En de Aposteljeschicht läs wie von Paulus siene veschiedne Missionsreisen, un von woo hee de veschiedne Vesaumlungen jejrint haud, un wie nämen aun, daut hee de Vesaumlungen en de Galata Jäajent, opp siene ieeschte Missionsreis jejrint haud. Un wie läsen oba uk, von woo doa vom Aunfank aun emma wieren Juden jewast, dee Paulus siene jeistliche Oabeit vestieet hauden. Un wie nämen aun, daut es no Paulus un Barnabas äare ieeschte Missionsreis jewast, daut Paulus disen Breef aun de Galata jeschräwen haud.

Wiel en dän Galata Breef läs wie, daut Paulus sikj äwa de Galata jestaunt haud, wiel no däm daut see toom Gloowen jekomen wieren, dan haud daut nich lang jedieet, daut see sikj von de woare Lieren hauden veleiden loten. See hauden de goode Norecht nämlich jieren aunjenomen, aus Paulus äant dee utjelajcht haud, un see wieren jeistlich uk goot väarwajch jekomen. Un dan haud daut oba nich lang jedieet, un dan hauden see sikj von de faulsche Lierasch veleiden loten.

Dise faulsche Lierasch, wieren nämlich Juden jewast, un see hauden jelieet daut wan eena wull jerat sennen, daut daut dan nich too rieekjt, daut eena sikj bloos opp Christus veloten wudd, un daut eena sikj dan uk noch no daut Jesaz no beschnieden loten must. Oba väle von de Gleubje von de Galata Jäajent, wieren Nich-Juden jewast, dee nämlich nich beschnäden wieren. Un doamet daut de faulsche Lierasch daut von äant velangt hauden, daut see sikj musten beschnieden loten, hauden de faulsche Lierasch äant ne groote jeistliche Laust opp jelajcht, wuamet see äant hauden sea unja äare Kontroll jehaut.

Dise faulsche Lierasch hauden soo jedonen, aus wan see sikj sea aun daut Jesaz jehoolen hauden, un see hauden de Jesazen oba nich aula woa jenomen, un soo haud Paulus daut Jesaz jebrukt, om de Galata to wiesen, daut wan eena een Jesaz jehorchen wull, om ver Gott jerajcht to sennen, dan musten see de Jesazen aula fälaloos jehorchen, sonst wia eena eewich von Gott vedaumt.

En disen Breef haud Paulus de Galata uk denkjen jeholpen, daut Jesus Christus daut Jesaz fälaloos jehorcht haud, waut nämlich sonst kjeena doonen kaun, un daut eena sikj dan bloos opp am veloten mott, om ver Gott jerajcht to sennen. Jesus haud aus een judischa Mensch, een fälalooset Läwen, unja daut Jesaz jeläft, un dan haud hee aule Menschen äare Sinden opp sikj jenomen, un dan wia hee fa dee jestorwen, soo aus wan hee dee selfst begonen haud. Un wiel Jesus dän Mensch siene Sindenschult gaunz ver Gott betolt haud, aus hee aum Kjriez jestorwen wia, dan kaun een jiedra sikj gaunz secha sennen, daut Gott eenem aunnämen woat, wan eena sikj opp Jesus veloten haft. Un daut helt sikj dan uk jlikj auf eena een Jud es ooda nich. Wiel daut Gott eenem aunnämen kaun, es aula bloos von Jesus aufhenjich, un von waut hee fa een jiedrem jedonen haft.

Waut Paulus en disen Breef uk noch sea betoont haud, es daut wan de Galata Gott toom Jefaulen läwen wullen, dan kunnen see sikj nich aun daut Jesaz hoolen. Wiel wäa daut Jesaz vesieekjt to jehorchen, om een jerajchtet Läwen ver Gott to fieren, es dan von siene ieejne kjarpaliche Krauft aufhenjich. Un doa es oba kjeena aus Jesus selfst, dee em Staund es de Jesazen soo to jehorchen, daut Gott met eenem wudd kjennen to Fräd sennen. Un soo es eena dan gaunz von daut aufhenjich, waut Jesus fa een jiedrem jedonen haft.

Un waut Paulus de Galata dan uk noch erkjläat haud, es, daut Jesus haft aule Gleubje dän Heiljen Jeist jejäft, soo daut de Heilje Jeist eenem daut niee jeistliche Läwen jäwen wudd, un soo daut hee eenem dan uk de jeistliche Krauft jäwen wudd, om daut eena soo ver Gott wudd läwen kjennen, aus am daut jefaulen wudd. De Heilje Jeist es en aule Gleubje, om eenem to leiden, un om eenem jeistlich soo to stoakjen, daut eena daut dan uk aula wudden doonen kjennen, waut de Heilje Jeist eenem fieet to verechten. Gott kaun daut von kjeene Christen aunnämen, wan see daut christliche Läwen, en äare ieejne Krauft vesieekjen to läwen.

Paulus haud de Galata en disen Breef sea aunjespornt, daut see sikj jeistlich oppbuen sullen, un daut see sikj omzajcht utbätren sullen. Un wäa aundre em Jeistlichen halpen wull, kunn daut oba mau dan, wan hee sikj von dän Heiljen Jeist rejieren leet. Kjeena doaf sikj jleewen too groot to sennen om aundre to halpen. Christen motten sikj fa aundre Tiet nämen, om äant met äare Schwierichkjeiten ut to halpen, wiel doamet leewen see sikj omzajcht, soo aus Jesus daut nämlich befolen haft.

Waut Paulus de Galata hiamet sajen wull, es daut wan see soo sea doano ut wieren, de Jebooten to jehorchen, dan sullen see sikj omzajcht leewen, wiel doamet wudden see Jesus siene Jeboot jehorchen. Un daut kunnen see oba mau dan, wan see sikj von däm Heiljen Jeist rejieren leeten.