Paulus lieed daut de gleubje Vesaumlunk soo toop läwen saul, daut aulemaun daut to seenen kaun, daut see sikj aula opp dän nämeljen Gott veloten
4
Un wiel Gott ons, derch Jesus, soo väl Goodet haft tookomen loten, dan pracha ekj junt aus eena, dee aus dän Harn sien Deena ensetten mott, daut jie soo läwen muchten, aus sikj daut fa Gott sien Volkj jehieet. Wiel Gott haud junt von manke Weltmenschen rut jeroopt, un haud von junt een oppoat jesadet Volkj jemoakt. 2 Un soo bedd ekj junt, daut kjeena sikj äwa sien Näakjsten erhäwen wudd, un daut jie junt emma deemootich un saunftmootich vehoolen wudden, un daut jie junt en Leew vedroagen wudden, wan jie fälen woaren. 3 Gott sien Jeist haud onse beid Velkja Fräd jeschonken, un haud von ons een Volkj jemoakt, un soo bedd ekj junt, daut jie aulet mäajlichste doonen, om frädlich enne Eenichkjeit toop to läwen.4 Wiel doaderch daut wie jeistlich met Jesus ve-eenicht sent, dan sent wie uk aula soo aus de Jlieda von een Kjarpa, un daut es wiel wie eent un dän selwjen Heiljen Jeist hant. Gott haud ons aula fa ne wundaboare Tookunft beroopen, un soo velot wie ons doaropp, daut hee ons uk aules jäwen woat, waut hee ons fa de Tookunft vesproaken haft. 5 Wie hoolen ons aula aun een Gloowen, un wie hant mau een Wieet, un soo lot wie ons aula bloos en sien Nomen deepen. 6 Wie hoolen ons aun een Gott un Voda, von dän wie aula aufstaumen, un dee äwa aulem rejieet, un dee en ons, un derch ons schauft. Un soo bedd ekj junt wada, doot aulet mäajlichste om enne Eenichkjeit toop to läwen.
7 Jo, un wan wie ons uk aula soo aus dit met Jesus ve-eenicht hant, doawäajen haud Gott een jiedrem von ons ne besondre jeistliche Gow jeschonken, waut hee ons doano haud toojedeelt, aus Christus siene Leeftolichkjeit groot es. 8 Un soo stemt daut uk, waut Gott en de Schreften aul sea lang trigj von sien Sän jesajcht haud, un waut hee uk von sien Profeet haud dol schriewen loten. Un de Profeet schreef,
"Aus hee äwa aul siene Fiend,
de Äwahaunt jekjräajen haud,
dan haud hee aulem bewäsen,
daut hee äwa aules de Vollmacht jekjräajen haud.
Un aus hee sien Volkj dan nom Himmel jenomen haud,
dee verhäa unja siene Fiend äare Jefangenschoft wieren jewast,
dan haud hee Menschen jeistliche Gowen jeschonken."
9-10 Jo, un wan daut sajcht daut Christus sien Volkj nom Himmel jenomen haud, dan jeit daut soo to vestonen daut hee ieescht rauf jekomen wia, no de deepste Städen vone Ieed, nämlich no daut Doodenrikj, un daut hee sien Volkj von doa nom Himmel jenomen haud, dee doa lang emma wieren jefangen jewast. Un aus hee enne Hecht jefoaren wia, dan wia hee no dän hechsten Himmel jefoaren, soo daut hee äwa aules de Vollmacht mucht han, soo daut hee nochmol äwa aules aus Kjennich, woat rejieren kjennen.†
11 Aus Christus sien Volkj jeistliche Gowen jeschonken haud, dan haud hee siene jeistliche Vesaumlunk uk Apostel, un Profeeten,† un Eewanjelisten† jeschonken, un uk Lierasch, dee sikj soo om äare Vesaumlungen kjemmern, aus een gooda Hoad, dee sikj om siene Schop kjemmat. 12 Dise sent nämlich veauntwuatlich, om Gott sien oppoat jesadet Volkj, fa Gott siene Oabeit reed to moaken, soo daut een jiedra sien Poat doonen kaun, om de gaunze Vesaumlunk opptobuen. 13 Soone Apostel, un Profeeten, un Eewanjelisten, un Lierasch, woat Gott siene Vesaumlunk soo lang emma tookomen loten, bat wie ons aula em Gloowen, un en de Kjantnis von Gott sien Sän ons eenjen, un bat wie jeistlich soo toonämen, aus wan een junga Mensch aunwausen deit. Wiel opp soone Wajch woa wie dän Christus siene volle jeistliche Mot errieekjen, met dän wie nämlich aul eent sent, un wan wie soo toonämen, dan woa wie emma dolla dän Christus likjnen.
14 Dan woa wie nich mea soo aus kjliene Kjinja sennen, dee sikj von aulahauntje niee Lieren, emma han un häa tekjen loten. Un wan hinjarigjsche Menschen ons väalieejen, un doonen oba soo aus wan see ons de Woarheit räden, dan woaren see ons nich veleiden kjennen. 15-16 Nä, well wie leewa opprechtich sennen, un ons opp de Woarheit veloten, un ons omzajcht leewen, soo daut wie en aule Stekja wudden jeistlich tonämen kjennen, soo daut wie emma dolla dän Christus likjnen wudden, dee äwa ons rejieren deit. De Christus es doch soo äwa ons, aus de Kopp von een Menschenkjarpa äwa een Kjarpa es, un wie aus Gleubje sent dan soo aus de Jlieda von sien Kjarpa. Un wiel wie aula jeistliche Gowen hant, dan paus wie uk aula krakjt soo en dän Christus sien Kjarpa nen, aus Gott ons en sien Kjarpa haud nen jesat, jo, un dan sent wie nämlich soo aus de Säne, waut sien Kjarpa toophoolen. Un wan wie ons von am rejieren loten, dan deit een jiedra von ons daut Sienje, om daut de gaunza Kjarpa jesunt sennen kaun, un soo daut wie en Leew toop aunwaussen kjennen.
Paulus erkjläad de Epheesa woo see äare niee Natua oppnämen sullen, soo daut see ver Gott een jerajchtet Läwen fieren kunnen
17 Wiel wie dan soo toopschaufen sellen, aus de Jlieda von een Kjarpa toopschaufen, dan saj ekj junt derch de Macht waut de Har Jesus mie jejäft haud, aus hee mie aus sien Apostel haud aunjestalt, daut jie nich mea soo läwen sellen aus de gottloose Weltmenschen, dee sikj bloos no äare onnutzboare Jedanken rechten. 18 Äaren Vestentnis es jeistlich bloos gaunz diesta, un see wellen met fliet nich bäta weeten, un soo hant see sikj gaunz vehoat, un hant kjeen Poat aun daut eewje Läwen waut von Gott kjemt. 19 Soone Menschen aus dit hant kjeen Jewesse, un see schämen sikj uk nuscht wan see sikj gaunz aun een Schlajchtet Läwen hanjäwen, see veläwen sikj jieren met aulahaunt schmutzje Dinja, wuavon see niemols jenuach kjriejen.
20 Oba soon Schlajchtet aus aul dit ha jie nich von dän Christus jelieet. 21 Wiel ekj näm aun daut jie siene Bootschoft jehieet hant, un daut jie de Woarheit soo von am jelieet hant, aus dee en Jesus too erkjanen jeit. 22 Un wiel jie daut dan vestonen kjennen, daut jie jeistlich met dän Christus toop ve-eenicht sent, dan recht junt nich mea no dän väajen Mensch dee jie mol wieren, aus jie mol bloos en june Sinden läwden. Wiel jun väaja Mensch lat sikj bloos hinjat Licht fieren, un dee lat sikj bloos aul daut schwienschet jankren, un soo brinjt dee sikj doch bloos wieda enne Grunt.
23-24 Un soo jäft junt dan leewa aun dän Heiljen Jeist han, un lot am june Jedanken un Enstallunk nie moaken, wiel aus jie met dän Christus wieren eent jeworden, dan haud jie ne niee Natua jekjräajen. Un soo bedd ekj junt, daut jie june niee Natua oppnämen wudden, dee nämlich en Gott sien Ebenbilt erschaufen wia, un wan jie junt dee woaren oppnämen, dan woa jie werkjlich een jerajchtet un oppoat jesadet Läwen fieren.
25 Wiel wie aula een Poat aun dän Christus sien Kjarpa hant, un wiel jie june Eenichkjeit dan nich vestieren wellen, dan bedd ekj junt, daut jie junt unjarenaunda nich väalieejen wudden, un daut jie leewa wudden de Woarheit räden. 26 Un wan jie junt oajren, dan vesindicht junt nich doamet daut jie junt von dän Oaja wudden rejieren loten, un hieet noch en däm selwjen Dach, met däm oajren opp. 27 Wiel wan jie junt veoajren dan jäw jie dän Diewel Rum wua hee mank junt schaufen kaun.
28 Wan du een Deef best, dan hia met däm stälen opp, un schauf leewa selfst met de Henj, om die diene Sachen opprechtich to vedeenen, un soo daut du dan uk selfst waut hast, waut du met de Oame metdeelen kaust.
29 Lot junt kjeene schädliche Wieed ut däm Mul rut komen, un rät leewa von soont waut goot es, un waut toom nutzen es, un waut aundre oppbut, soo daut jie de Menschen dee junt hieren, een Säajen kjennen sennen.
30 Beleidicht dän Heiljen Jeist nich, doamet daut jie een schlajchtet Läwen fieren. Wiel Gott haud junt dän Heiljen Jeist aus een Tieekjen jejäft, wuamet hee junt aus Gott sien Volkj aufjestampelt haud, un wuamet hee junt bat aun dän Dach aus Gott sien Ieejentum betieekjen woat, wan Gott junt von dise sintliche Welt friemoaken woat. Jo, un soo läft doch soo aus sikj daut fa Gott sien Volkj jehieet.