Titus haud Paulus un Barnabas bejleit, aus see von de Staut von Antiochieen no Jerusalem jereist wieren, om de gleubje Juden met äare tietliche Noot met to halpen (Galata 2:1). Titus wia een Nich-Jud jewast, dee väl met Paulus met jeoabeit haud. Un soo haud Paulus am aul goot jekjant, aus hee am disen Breef jeschräwen haud.

Opp eene von Paulus siene Missions Reisen, wieren see äwa de Insel von Kreet jereist, un wiel Paulus selfst nich haud doa bliewen kunt, om de gleubje Kreeta jeistlich met to halpen, dan haud hee dän Titus doa jeloten, om daut hee doa wieda schaufen sull. De Kreeta wieren noch nich lang gleubich jewast, un doawäajen haud Paulus dän Titus aun jedeent doa to bliewen, wiel see ateljet noch nich hauden kloa jehaut. Daut Volkj von Kreet wia een sea heidnischet Volkj jewast, un jeistlich wieren de Vesaumlungen noch nich sea wiet aun jewossen.

Paulus haud jewist daut hee sikj opp Titus veloten kunn, oba hee haud am disen Breef jeschräwen, om am denkjen to halpen, wuarom hee am en Kreet jeloten haud. Un wan dis Breef uk perseenlich aun Titus jeschräwen wia, doawäajen sull dee uk vere aul de Vesaumlungen von Kreet väajeläst woaren, soo daut de Gleubje selfst weeten kunnen, waut de Apostel Paulus von Titus, un von äant velangt haud.

Titus sull en de Vesaumlungen Ooms ensäajnen, dee jeistlich aun jewossen wieren, un hee sull de Gleubje lieren, woo see aus Gleubje toop läwen sullen, un woo see sikj eena dän aundren jäajenäwa vehoolen sullen. See sullen nämlich nich mea soo läwen aus de Weltmenschen, dee rom äant wieren.