2 Un soo paust mau fa de gottloose Menschen opp, dän eena met Hunj vejlikjen kaun, wiel see schaufen bloos emma Beeset. See velangen daut eena sikj saul beschnieden loten, wan eena too Gott sien Volkj jehieren well, un soo wellen see eenem dän Kjarpa bloos vejniewlen. 3 See meenen see jehieren too Gott sien Volkj, wiel see kjarpalich beschnäden sent, oba wie sent dee waut sikj aun de woare Beschniedunk hoolen. Wie loten ons nich kjarpaliche beschnieden, om Gott toom Jefaulen to läwen, wiel wie veloten ons nich opp onse ieejne Krauft. Wie freien ons daut wie met Jesus Christus toop ve-eenicht sent, un wie veloten ons opp Gott sien Heiljen Jeist siene Krauft, soo daut wie Gott aunbäden un deenen kjennen, un soo es de Beschniedunk wuaraun wie ons hoolen ne jeistliche Beschniedunk, wuaderch wie derchem Gloowen weeten kjennen daut wie to Gott sien Volkj jehieren.

4 Wan daut mäajlich wia, daut eena jesazlich soo läwen kunn, aus Gott daut von sien Volkj velankt, dan haud ekj daut jeschauft. Un wan jane meenen, daut see soo läwen kjennen, dan haud ekj daut aul aulemol kunt. 5 Wiel ekj sie een jebuarna Birja von daut israelitische Volkj, un ekj staum von Jakob sien Sän Benjamin auf, un aus ekj acht Doag oolt wia, dan hauden miene Elren mie krakjt soo beschnieden loten, aus daut Jesaz daut von de Juden emma velangt haud. Jo, ekj sie een ajchta Hebräa. Ekj jehieed mol to de Farisäa äare Grupp, un hilt mie emma krakjt soo strenj aun aul Moses siene Jesazen aus see. 6 Un ekj wia uk emma soo iewrich, daut aundre Menschen daut Jesaz jehorchen sullen, daut ekj Gott sien Volkj, nämlich de Gleubje Vesaumlunk, emma sea vefolcht haud. Jo, un wan daut mäajlich wia, daut eena derch Moses siene Jesazen ver Gott jerajcht woaren kunn, dan wia ekj jerajcht jewast, wiel aus een Jud haud ekj mie emma fälaloos aun aul onse Jesazen jehoolen.

7 Ekj docht mol, daut wan ekj de Jesazen von Moses jehorchen wudd, daut Gott mie daut fa Jewenns aunräakjnen wudd. Oba aus ekj aules em betracht jenomen haud, waut de Christus fa ons jedonen haud, om ons jerajcht to moaken, dan erkjand ekj daut miene jesazliche Woakjen, kjeen Wieet hauden. 8-9 Jo, un soo veacht ekj aules waut fa mie een Jewenns sennen sull, un dan tal ekj daut aula fa Velust, besondasch wan ekj see wooväl wieetvolla daut es, daut ekj dän Har Jesus, Christus kjan. Jo, un ekj laj aules waut ekj jesazlich fa Jesus volbrocht haud tosied, un see daut aula fa Aufgank aun, soo daut ekj daut woa nämen kaun, daut ekj met Jesus eent jeworden sie. Nä, un ekj velot mie uk nuscht opp, soont waut ekj derch daut Jesaz volbrocht ha, wiel de Wajch wuaderch eena met Gott veseent woat, kjemt bloos derchem Gloowen. Wiel wan eena sikj opp aul daut velat, waut Jesus fa eenem jedonen haft, dan raäkjent Gott eenem Jesus siene Jerajchtkjeit aun. 10-11 Jo, derchem Gloowen sie ekj met Christus toop eent jeworden, un soo well ekj am emma bäta kjanen lieren, jo, ekj well de nämelje Krauft en mien Läwen erfoaren, dee am mol vom Doot haud oppjewoakt. Ekj sie wellens met Jesus toop to lieden un kjarpalich to stoawen, un ekj näm daut fa woa aun, daut ekj jeistlich krakjt soo ver Gott jestorwen wia, aus Jesus mol aum Kjriez jestorwen wia. Un wiel Jesus oba vom Doot oppjestonen wia, dan velot ekj mie gaunz doaropp daut ekj daut niee Läwen nu aul ha, un daut ekj von dän kjarpalichen Doot, nochmol onbedinjt oppstonen woa.

12 Wan ekj soo aus dit räden doo, dan meen ekj nich to sajen, daut ekj dise Krauft, en mien Läwen emma erfoaren doo, ooda daut ekj aul volkomen sie. Oba ekj sträw emma soo volkomen to sennen, aus Christus Jesus volkomen es. Wiel aus Jesus mie mol aunjenomen haud, dan wia daut sien Ziel fa mie, daut ekj soo Volkomen sennen saul, aus hee es. 13 Leewe jeistliche Jeschwista, ekj bild mie daut nich en, daut ekj dit Ziel aul errieekjt ha. Oba dit eene doo ekj, ekj bemieej mie emma soo aus een Rana, dee sikj väarwajch äwabicht, wan hee oppe Wad no daut Ziel rant, un ekj kjikj niemols trigj, no aules waut ekj derch daut Jesaz jeleist ha, nä, ekj kjikj bloos väarwajch, no daut Ziel waut Gott mie haft väajesat. 14 Jesus Christus es nämlich aul em Himmel, un wiel wie aus Gleubje aul met am ve-eenicht sent, dan es mien Ziel soo volkomen to läwen aus hee em Himmel ver Gott es. Un soo schauf ekj soo sea aus mäajlich dise Beloonunk to jewennen, fa dän Gott mie em Himmel beroopt haft.

15 Un wiel Gott ons soon grootet Ziel väajesat haft, dan well wie, dee em Gloowen aunjewossen sent, ons doch eenjen äwa waut wie äwa dise Dinja jleewen, un well wie uk aula de nämelje Enstalunk han. Un wan doa von junt wäa es, dee äwa irjent een Punkt aundasch denkjen deit, dän woat Gott daut aul kloa moaken. 16 Oba well wie bloos seenen, daut wie ons wieda aun aul daut hoolen, waut wie em jeistlichen aul errieekjt hant.

17 Leewe jeistliche Jeschwista, stot junt doch met deejanje toop, dee mie jeistlich em Läwen no open, un recht junt no äa Väabilt. 18 Wiel doa sent väle, von dän ekj junt aul foaken vetalt ha, dee nich soo läwen aus wie. Un ekj vetal junt daut nu wada, un met Tronen enne Uagen, daut see Christus siene Fiend jeworden sent, wiel see daut nich wellen soo han, daut Jesus, de Christus es, dee aus een Opfa aum Kjriez fa aulem jestorwen wia. 19 See sent oppe Wajch nom Vedaumnis, un äa Bejia es fa äant een Aufgott jeworden. See puchen sikj äwa Dinja wuafäa see sikj schämen sullen, un see denkjen emma bloos aun daut irdische, un woo see fa nu läwen wellen.

20 Un wie oba, sent em Himmel Birja, wua de Har Jesus Christus wont. Un wie luaren aul sea, daut Jesus aus Rada trigjkomen saul, om ons von dise sintliche Welt frie to moaken. 21 Jo, un met de nämelje Krauft, wuamet Jesus de gaunze Erschaufunk nochmol unja siene Kontrol brinjen woat, woat hee onse vejenkjliche Kjarpasch veendren, un ons soone wundaboare Kjarpasch jäwen, aus waut hee nu em Himmel haft. Un dan woa wie schlieslich gaunz volkomen sennen.