Paulus haud disen Breef aun een Maun jeschräwen dee Philemon jeheeten haud, aus Paulus en de Staut von Room em Jefenkjnis wia. Philemon wia een Wieet jewast, dee en de Staut von Kolossa jewont haud, un hee haud een Sklow jehaut, dee von am wajchjerant wia. Sien Sklow sien Nomen wia Onesimus, un daut wia soo rom jekomen, daut Onesimus sikj bie Paulus em Jefenkjnis enjefungen haud. Un aus Paulus de goode Norecht met Onesimus met jedeelt haud, dan wia Onesimus toom Gloowen jekomen.

Doaderch daut Onesimus von sien Wieet wajch jerant wia, haud Philemon väl Oabeit vespält, un daut es uk mäajlich daut hee von am jestolen haud. Un soo haud Paulus sien Wieet disen Breef jeschräwen, om am to bedden daut hee Onesimus frintlich oppnämen sull, un daut hee am siene Schult vezeien sull.

Onesimus wia fa een Tiet lank bie Paulus jewast, aus hee em Jefnekjnis wia, un hee haud am doa bedeent. Un soo haud Paulus am kjanen jelieet, un haud am aus een jeistlicha Brooda väl jeräakjent. Paulus wudd am jehieren en Room jehoolen han, soo daut hee am doa wieda halpen kunn. Oba wiel hee Philemon sien Sklow wia, haud hee am trigj jeschekjt.

Paulus haud disen Breef perseenlich aun Philemon, un aun de gleubje Vesaumlunk jeschräwen, dee sikj en sien Hus vesaumelt haud. Woarschienlich haud Paulus de Sach met Philemon un sien Sklow effentlich vehaundelt, soo daut de gaunze Vesaumlunk doarom wist. Wan see aula doarom wisten, dan kunnen see de Sach soo vehaundlen aus Paulus daut bestalt haud. See wieren nämlich aula Zeij to waut Paulus von Philemon velangt haud.

En Kolossa 4:7-9 läs wie daut Paulus dän Tychikus jeschekjt haud, om dän Onesimus trigj no Philemon to bejleiten. Tychikus wia aus Paulus sien Metoabeida bekaunt jewast, un soo haft hee dän Onesimus unjastetten kunt, wan hee am trigj no Philemon brocht.