5
Jo, un soo kjenn wie Jesus met onse Priestasch vejlikjen, wiel een jiedra Huagapriesta dee von mank siene Menschen rutjestemt un enjesäajent woat, kjemt fa siene Menschen ver Gott, un siene jesazliche Veauntwuatunk es daut hee siene Menschen äare Jeschenkja un Opfasch emma ver Gott brinjen mott, soo daut see Gott aunbäden kjennen, un soo daut see jesazlich met Gott kjennen veseent woaren, wan see sikj vesindjen. 2 Jo, un wiel de Huagapriesta een Mensch es, dan kaun hee uk goot met sien oschuldjet un vebiestadet Volkj metfeelen, wiel hee nämlich met de selwje Schwakheiten belaust es, aus irjent eena von dee, fa dän hee ver Gott kjemt. 3 Un wiel de Huagapriesta jeistlich mau krakjt soo schwak es aus irjent een aundra Mensch, dan mott hee Gott doch krakjt soo goot een Opfa fa siene ieejne Sinden brinjen, aus fa de Sinden von daut Volkj.4 Un kjeena doaf sikj selfst ieren doamet, daut hee sikj daut Huagapriesta Aumt selfst äwanemt, wiel bloos dee kaun Huagapriesta sennen, dän Gott soo fa daut Aumt jeroopt haud, aus Gott Aaron un siene Nokomen mol fa daut Aumt bestemt haud. 5 Un soo aus Aaron sikj nich selfst je-ieet haud, aus Gott am daut Huagepriesta Aumt jejäft haud, soo haud Christus sikj uk nich selfst je-ieet, aus Gott am sien Huagepriesta Aumt jejäft haud. Nä, Gott haud am nämlich soo enjesäajent, aus daut en de Schreften jeschräwen steit,a aus hee to am säd,
"Du best mien Sän,
vondoag sie ekj dien Voda jeworden."
6 Un opp eene aundre Städb steit jeschräwen, waut Gott uk noch to sien Sän jesajcht haud, un hee säd,
"Du best een eewja Huagapriesta,
dee soo es aus de Melchisedek."c
7 Un aus Jesus noch kjarpalich wia oppe Ieed jewast, dan haud hee to dän jebät, dee am halpen kunn, un hee haud lud jeroat, un haud Gott met Tronen enne Uagen jeprachat, daut hee am von de Doodes Macht friemoaken sull. Un wiel Jesus Gott emma en aules je-ieet haud, dan haud Gott siene Jebäda erhieet. 8 Un wan Jesus uk aus Gott sien Sän, äwa aules enjesäajent wia, doawäajen haud hee aus een Mensch jeläden, soo daut hee lieren kunn, Gott en aules fälaloos to jehorchen.d 9 Un aus hee jelieet haud Gott fälaloos to jehorchen, dan wia daut fa am mäajlich jeworden, daut hee aul siene true Menschen, eewich von de jeistliche Sklowarie, un von de Sindenschult frie moaken kunn. 10 Jo, un Gott haud daut fa Jesus bestemt, daut hee nämlich soon Huagapriesta sennen sull, aus de Melchisedek.
Gott sien Volkj saul sikj aunstrenjen jeistlich väarwajch to komen
11 Wie wudden junt noch väl mea von Jesus sien priestalichen Deenst vetalen kjennen, oba ons felt daut schwoa junt mea to erkjläaren, besondasch wiel jie jeistlich schwoahierich jeworden sent. 12 Wiel jie sent doch aul soo lang gleubich jewast, daut jie aul sullen Lierasch sennen, un daut es oba needich, daut junt de ieeschte Lieren von daut Wuat, waut Gott onse Menschen jejäft haud, wada soo sull utjelajcht, aus wan jie em Gloowen noch mau Aunfenja sent. Jo, un wan eena dise Lieren dan wudd met Äten vejlikjen, dan sent jie jeistlich doch soo aus kjliene Kjinja jeworden, dee noch mau bloos Malkj drinkjen, un dee noch nich vom Desch äten kjennen. 13 Wiel aul dee waut jeistlich bloos Malkj drinkjen, hant noch nich soo väl jelieet, daut see aundre lieren kjennen waut rajcht es, wiel see jeistlich noch mau soo aus kjliene Kjinja sent. 14 Oba aul dee waut jeistlich aule Dach emma vom Desch äten, sent doch soo aus een utjewosna Mensch. Un see hant de Lieren aul soo väl jebrukt, daut see jeistlich aul een schneiwen Kjantnis hant, soo daut see schwind fauststalen kjennen, waut goot un bees es.