Dit es de Breef, dee Paulus aun aun de Gleubje von de Staut von Kolossa jeschräwen haud.
DE BREEF AUN DE KOLOSSA
Paulus bejreest de Gleubje von de Staut von Kolossa
1
1-2 Leewe Frind von Kolossa,Ekj sie Paulus, un ekj sie Jesus Christus sien Apostel,a wiel daut Gott sien Wellen fa mie es.
Un ons jeistliche Brooda Timotäus, es hia uk bie mie, un wie schriewen disen Breef, aun aul onse oppoat jesade jeistliche Jeschwista von de Staut von Kolossa, dee sikj opp Christus veloten, un dee jeistlich met am toop eent jeworden sent.
Un ons Jebät fa junt es, daut Gott ons Voda, un ons Har Jesus Christus, junt muchten leeftolichb sennen, un daut see junt jeistlich een frädeljet Läwen jäwen muchten.
Paulus haud de Kolossa weeten jeloten, daut hee foaken fa äant jebät haud, un daut see Epafras siene Lieren woa nämen sullen
3 Wie bäden stendich too dän Gott, dee ons Har Jesus Christus sien Voda es, un wie danken am emma fa junt, wan wie too am bäden. 4 Wiel wie han jehieet, daut jie junt opp Christus Jesus veloten, un daut jie aul Gott sien oppoat jesadet Volkj leewen. 5 Jo, un daut jie soon Gloowen, un soone Leew wudden han, kjemt doch von de Jewesheit, daut jie aul daut Goode noch emol secha kjriejen woaren, waut Gott fa junt em Himmel wajch jelajcht haft. Un dise Jewesheit ha jie doch aul emma von donn jehaut, aus jie de woare Lieren von de goode Norecht, toom ieeschtemol jehieet hauden.
6 Dise Bootschoft wia doch emol krakjt soo bat junt jekomen, aus dee aulewäajen enne Welt vebreet woat, un dee es jeistlich soo aus een gooda Fruchtboom, dee emma väl Frucht drajcht. Un doawäajen sent doa aulewäajen, emma mea Menschen, dee een nieet jeistlichet Läwen kjriejen, un dee jeistlich dan uk krakjt soo toonämen, aus daut nämlich bie junt passieet. Un soo aus dit ha jie dan aul von donn emma toojenomen, aus jie de Woarheit toom ieeschtemol jehieet hauden, un aus jie daut dan uk werkjlich erkjant hauden, daut Gott junt leeftolich es.
7 Dit ha jie doch aula krakjt soo aus dit von Epafras jelieet, aus hee junt de goode Norecht utjelajcht haud. Epafras es nämlich ons beleewda Metoabeida, un hee es Christus sien trua Deena, un soo halpt hee ons, wan hee junt em Jeistlichen väarwajch brinjt. 8 Jo, un hee es dan uk dee, waut ons von de Leew vetalt haft, waut de Heilje Jeist junt fa aul Gott sien Volkj jejäft haft.
9 Un wiel wie soont von junt jehieet hant, dan ha wie, von dän Dach aus wie doavon jehieet hauden, nich oppjehieet fa junt to bäden. Un ons Jebät es daut Gott junt emma fa aules de jeistliche Weisheit un Vestentnis jäwen mucht, soo daut jie werkjlich erkjanen muchten, waut Gott sien Wellen fa junt es. 10 Wiel dan woaren jie emma soo läwen kjennen, aus sikj daut fa dän Harn sien Volkj jehieet, un dan woaren jie aules emma soo verechten, aus dän Harn daut dan uk jefaulen wudd. Jo, un dan woaren jie jeistlich uk emma, soo aus een fruchtboara Boom sennen, dee en aules waut jie doonen, emma väl Goodet schaufen woaren. Un soo woaren jie Gott dan uk emma bäta kjanen lieren.
11 Un wie bäden uk daut Gott siene harliche Krauft, junt jeistlich emma stoakja moaken mucht, soo daut jie jeistlich emma staunthauft un jeduldich sennen wudden, wan jie en Schwierichkjeiten jeroden, un daut jie jeistlich dan uk emma een frooet Läwen fieren muchten. 12 Un wie bäden uk daut jie ons Voda Gott emma dankboa sennen muchten, wiel hee es dee waut daut fa junt haft mäajlich jemoakt, daut jie Kolossa nu uk een Poat von daut jeistliche Oafgoot kjennen han, waut Gott fa aul sien oppoat jesadet Volkj bestemt haud. Nu jehieren jie uk to daut nämelje Volkj, waut sikj jeistlich emma von de Woarheit, von Christus sien jeistlichet Licht,c rejieren lat. 13 Jo, un soo siet Gott ons Voda doch emma dankboa, wiel hee es nämlich dee, waut ons jeistlich gaunz vewaundelt haud. Hee haud ons von de beese diestre Macht frie jemoakt, waut jeistlich emma soo äwa ons rejieet haud, daut wie nich aundasch kunnen, aus daut wie emma bloos een beeset Läwen fieren musten. Un dan haud hee ons jeistlich ne sechre Städ, en sien leewen Sän sien Kjennichrikj jejäft. 14 Wiel jeistlich wieren wie met Gott sien Sän eent jeworden, aus hee aum Kjriez jestorwen wia, un soo haud hee sien Blootd dan uk fa ons vegoten. Jo, un soo wia sien Bloot de Pries, wuamet hee ons von de jeistliche Sklowarie frie jekoft haud, un wuamet hee ons aul onse Sinden vezeit haud.
Paulus haud de Kolossa denkjen jeholpen, woo groot Gott sien Sän wia, en dän sien Rikj see nämlich uk een Poat hauden
15 Gott sien Säne haft krakjt soon Jestault,
aus waut sien Voda Gott haft,
dee nämlich onsechtboa es.
Un soo openboat hee eenem,
krakjt wäa Gott es.
De Sän wia eewich doa,
ea irjentwaut erschaufen wia.
Un soo rejieet hee soo äwa de gaunze Erschaufunk,
aus een ieeschtjebuarna Sän,f
dee äwa sien Voda sien Hushault rejieet.
16 Wie weeten daut Gott sien Sän,
soo aus een ieeschtjebuarna Sän es,
dee äwa de gaunze Erschaufunk es,
wiel Gott haud am jebrukt,
om aules to erschaufen,
waut em Himmel un oppe Ieed es,
un waut sechtboa un onsechtboa es.
Jo, un wan wie von aul daut onsechtboare räden,
waut Gott sien Sän erschaufen haud,
dan sent doch uk aul de jeistliche Machten jemeent,
eendoont auf dee goot ooda schlajcht sent.
Un daut helt sikj dan uk jlikj auf dise jeistliche Machten opp Troons rejieren,
ooda auf dee soo aus Kjennichrikjs sent,
ooda auf dee soo aus Harschoften sent,
ooda auf dee soo aus Vollmachten sent,
wiel Christus es werkjlich äwa aules.
Jo, Gott haud sien Sän jebrukt,
om aules to erschaufen.
Un daut haud hee aula,
fa sien Sän erschaufen,
soo daut aules fa am sennen sull.
17 Un hee wia eewich doa,
ea irjentwaut erschaufen wia.
Un Gott brukt am,
om de gaunze Erschaufunk,
ordentlich toop to hoolen.
18 Un de Sän es jeistlich uk,
soo aus een Mensch sien Kopp,
waut äwa de Jlieda,
von sien jeistlichen Kjarpa rejieet.
Wiel hee rejieet soo äwa de Jlieda,
von siene jeistliche Vesaumlunk,
aus een ieeschtjebuarna Sän,
dee fa siene Jeschwista oppaust.
Wiel hee wia de Ieeschta,
von siene jeistliche Vesaumlunk,
dee von mank de Doodes oppjestonen wia.
Un dit haud hee soo aus dit utjefieet,
soo daut hee en aules,
äwa de gaunze Erschaufunk,g
de Väaschta sennen wudd.
19 Wie weeten daut Gott sien Sän,
äwa aules de Väaschta sennen mott.
Wiel sien Voda Gott haud bestemt,
daut Gott siene Natua un siene Ieejenschoften,
aula fa voll en sien Sän sennen sullen.
20 Un de Voda haud uk bestemt,
daut hee sien Sän dan uk brucken wudd,
om de gaunze Erschaufunk met Gott to veseenen,
soo daut aules soo ver Gott sennen wudd,
aus Gott daut fa de gaunze Erschaufunk bestemt haud.
Un soo haud sien Sän,
sien Bloot aum Kjriez vegoten,
om fa aules Fräd to veschaufen.
Un soo haud Gott daut dan jeschauft,
daut aules sikj met am veseenen kunn,
eendoont auf daut oppe Ieed es,
ooda auf daut em Himmel es.
21 Un jie Kolossa hauden uk emol nuscht met Gott too doonen jehaut. En june Jedanken wieren jie Gott emma fientlich jesonnen, wiel jie emma beese Jedanken hauden, un wiel jie emma bloos een beeset Läwen fieeden. 22 Un doch haud Gott junt met sikj selfst veseent, doamet daut sien Sän kjarpalich fa junt jestorwenh wia. Wiel jeistlich wieren jie uk met sien Sän eent jeworden, aus hee fa junt jestorwen wia. Un soo stalt hee junt nu aus oppoat jesade un fälaloose Menschen ver Gott han, dän kjeena fa irjentwaut beschuljen kaun.
23 Oba wan jie wieda ver Gott aus jeistlich oppoat jesade Menschen läwen wellen, dan motten jie junt emma tru un staunthauft, aun dise woare Lieren von Christus hoolen. Un jie derwen junt nich von de Jewesheit aufbrinjen loten, daut jie aul daut Goode noch emol secha kjriejen woaren, wuavon jie jehieet hauden, aus junt de goode Norecht utjelajcht wort. Dise Bootschoft es doch aul aulewäajen, mank aule Velkja vebreet worden, un daut wia doch krakjt om dise Bootschoft to vebreeden, daut Gott mie aunjestalt haud. Jo, mie Paulus, haud Gott aus sien Deena aunjestalt, om dise Bootschoft, aulewäajen mank june nich-judische Menschen, to vebreeden.
Paulus haud de Kolossa erkjläat, daut Gott am aus een Apostel aunjestalt haud, om de goode Norecht mank de Nich-Juden uttolajen
24 Un nu mott ekj hia kjarpalich lieden, wiel ekj ne jeistliche Oabeit doo, waut fa junt aus Nich-Juden toom Gooden es. Un wan ekj uk lieden mott, doawäajen frei ekj mie, wiel soo ha ekj dan uk een Poat en Christus sien Lieden, waut hee dan noch fa sien jeistlichet Kjarpa to lieden haft.i Un wan ekj hia von Christus sien Kjarpa räd, dan es doch siene gaunze jeistliche Vesaumlunk jemeent. 25 Jo, Gott haud mie aus een Deena, en Christus siene jeistliche Vesaumlunk aunjestalt. Un de Veauntwuatunk waut hee mie jejäft haud, es daut ekj june nich-judische Menschen, daut gaunze Wuat Gottes kloa utlajen saul.
26 Von dise Bootschoft wia doa lang emma väl jewast, waut Gott de Menschen lang emma nich openboat haud. Un nu oba, to onse Tiet, haft hee de jeheeme Dinja, aun sien oppoat jesadet Volkj openboat. 27 Un waut hee äant openboaren wull, wia nämlich woo besondasch harlich daut nu fa junt aus Nich-Juden sennen wudd, nu daut Christus jeistlich uk en junt wont. Un wiel Christus en junt wont, dan ha jie de Jewesheit, daut jie dan noch emol uk een Poat en Gott siene tookjinftje Harlichkjeit woaren han, wan Christus aus Kjennich trigj no de Ieed komen woat.
28 Un von disen Christus, prädjen wie aulewäajen met aul de Weisheit, waut Gott ons doatoo jeft. Un wie vemonen aule Menschen om äant trajchttowiesen, un wie lieren aulem äwa woo eena jeistlich met Christus eent woaren kaun, soo daut wie een jiedrem aus jeistlich volkomen, ver Gott wudden hanstalen kjennen. 29 Un daut es om aul dit to verechten, daut ekj mie emma sea bemieejen doo. Jo, ekj sträw emma met aul de Krauft, waut Christus mie fa dise Oabeit jeft, wuamet hee groosoatich derch mie schaufen deit.