Aus Paulus disen Breef aun de Gleubje von de Staut von Kolossa jeschräwen haud, dan haud hee dän von en een Jefenkjnis, en de Staut von Room jeschräwen. Paulus haud de Kolossa perseenlich nich jekjant, oba aus een Apostel wia daut siene Veauntwuatunk, aul de nich-judische Vesaumlunk mettohalpen, un seenen daut dee jeistlich väarwajch komen wudden.

Eena von Paulus siene true Metoabeida wia Epafras jewast, un hee wia nämlich dee jewast, dee de jeistliche Vesaumlunk en de Staut von Kolossa jejrint haud. Hee haud de goode Norecht krakjt soo utjelajcht aus Paulus dee emma utjelajcht haud, un soo haud Paulus sikj gaunz opp am veloten kunt, daut hee de Kolossa emma daut Rajchte jelieet haud.

Aus Paulus dis Breef jeschräwen haud wia Epafras nämlich bie am en Room jewast. Epafras haud am em Jefenkjnis besocht, un haud am een Berecht von de Jemeent en Kolossa jebrocht. De Kolossa wieren em Jefoa jewast, daut see wada en äare oole Sitten un Gloowens Oat trigj faulen wullen, un soo haud Paulus äant disen Breef jeschräwen, om äant Moot too to spräakjen, un haud äant aun de woare Lieren denkjen jeholpen, waut see von Epafras jelieet hauden. Un doa wieren oba uk soone jewast, dee de Kolossa Errlieren jelieet hauden, un Paulus wull de Kolossa oppmuntren, daut see sikj mau wieda aun de Woarheit hoolen wudden, soo aus see daut von Epafras jelieet hauden.

Paulus haud de Kolossa em besondren denkjen jeholpen, woo groot Jesus Christus es. See sullen daut nämlich nich vejäten, daut Jesus äwa aules de Vollmacht em Himmel un oppe Ieed haft, un daut see dan jeistlich uk aul een Poat en daut jeistliche Oafgoot hauden, waut aule Kjinja Gottes noch emol kjriejen woaren, wan Jesus enne Tookunft, aus Kjennich trigj no de Ieed komen woat.

Wie weeten daut wan Paulus disen Breef aun de Kolossa jeschräwen haud, daut de Gleubje von Laodizea dän dan oba uk noch läsen sullen. Wiel Paulus haud en disen Breef bestalt, daut de Kolossa disen Breef dan uk noch wieda jäwen sullen, aun de Gleubje von Laodizea, soo daut see dän dan uk noch läsen kunnen. Seet Kolossa 4:16. Un de Breef waut Paulus aun de Gleubje von Laodizea jeschräwen haud, sull dan uk noch ver de Gleubje von Kolossa jeläst woaren.