Joaren ea Paulus disen Breef jeschräwen haud, dan wia hee fa ne lange Tiet, en de Staut von Ephesus jewast, un haud de Gleubje daut Wuat Gottes kloa utjelajcht. Un aus Paulus von Ephesus wieda jereist wia, dan haud hee doa ne groote volstendje Vesaumlunk hinjaloten, waut dan nämlich von miere kjlandre Vesaumlungen bestunt.

Met de Tiet wieren doa oba atelje faulsche Lieren, en de Vesaumlungen nen jejlept, un aus Paulus un Timotäus dan wada bat Ephesus jekomen wieren, dan haud Paulus dän jungen Timotäus doa jeloten, om de Epheesa äwa de faulsche Lieren uttobätren, un dan wia Paulus oba wieda jereist, no de Jäajent von Mazedonieen.

Timotäus haud Paulus verhäa opp siene Missionsreisen bejleit, un soo haud Paulus am aul goot jekjant, un haud jewist daut hee sikj opp am veloten kunn, wan hee am en Ephesus loten wudd. Doa wieren nämlich atelje faulsche Lierasch jewast, dee sikj aun wesse judische Sitten jehoolen hauden, un dee hauden äare framde Lieren mank de Gleubje wieda jeprädicht. Dise faulsche Lierasch hauden daut nich kloa jehaut, daut een Kjint Gottes jeschlajchtlich^a een reinet Läwen fieren saul. Un see hauden de Gleubje uk vesocht väa to sajen, waut see äten un drinkjen durwen, un daut see sikj nich befrieen durwen. Dise faulsche Lierasch hauden jemeent, daut see ne bätre Kjantnis hauden, aus waut eena von de goode Norecht kjriejen kunn, un daut see doaderch dan uk bäta weeten kunnen, waut werkjlich de Woarheit wia. Un soo wia daut dan met soone Faulschheiten aus dit, daut Timotäus de Vesaumlungen en Ephesus trajchthalpen sull, no däm daut Paulus am doa jeloten haud.

Aus de junga Timotäus een Tietlank en Ephesus wia jewast, dan haud Paulus am disen Breef von Mazedonieen jeschräwen, om am Moot too to spräakjen, un om am denkjen to halpen, wuarom hee am en Ephesus jeloten haud. Hee sull de faulsche Lierasch trajchtwiesen, wan see äare faulsche Lieren mank de Gleubje vebreet hauden, un hee sull de Vesaumlunk oppmuntren, de woare Bootschoft to jleewen un to jehorchen, waut Paulus äant verhäa jelieet haud.

En disen Breef haud Paulus uk kloare Väaschreften utjelajcht, äwa waut fa Mana bie äant aus Äwasechtasch^b un Diakonen deenen durwen, un äwa woo see de Aundacht utfieren sullen, wan see sikj vesaumelt hauden. Dise Väaschreften sent uk fa ons jeschräwen, soo daut wie uk weeten kjennen, waut fa Mana bie ons, aus jeistliche Leidasch deenen derwen. Kjeena doaf sikj een jeistlichet Aumt äwanämen, bloos wiel hee enne Jesalschoft een groota Maun es, ooda wiel hee een gooda Rädna es.

Wan Paulus disen Breef uk perseenlich aun Timotäus jeschräwen haud, doawäajen sull dee ver de gaunze Vesaumlunk väajeläst woaren, soo daut aul de Gleubje daut selfst hieren kunnen, waut Paulus von äant, un von Timotäus velangt haud. Schlieslich wia Paulus dee, waut Gott aum Aunfank no Ephesus jeschekjt haud, om de Epheesa de goode Norecht ut to lajen, waut Paulus nämlich selfst von Jesus jekjräajen haud. Un wan Paulus uk jeplont haud, daut hee noch trigj no Ephesus komen wull, doawäajen wia daut nu aun dän Timotäus, de Epheesa trajcht to wiesen, wua see sikj aun faulsche Lieren jehoolen hauden.