Aus Paulus opp siene tweede Missionsreis, bat de Staut von Tessalonich jekomen wia, dan wia hee met Silas un Timotäus toop no de Judenschool jegonen, soo aus Paulus daut emma fa Mood haud, un dan haud hee de Menschen de goode Norecht vetalt, von woo Jesus aus Gott sien Enjesäajenda Kjennich jekomen wia, un daut hee fa aulem jestorwen wia, om eenem met Gott em Himmel to veseenen, un daut hee dan uk nochmol wada trigj komen woat. Un dan wia daut benna vea Wäakj soo rom jekomen, daut atelje Juden un väle Nich-Juden, toom Gloowen jekomen wieren.

Oba doa wieren atelje ongleubje Juden jewast, dee Paulus wieren aufjenstich jewast, un see hauden de Enwona von Tessalonich väajeloagen, un hauden äant jesajcht, daut Paulus un Silas dän reemischa Kjeisa nich wieren unjadon jewast, wiel see sikj nämlich opp Jesus, aus äaren Kjennich veleeten. Un soo hauden de Juden, de Menschen von Tessalonich soo oppjeräacht, daut see Paulus un Silas ombrinjen wullen, un soo hauden de Gleubje, Paulus un Silas de Nacht plietsch wajchjeschekjt, ea de Menschen äant waut doonen kunnen. Paulus un Silas wieren mau vea Wäakj en de Staut von Tessalonich jewast, un trotzdäm hauden see doa ne gleubje Vesaumlunk jejrint. Seet Aposteljeschichte 17:1-10.

Un aus Paulus lota selfst nich haud trigj komen kunt, om de niee Christen en Tessalonich to besieekjen, dan haud hee äant Timotäus jeschekjt, om äant jeistlich Moot to toospräakjen. Un aus Timotäus en Tietlank bie de Tessalonicha wia jewast, dan wia hee wada trigj no Paulus jekomen, un dan haud hee am vetalt, woo am daut en Tessalonich jegonen haud, un daut de Gleubje Gott wieren tru jebläwen, un daut äant atelje Lieren oba noch nich wieren kloa jewast. Un soo haud Paulus äant disen Breef jeschräwen, om äant weeten to loten, woo hee sikj jefreit haud, daut see Gott wieren tru jebläwen, un om äant atelje Lieren bäta to erkjläaren.

Eene Froag waut de gleubje Tessalonicha em besondren onkloa wia, wia nämlich, "Waut wudd met de Menschen passieren, dee gleubich jestorwen wieren, wan Jesus noch nich aus Kjennich trigj no de Ieed jekomen wia?" Un soo haud Paulus äant, daut en disen Breef vesocht to erkjläaren, daut aule Gleubje nochmol met Jesus woaren ve-eenicht woaren, un daut dee waut dan noch woaren läwendich sennen, woaren nämlich kjeen Väadeel äwa de vestorwne han, un daut see nochmol aula woaren veharlichte Kjarpasch kjriejen, eendoont auf eena aul jestorwen es, wan Jesus trigj kjemt.