Ekj sie Paulus, un ekj mott hia em Jefenkjnis ensetten, wiel ekj de goode Norecht von Jesus Christus wieda jeprädicht ha. Un ons jeistlicha Brooda Timotäus es hia uk bie mie, un wie schriewen die aus eena dee ons jeistlicha Metoabeida es. 2 Jo, un wie schriewen disen Breef uk aun aul de Gleubje dee sikj en dien Hus vesaumlen, un aun onse jeistliche Sesta Aphia, un aun dän Archippus, dee nämlich soo met ons toop fa dän Harn kjamft, aus wan wie jeistliche Soldoten wieren.

3 Un ons Jebät fa junt es, daut Gott ons Voda, un ons Har Jesus Christus, junt muchten leeftolich^b sennen, un daut see junt jeistlich een frädeljet Läwen jäwen muchten.

4-5 Leewa Philemon, ekj saj dän Gott, dän wie aunbäden, emma dank fa die, wan ekj fa die bäd, wiel ekj ha jehieet woo du Gott sien oppoat jesadet Volkj emma jeleeft hast, un daut du die uk emma tru opp dän Harn Jesus veloten deist. 6 Un ekj bäd daut wiel du ons Poatna em Gloowen best, daut ons Gloowen waut wie em Jemeenen hant, dan uk soo en die wirkjen wudd, daut du to ne deepre Erkjantnis komen muchst, von aul daut Goode, waut wie aus Gleubje nämlich erfoaren kjennen, wiel wie jeistlich met Christus toop eent jeworden sent. 7 Jo, ekj sie Gott emma dankboa fa die, leewa jeistlicha Brooda, wiel mie jeft daut nämlich väl Freid un Moot wan ekj hia woo du Gott sien oppoat jesadet Volkj emma jeleeft hast, un daut du äant ennalich uk emma jestoakjt hast.

8 Un wiel du die emma soo om Gott sien Volkj jekjemmat hast, dan weet ekj daut du Rajchte doonen woascht, un soo wudd ekj aus een Apostel die om een Jefaulen froagen, uk wan ekj wudd kjennen soo brow sennen, daut ekj die daut wudd bemotten kjennen. 9 Oba wäajen de Leew waut wie aus Kjinja Gottes eena fa dän aundren hant, wudd ekj die leewa prachren, daut du daut Rajchte doch wellich doonen wurscht. Ekj Paulus, räd met die aus een oola Maun, dee aus Jesus Christus sien Deena hia em Jefenkjnis ensetten mott. 10 Un soo pracha ekj die om Onesimus sient Haulwa, dee jeistlich fa mie soo aus mien ieejna Sän jeworden es, daut du am leeftolich sennen wurscht. Wiel en de Tiet waut ekj hia sie jefangen jewast, ha ekj de goode Norecht selfst met am met jedeelt. Un wiel hee dan uk toom Gloowen jekomen wia, es daut nämlich soo aus wan ekj sien jeistlicha Voda jeworden sie.

11 Ea Onesimus^c toom Gloowen jekomen wia, wia hee die nich sea nutzboa jewast, oba nu es hee ons beid toom nutzen. 12 Hee es mie sea leew, un wan ekj am trigj no die schekj, dan späat sikj daut nämlich, soo aus wan hee een Poat von mie met nemt. 13 Ekj wull am jieren bie mie hoolen, soo daut hee mie en diene Städ halpen kunn, wan ekj hia wäajen de goode Norecht ensetten mott. 14 Oba ekj wull nuscht doonen, onen daut du doamet envestonen wieescht. Soo daut wan du mie wurscht halpen wellen, dan sust du nich jleewen, daut die doatoo bedwungen wort, nä, daut sust du nämlich friewellich doonen.

15 Daut es mäajlich daut Gott dit soo aus dit haft rom komen loten, wiel fleicht haft Onesimus fa een Tietlank von die must jetrant sennen, soo daut hee kunn jerat woaren, un soo daut du am dan uk fa emma aus jeistliche Brooda trigj haben kust. 16 Nu es hee nich mea bloos soo aus een Sklow fa die. Nä, nu es hee väl mea, wiel nu es hee dien beleewda jeistlicha Brooda. Ekj räakjen am aus een jeistlicha Brooda besondasch väl, oba du woascht am noch väl mea räakjnen, wiel ieeschtens woat hee die bäta deenen, un doatoo es hee nu eena, met däm du jeistlich, met däm Harn toop eent best.

17 Wan du mie fa een Poatna em Gloowen talst, dan nemm Onesimus doch krakjt soo frintlich opp, aus wan du mie oppnämen wurscht. 18 Un wan hee die oba waut aun jedonen haft, ooda wan hee die waut schuldich es, dan räakjen mie daut aun. 19 Ekj, Paulus schriew die dise Wieed met miene ieejne Haunt, om die to vesechren, daut ekj die aules betolen woa, waut Onesimus die schuldich es. Un ekj wudd oba wenschen, daut daut nich needich sennen wudd, daut ekj die wudd motten denkjenhalpen, waut du mie schuldich best. Wiel daut es doch wiel ekj die de goode Norecht vetalt ha, daut du toom Gloowen jekomen best, un soo wudd daut nämlich soo sennen, aus wan du mie diene ieejne Seel schuldich wieescht. Jo, un soo wudd ekj wenschen, daut du Onesimus doch soo oppnämen wurscht, aus wan du mie oppnämen wurscht.

20 Jo, leewa jeistlicha Brooda, ekj wudd hopen daut wiel wie beid däm Harn deenen, daut du mie daut dan uk jennen wurscht, waut ekj die hia von Onesimus jeschräwen ha.^d Doo mie disen Jefaulen, wiel doamet wurscht du mie ennalich, aus een jeistlicha Brooda stoakjen, dee nämlich uk to Christus jehieet.

21 Ekj schriew die disen Breef, met däm Vetruen, daut du Gott en aul dise Dinja jehorchen woascht, un daut du die dan oba uk noch bemieejen woascht mea to doonen,^e aus waut ekj die jeschräwen ha. 22 Jo, un dan wudd ekj oba uk noch bestalen, daut du ne Gauststow fa mie reedmoaken wurscht. Wiel ekj velot mie doaropp, daut Gott junt aus ne Vesaumlunk erhieren woat, wan jie fa mie bäden, daut hee mie boolt bat junt brinjen wudd.

23 Un Epafras, dee hia met mie toop wäajen de goode Norecht von Christus Jesus ensetten mott, bestalt junt to jreesen. 24 Un onse jeistliche Metoabeida Markus, un Aristarchus, un Demas, un Lukas bestalen junt uk to jreesen.

25 Un toom Schluss wudd ekj junt dan uk noch aula wenschen, daut de Har Jesus Christus siene Leeftolichkjeit^f junt ennalich stoakjen mucht.