4
Un Wieets, siet jerajcht un veninftich en woo jie met june Sklowen omgonen, wiel jie weeten daut jie em Himmel uk een Wieet hant, ver däm jie nämlich veauntwuatlich sent.Paulus haud de Kolossa aunjespornt to bäden, om daut de goode Norecht aulewäajen sull vebreet woaren
2 Siet to aule Tiet emma staunthauft em Jebät, un wan jie bäden sellen jie jeistlich uk emma waka un dankboa sennen. 3-4 Un bät uk emma fa ons, wiel daut es doch krakjt wiel ekj de Bootschoft von Christus vebreet ha, waut fa de Welt lang emma een Jeheemnis wia, daut ekj hia nu em Jefenkjnis ensetten mott. Jo, un soo bät daut Gott ons de Frieheit jäwen wudd, soo daut wie dise Bootschoft wudden wieda prädjen kjennen, un daut ekj dise jeheeme Bootschoft dan uk emma soo kloa utlajen mucht, aus daut von mie aus een Apostel velangt woat.
5 Siet weis en woo jie junt met de Weltmenschen vehoolen, un nuzt aule Jeläajenheiten emma ut, om äant aun Christus äwa to jewennen. 6 Siet emma leeftolich un auntrakjent, en woo jie met äant räden. Wiel dan woaren jie emma weeten woo jie een jiedrem auntwuaden sellen, wan see sullen Froagen han.
Toom Schluss haud Paulus de Kolossa Gottes Säajen jewenscht, un hee haud äant erkjläat, wuarom hee äant haud Tychikus jeschekjt
7 Tychikus es ons beleewda jeistlicha Brooda, un hee woat junt een vollen Berecht jäwen, äwa woo mie daut hia jeit. Hee es dän Harn sien trua Deena, dee mie aus een Metkjnajcht, en dän Harn siene Oabeit emma sea methalpt. 8 Un ekj ha am uzhent no junt jeschekjt, om junt weeten to loten woo ons daut jeit, un om junt Moot too to spräakjen. 9 Un hee saul ons beleewda un trua jeistlicha Brooda Onesimusa trigj no Hus bejleiten. Onesimus es nämlich eena von june Menschen, un hee un Tychikus woaren junt aules vetalen, von woo ons daut hia jeit.
10 Un Aristarkus, dee hia met mie toop em Jefenkjnis es, un Barnabas sien Vada Markus, bestalen junt to jreessen. Un jie weeten doch, daut wan Markus bat junt komen sull, daut jie am dan uk frintlich oppnämen sellen, soo aus junt daut nämlich aul erkjläat wort. 11 Un Jesus,b dän see oba uk Justus nanen, bestalt junt uk to jreessen. Dise dree sent nämlich dee eensje von aul de gleubje Juden, dee noch emma met mie toop fa daut Gottes Rikj schaufen.c Un see sent fa mie een groota Troost jeworden.
12 Un Epafras, dee nämlich eena von june Menschen es, bestalt junt uk to jreessen. Hee es Christus sien jeistliche Deena, un hee kjamft emma sea em Jebät fa junt, daut jie jeistlich stoakj un volkomen sennen muchten, un daut jie junt uk emma gaunz secha sennen wudden, äwa waut Gott sien Wellen fa junt es. 13 Un jie kjennen junt doaropp veloten, daut hee emma sea fa junt bäden deit. Wiel ekj kaun junt daut selfst bezeijen, daut hee sikj jeistlich emma sea fa junt aunstrenjt, un daut hee sikj uk emma sea fa aul de Gleubje aunstrenjt, dee en de Städa von Laodizea un Hierapolis wonen.
14 Un Lukas, ons beleewda Dokta, un Demas bestalen junt uk to jreessen.
15 Un jreest onse jeistliche Jeschwista von Laodizea. Un jreest Nympha uk, un aul de Gleubje dee sikj en äa Hus vesaumlen.
16 Un wan jie disen Breef ver june Vesaumlunk väajeläst hant, dan lot de Gleubje von Laodizea, dän uk noch läsen. Un dan sellen jie dän Breef, waut ekj aun äant jeschräwen ha, ver june Vesaumlunk väaläsen. 17 Un sajcht Archippus, daut hee doafäa oppkomen saul, daut hee dän jeistlichen Deenst volfellen saul, waut hee von däm Harn jekjräajen haft.
18 Ekj Paulus, schriew junt disen Aufscheetsgruss en miene ieejne Hauntschreft, soo daut jie weeten kjennen, daut dis Breef von mie kjemt. Un doot nich vejäten fa mie to bäden, wan ekj hia em Jefenkjnis ensetten mott. Un muchten jie emma erfoaren woo Gott junt emma leeftolich es!