3 Dise faulsche Lierasch lieren daut wan eena Gott toom Jefaulen läwen well, daut eena sikj nich befrieen doaf, un daut eena nich aules äten doaf. Oba Gott haud daut Äten aula erschaufen, soo daut de Gleubje, waut de woare Lieren erkjant hant, am fa daut Äten bedanken wudden, wan see daut von am aunnämen. 4 Daut Äten es doch aula goot, wiel aus Gott aules aum Aunfank erschaufen haud, dan wia doa nuscht waut hee nich goot erschaufen haud. Un soo es doa kjeen Äten, waut wie ons aufsajen motten, wan wie Gott fa daut Äten Dank sajen, wan wie daut von am aunnämen. 5 Un wie weeten daut daut Äten aula goot es, wiel Gott haud doch jesajcht daut daut aula rein es. Un soo haft Gott daut Äten aula met sien Wuat rein jesproaken, soo daut wie daut aula äten derwen, wan wie am em jebät, fa daut Äten bedanken.

6 Timotäus, wan du de gleubje Jeschwista, emma tru väastalen woascht, waut ekj die en disen Breef jeschräwen ha, dan woascht du een gooda Deena von Christus Jesus sennen. Jo, un dan woaren dise Bootschoft, von ons Gloowen, un dise goode Lieren, die jeistlich stoakjen, waut du doch aul emma best tru jewast. 7 Oba vesiem die nich met de gottloose Volkjs Jeschichten,^a waut de oole Frues emma vetalen. Nä, sie jeistlich doch leewa soo aus een Rana, dee väl eewen deit, wan hee oppspell ranen well, un eew die jeistlich doch soo ver Gott to läwen, aus am daut jefaulen wudd. 8 Wiel daut Sprechwuat sajcht, 'Wäa sikj bloos en daut kjarpalichet eeft, om sien Kjarpa to beharschen, däm nuzt daut mau fa dit Läwen waut. Oba wäa sikj en jeistliche Dinja eeft, om Gott toom Jefaulen to läwen, däm nuzt daut nu, un uk en daut näakjste Läwen.'

9 Waut dit Sprechwuat sajcht es doch soont wuaropp wie ons gaunz veloten kjennen. 10 Un daut es wuarom wie aus Gott siene Deena, emma sea schaufen un kjamfen, soo to läwen aus Gott daut jefelt. Wiel wie veloten ons opp een läwendja Gott, dee aules soo utfieren woat aus hee daut vesproaken haft. Hee es dee waut fa aule Menschen een Wajch vesorcht haft, soo daut see kjennen jerat woaren. Un hee haft aul dee jerat dee sikj opp am veloten, un wie veloten ons opp am.

11 Timotäus, lia de Gleubje waut ekj die en disen Breef jeschräwen ha, un kjikj doano daut see diene Lieren dan uk wudden jehorchen. 12 Paus opp waut du sajchst, un woo du die vehelst, un leew de Gleubje, un uk aul de aundre Menschen. Velot die emma gaunz opp Gott, un see daut du emma een reinet Läwen fieren wurscht. Wiel dan woascht du fa de Gleubje een goodet Väabilt sennen, waut see nomoaken kjennen, un dan woat kjeena die veachten kjennen, wiel du junk best.

13 Ekj well boolt bat doa no die komen, oba äwadäm es daut aun die, daut du de Vesaumlunk de Schreften^b emma pinkjlich väaläsen wurscht. Lia äant waut de Schreften bedieden, un dan sporn äant uk aun, dee to jehorchen. 14 Paus opp daut du diene jeistliche Gow nich veschloffen wurscht, waut de Heilje Jeist die toom deenen jejäft haft. Du hautst diene jeistliche Gow doch krakjt don jekjräajen, aus daut von die jeprofezeit wort, woo du Gott deenen wurscht. Un dan hauden de Ooms die äare Henj oppjelajcht, un hauden die fa dän Deenst enjesäajent, waut de Heilje Jeist die jejäft haud.

15 Denkj mau goot äwa aules waut ekj die hia jeschräwen ha no, un laj die gaunz doarhinja, dise Dinja aula tru uttofieren, soo daut aulemaun daut wudd seenen kjennen, woo du en daut Jeistliche toonemst. 16 Un paus fa die selfst opp, daut du emma soo läwen wurscht, aus Gott daut jefaulen wudd, un daut du de woare Lieren emma rajcht utlajen wurscht. Wiel wan du daut deist, dan woascht du die jeistlich selfst bewoaren, un uk dee waut die hieren.^c