Ekj Paulus, sie Jesus Christus^a sien Apostel,^b wiel daut nämlich Gott sien Wellen fa mie es. Un de Bootschoft waut ekj dan aulewäajen wieda prädjen sull, es daut Gott aulemaun daut eewje Läwen vesproaken haft, wan see jeistlich met Christus Jesus eent jeworden sent.

2 Timotäus, du best mie doch soo leew jeworden, aus wan du mien Sän wieescht. Un nu schriew ekj die disen Breef met daut Jebät, daut Gott ons Voda, un Christus Jesus ons Har, die muchten leeftolich^c un boarmhoatich sennen, un daut see die jeistlich, een frädeljet Läwen jäwen muchten.

3 Timotäus, ekj sie dän Gott emma dankboa, dän ekj nämlich emma krakjt soo, met een kloaret Jewesse jedeent ha, aus miene Väavodasch am emma jedeent hant. Un wan ekj Dach ooda Nacht ver Gott em Jebät kom, dan denkj ekj uk emma aun die, un dan saj ekj Gott uk emma Dank fa die. 4 Un dan denkj ekj uk emma aun diene Tronen, waut du vegoten hautst, aus wie Aufscheet neemen. Un dan ha ekj uk emma een grootet Velangen die wada to seenen, soo daut ekj dan wada kunn froo sennen. 5 Un dan denkj ekj uk emma, aun woo du die onen jeheichelt emma opp Gott veloten hast. Jo, un diene Grootmutta Lois, wia doch dee ieeschte dee sikj soo opp Gott veloten haud, un diene Mutta Eunika, haud dan krakjt soon Gloowen jehaut. Un ekj sie mie secha, daut du nu uk krakjt soon Gloowen hast aus see.

6 Un wan ekj uk äwazeicht sie, daut du die emma opp Gott veloten deist, doawäajen wudd ekj die denkjen halpen, daut du Gott emma dolla soo deenen wurscht, aus sien Jeist die begoft haud, aus ekj die miene Henj oppläd, un die fa dän Deenst ensäajend. 7 Doo dien Deenst mau brow utfieren, wiel Gott haft ons nich een Jeist jejäft, dee ons schuchta moakt. Nä, de Jeist waut wie von Gott jekjräajen hant, jeft ons de Krauft waut ons fält, om Gott to deenen, un om aundre to leewen, un soo daut wie ons selfst beharschen kjennen.

8 Un wiel du Gott sien Heiljen Jeist en die hast, dan schäm die nich vom Harn wieda to prädjen. Un schäm die uk nich fa mie, wan ekj hia aus dän Harn sien Prädja ensetten mott. Un sie doch leewa reed, doano met mie toop aus een Prädja von de goode Norecht to lieden, aus Gott die de Krauft jäwen woat. 9 Un du weetst doch, daut Gott eenem dise Krauft jäwen well, wiel hee es dee waut ons jerat haft, un dee ons haud enjelot, een oppoat jesadet Läwen fa am to fieren. Un dit haud hee oba nich jedonen, wiel wie ons daut met onse Woakjen vedeent hauden, wiel daut kaun kjeena. Nä, Gott selfst haud daut aul von ver dän Aunfank, von de Erschaufunk jeplont, daut hee ons wäajen Jesus leeftolich sennen wudd. Wiel Jesus wudd nochmol aules fa ons doonen, soo daut Gott ons doawäajen wudd aunnämen kjennen. 10 Un aul dit es ons oba ieescht mau nu openboat worden, aus ons Rada, Christus Jesus no de Ieed jekomen wia. Jo, aus Jesus jekomen wia, dan haud hee ons de goode Norecht jebrocht, wuaderch ons daut jeistlich oppdacht, daut hee de Doodes Macht gaunz wajch jeschauft haud, un daut wie daut eewje Läwen kjennen han, un daut wie nochmol woaren veharlichte Kjarpasch kjriejen.

11 Un daut es wiel ekj dise goode Norecht aulewäajen vebreeden sull, daut Christus mie aus sien Prädja, un Apostel, un Liera enjesäajent haud. 12 Un daut es wuarom ekj hia nu em Jefenkjnis lieden mott. Un ekj schäm mie oba nich, uk wan see mie hia aus een Vebräakja enjestopt hant. Wiel ekj kjand dän, opp däm ekj mie veloten doo, nämlich Christus Jesus, un ekj sie mie secha, daut hee aul^d miene jeistliche Oabeit bewoaren woat, waut hee mie haft aunvetrut to verechten, un daut hee mie aun jan Dach, fa mien Deenst beloonen woat.

13 Timotäus, hool die emma gaunz aun mien Väabilt, von woo ekj die de heelsome^e Lieren emma utjelajcht ha. Un met dän Gloowen un de Leew waut du von Christus Jesus jekjräajen hautst, aus wie jeistlich met am eent jeworden wieren, saust du die dan uk mau wieda opp Jesus veloten, un dan saust du de Menschen uk emma soo leewen, aus Jesus dee leeft. 14 Un de wieetvolle Lieren, waut Christus die aunvetrut haft, saust du von de Onwoarheit beschitzen. Jo, un lot de Heilje Jeist, dee nämlich en ons wont, die de Krauft jäwen, soo daut du dise Lieren wurscht tru oppbewoaren kjennen.

15 Du weetst daut aul emmahan, daut aul de Gleubje, von de Prowinz von Asieen, hant mie dän Rigjen jedreit. Jo, un soogoa Phygelus un Hermogenes hant sikj uk von mie aufjesajcht.

16 Oba ekj wensch daut de Har dän Onesiphorus sien Hushault^f boarmhoatich sennen wudd, wiel hee haft mie hia em Jefenkjnis foaken besocht, un hee haft mie emma wada Moot jejäft. Un hee haft sikj uk niemols fa mie jeschämt, wan ekj hia aus een Vebräakja ensetten mott. 17 Un aus hee bat hia, bat de Staut von Rom jekomen wia, dan haud hee nich jewist wua ekj wia. Un hee haud sikj oba sea bemieecht mie to finjen, bat hee mie dan uk schlieslich jefungen haud. 18 Mucht de Har am aun jan Dach boarmhoatich sennen, wan Jesus aus Rechta trigj no de Ieed komen woat. Un mucht hee am fa aul daut Goode beloonen, waut hee fa mie jedonen haft. Jo, un du weetst doch aum basten, woo hee mie en de Staut von Ephesus jeholpen haud.