Paulus haud jewist daut hee boolt stoawen wudd, un haud Timotäus sea aunjespornt, de Woarheit tru wieda to prädjen
4
1-2 Un wiel wie dan ver Gott, un ver Christus Jesus veauntwuatlich sent, fa woo wie met Gott sien Wuat omgonen, dan wudd ekj die ver äant aunspornen, daut du daut Wuat Gottes rajcht utlajen wurscht. Wiel wan Christus trigj no de Ieed komen woat, om sien Kjennichrikj opptostalen, dan woat hee aule Menschen rechten, dee dan woaren läwendich sennen, un dee aul woaren jestorwen sennen. Un soo see daut du daut Wuat emma tru wieda prädjen wurscht, eendoont auf de Gleubje daut paussent es ooda nich. Laj äant de woare Lieren met aula Jedult ut, om äant to wiesen wan see fälen, un om äant to woarnen wan see nich jehorchen, un om äant Moot too to spräakjen, wan see jehuarsom sent.3 Wiel doa woat ne Tiet komen, wan de Gleubje de heelsome Lieren, nich mea woaren vedroagen wellen. Nä, un wiel see bloos soo läwen woaren, aus äant daut jankren woat, dan woaren see sikj leewa väle Lierasch sieekjen, dee äant dan bloos von soont lieren woaren, aus waut see hieren wellen. 4 See woaren sikj von de Woarheit wajchdreien, un dan woaren see sikj aun äare oole Volkjs Jeschichtena hoolen.
5 Oba du Timotäus, see daut du die en diene Jedanken un Woakjen emma selfst beharschen wurscht, un daut du wellich hanhoolen wurscht. Doo diene Oabeit, aus een Prädja von de goode Norecht emma tru utfieren, un see daut du aules tru verechten wurscht, waut dien Deenst von die velangt.
6 Timotäus, dit schriew ekj die nu, wiel mien Läwen nämlich soo aus een Drinkjopfab es, waut ver Gott utjegoten woat. Un daut woat dan aul nich mea lang dieren, bat ekj dise Welt woa veloten motten. 7 Ekj sie jeistlich emma soo aus Feita jewast, dee sikj sea bemieecht wan hee oppspell feiten deit. Un ekj ha Gott nämlich emma soo jedeent, aus wan ekj een grooten jeistlichen Kaumf jefeit ha. Jo, un soo aus een Rana dee dän Rees gaunz to Enj rant, soo ha ekj mien Deenst bat Enj too verecht. Un ekj ha mie emma tru aun de woare Lieren jehoolen. 8 Un soo luat doa fa mie em Himmel ne jeistliche Ierenkroon,c wuamet de Har mie nochmol beloonen woat. Un Jesus es de jerajchta Rechta, dee mie aun jan Dach, fa een jerajchtet Läwen beloonen woat. Un ekj woa oba nich dee eensja sennen, dän hee beloonen woat. Nä, dan woat hee uk aul dee beloonen, dee sikj fa dän Dach freien, wan hee aus Kjennich trigjkomen woat.
Paulus siene latste Väaschreften aun Timotäus
9 Timotäus, bemieej die soo schwind aus mäajlich no mie to komen. 10 Wiel Demas haft mie veloten, un es no de Staut von Tessalonich jetrocken, wiel hee sikj met dise tietliche Welt veleeft haft. Un Kreszens es no de Jäajent von Galatieen vereist, un Titus no de Jäajent von Dalmatieen.d 11-12 Un dän Tychikus ha ekj no de Staut von Ephesus jeschekjt, un soo es doa nu aul mau bloos Lukas, waut mie hia dan noch halpen kaun. Un wan du häa kjemst, dan hol die dän Markus, un brinj am met, wiel hee wudd mie hia met miene Oabeit väl methalpen kjennen. 13 Un brinj mie mien Mauntel, waut ekj bie dän Carpus, en de Staut von Troas jeloten ha, un brinj mie miene Bieekja, un besondasch miene Papieren.e
14 Alexander, de Kjlampnaf haft mie väl Beeset too jerecht. Un de Har woat am doano trigjtolen, aus hee sikj daut vedeent haft. 15 Un paus oba mau sea opp fa am, wiel hee haft sea jäajen onse Lieren jeschauft, un fa die woat hee uk noch Trubbel moaken.
16 Aus ekj hia toom ieeschten mol verem Rechta komen must, dan wia doa kjeena, dee sikj daut jewuach met mie met to komen, om mie to veteidjen. Nä, miene Frind hauden mie aula veloten. Un ekj bäd oba daut Gott daut nich jäajen äant hoolen wudd. 17 Oba de Har stunt mie bie, un jeef mie de Krauft, soo daut ekj daut Wuat Gottes soo utlajen kunn, daut de Rechta un aul de Nich-Juden, de goode Norecht gaunz hieren kunnen. Un soo haud de Har mie von een sechren Doot jerat, soo aus wan hee mie von een hungajen Leiwg jerat haud. 18 Jo, un de Har woat mie nochmol von aul dit Beese friemoaken, waut de Fient mie haft tookomen loten. Un dan woat de Har mie heel en sien Kjennichrikj em Himmel oppnämen. Mucht dän Harn doch emma, un fa emma je-ieet woaren. Jo, soo lot daut mau sennen!
Toom Schluss haud Paulus noch bestalt, daut Timotäus atelje Gleubje jreesen sull
19 Jrees Priskah un Aquila, un aul dee waut too dän Onesiphorus sien Hushault jehieren. 20 Aus wie häakjeemen, dan wia Erastus en de Staut von Korint jebläwen, un Trophimus must ekj en de Staut von Milet loten, wiel hee krank jeworden wia.
21 Timotäus, doo doch aulet mäajlichste, noch verem Winta häa to komen.
Un Eubulus bestalt die to jreesen, un Pudens, un Linus, un aul de aundre jeistliche Jeschwista, bestalen die uk to jreesen.
22 Un toom Schluss es daut mien Jebät, daut de Har die ennalich Krauft jäwen wudd, un daut hee junt doa en Ephesus, aula leeftolich sennen wudd.