Paulus haud Titus oppjemuntat, daut hee de gleubje Kreeta lieren sull, woo see een goodet Läwen fieren sullen
3
Du saust de Gleubje denkjenhalpen, daut see äare Rejierunk un äare Aunjestalde sellen unjadon sennen. See sellen äant jehuarsom sennen, un see sellen en aules emma reed sennen aulahaunt Goodet to doonen. 2-3 See sellen von kjeenem Schlajchtet noräden, un see sellen nich zenkjisch sennen. See sellen aundre emma nat un saunftmootich behaundlen, wiel wie wieren uk emol aula onvestentliche Menschen jewast, dee Gott nich jehuarsom wieren, ea wie toom Gloowen jekomen wieren. Wie wieren aula von de Woarheit veleit jewast, un jeistlich wieren wie soo aus Sklowen, dee nich aundasch kunnen, aus daut wie ons emma bloos aulahaunt beeset jankren loten musten. Wie läwden soo aus wan wie aun dän Vejnieejen veskloft wieren, un wie vebrochten ons Läwen emma bloos met aulahaunt Beeset. Wie wieren aundre Menschen aufjenstich, un wie hausten äant, un see hausten ons.4 Oba, "Aus de Gott, dee ons jerat haft, sien Sän no de Ieed jeschekjt haud, dan haud hee de Welt jewäsen woo leeftolich hee äant wia, un woo hee äant jeleeft haud. Un soo haud hee sien Sän jebrukt, om ons von daut beese Läwen frie to moaken, waut wie verhäa hauden. 5 Dise Radunk wia nich von irjent jerajchte Woakjen aufhenjich, waut wie selfst schaufen musten. Nä, dee wia von Gott siene Erboarmunk aufhenjich. Gott haud ons dän Heiljen Jeist jejäft, om ons ennalich von onse Sinden rein to wauschen, un soo haud Gott ons een nieet jeistliche Läwen jejäft. Nu schauft de Heilje Jeist emma soo en ons, daut wie jeistlich emma woaren nie jemoakt.
6 Wie hauden ons opp Jesus Christus veloten, daut hee onse Sinden fa ons betolt haud, un doawäajen haud Gott dän Heilje Jeist rikjlich opp ons tookomen loten, wuaderch hee ons jeistlich nie jemoakt haud. 7 Un soo wia daut wäajen Gott siene Leeftolichkjeit, daut hee ons aus sien jerajchtet Volkj aunerkjant. Jo, un soo ha wie de Jewesheit, daut wie aules noch emol secha oawen woaren, waut met daut eewje Läwen to doonen haft." 8 Waut ekj die hia jeschräwen ha, sent Wieed wuaropp eena sikj gaunz veloten kaun. Un ekj well han daut du dise Dinja emma kloa betoonen saust, soo daut dee waut sikj opp Gott veloten, sikj emma gaunz aun de goode Woakjen hanjäwen wudden. Dit sent goode Lieren, un dee sent fa dän Mensch toom Gooden.
9 Oba wäa die met irjentwäm äwa domme Froagen, un äwa Staumenrejistascha to strieden. Un ha nuscht met irjent een Jezank too doonen, un stried die met kjeenem äwa daut Jesaz. Soon Jestried haft kjeen Senn, un daut halpt kjeenem waut. 10 Wan doa enne Vesaumlungen wäa es, dee de Gleubje von de Woarheit wajchdreien wudd, dan saust du däm woarnen. Un wan hee die nich jehorcht, dan saust du am toom tweedemol woarnen, un wan hee sikj nich trajchtwiesen lat, dan saust du wieda nuscht met däm to doonen han. 11 Die woat daut aul kloa sennen, daut soona sikj von de woare Lieren wajch jedreit haft. Hee läft met Fliet enne Sinden, un doamet haft hee sikj selfst vedaumt.
Toom Schluss haud Paulus dän Titus atelje Väaschreften jejäft, un dan haud hee de gleubje Kreeta Gottes Säajen jewenscht
12 Ekj well Artemas ooda Tychikus no junt schekjen, om daut eena von dise Mana en diene Städ mank de Gleubje wieda schaufen wudd. Un dan saust du die bemieejen no Staut von Nikopolis to komen, wua du die met mie toopfinjen saust. Wiel ekj ha mie entschloten dän Winta en Nikopolis to vebrinjen. 13 Doo aules waut du kaust om Zenas, dän Offkot, un Apollos met äare Reis met to halpen, soo daut see aules wudden han, waut äant fa äare Reis fälen wudd, wan see von junt wieda reisen wellen. 14 Un see daut de Gleubje äant uk methalpen wudden, wiel de Menschen dän wie daut Wuat Gottes utlajen, motten uk lieren fa aundre Menschen goode Woakjen to doonen, wan äant drinjent waut fält. De Gleubje sellen lieren fa aundre Menschen Goodet to doonen, soo daut see nich een onnutzboaret Läwen fieren wudden.
15 Aul de Gleubje waut hia bie mie sent, bestalen die to jreessen, un du saust aul de Kreta jreesen dee soo jleewen aus wie, un dee ons leewen.
Un mien Jebät fa junt aus Gleubje es, daut jie aula emma erfoaren wudden, woo leeftolich Gott junt es!