Paulus haud dän tweeden Breef aun Timotäus vom Jefenkjnis, en de Staut von Rom jeschräwen. Fa waut see Paulus vekloacht hauden es nich kloa, oba hee haft emmahan ensetten must, wiel hee de goode Norecht aulewäajen vebreet haud.

Aus Paulus disen Breef jeschräwen haud, dan wia daut nämlich boolt bat doa jewast, daut hee ver dän Rechta komen must, un daut am wudd vehieet woaren. Paulus haud jewist daut hee boolt wudd stoawen motten, un soo haud hee dän Timotäus en disen Breef jeroopt, no am to komen, wiel hee am noch eemol seenen wull, ea hee stoawen must.

En disen Breef haud Paulus dän Timotäus sea oppjemuntat, de woare Lieren tru wieda to lieren, uk wan hee soo wudd lieden motten aus Paulus. Paulus haud jewist daut hee boolt nich mea aus Apostel wudd deenen kjennen, un soo haud hee dän Timotäus aunjespornt, de groote Veauntwuatunk to äwanämen, de gleubje Vesaumlungen to fieren. Timotäus sull nich schuchta sennen, sikj dise Veauntwuatunk to äwanämen. Hee sull de Krauft woa nämen, waut Gott een jiedren Kjint Gottes jejäft haft, en däm daut een jiedra Kjint Gottes dän Heiljen Jeist en sikj haft. Paulus haud jewist daut Timotäus noch schwoare Tieden ver sikj haud, un wull am reed moaken, soo daut hee soo wieda schaufen wudd, aus Paulus bat doatoo emma jeschauft haud.