee sikj met Gott jlikj jetrocken haud, un wäa sikj opp am veloten wudd, wort dan uk aus een Gotteslastra aunerkjant. Jesus siene Nofolja hauden emma dolla toojenomen, un soo hauden de Judenfierasch sikj jedreift jefeelt. Un doawäajen hauden see de Gleubje vesocht to venichten, wiel see äare Macht nich velieren wullen, waut see äwa daut judische Volkj hauden.

Woarschienlich haft Jakobus disen Breef no dän jeschräwen, daut Stefanus von de Judenfierasch en Jerusalem omjebrocht wort. (Seet Aposteljeschichte 7) En Aposteljeschichte Kapitel 8 läsen wie daut aun däm selwjen Dach aus see Stefanus doot jemoakt hauden, dan hauden see uk aunjefongen aul de aundre Gleubjen to vefoljen. Un soo wia daut wäajen dise Vefoljunk daut väle gleubje Juden nom Utlaunt utjesiedelt wieren.

Dise vestreide Juden wieren de Lieren von Christus oba nich tru jebläwen, un soo haud Jakobus äant dis Breef jeschräwen, om äant em Gloowen to stoakjen, un om äant to woarnen, daut see sikj mau wieda aun de Woarheit hoolen sullen, wuaropp see sikj veloten hauden, aus see toom Gloowen jekomen wieren.