အိုယ် ဘေ ဘီနွင် ပီ ရွက့် အုဝ်၊ ကွဲ့ တဲး ဘေ ညှိုမ် ဒွန် အီ အီ တဝ်း၊ အန် ဟဲ့ မိုဝ်း နဝ်း ဖွိုမ် ဇဝ်ဖြာ။ တဲး ဘေ ဆာခိ ဒီ ယွတ်၊ ယုဝ် န့ မုး တူ မုး နဝ်း ဖွိုမ် ဇဝ်ဖြာ။ ခုဝ်၊ န့ ဟဲ့ မိုဝ်း ကိူန် ဂေ အီ ညိုင်ရာင် ဒီ ဘျာန် ဂြုဝ်း ဇဝ်ဖြာ။ ဂေ ဟဲ့ ဟာဝ် ဒွန် နာ ဒွန် ပ့လုဝ့် ဒဲင် ကာဒါယ် နီ။ 2 ဆေ ဘေ ဆီ နပ် အီ မုး တူ မုး နဝ်း ဖွိုမ် ဇဝ်ဖြာ၊ ဘေ လုဝ် ဆာခိ ဒီ ယွတ် ပီ ညှိုမ် ဂေ။ ဒွန် အီ အီ တဝ်း၊ ဇဝ် ယေဆူ ဟဲ့ ဘဲန် ဒူအီ၊ နဝ်း ဖွိုမ် အန် ဟဲ့ မုး နဝ်း ဖွိုမ် ဇဝ်ဖြာ။ 3 အာဆေ ယီ တူ တဝ်း၊ အန် ညှိုမ် ဇဝ် ယေဆူ၊ နဝ်း ဖွိုမ် အန် တူ မုး နဝ်း ဖွိုမ် ဇဝ်ဖြာ။ န့ မုး နဝ်း ဖွိုမ် ဒူအီ တွိုန်၊ အီ မုး ရန်ဆူ ဇဝ် ယေဆူ၊ အီ ကာဘး ဒီ အန် ဇဝ် ဆေဆေ။ ဘေ မိူဝ် ဟဲ့ ဒွိုမ် ယိုဝ် အီ တဝ်း၊ ဝီ တီ ဒီ တး။ မာလဲ၊ ဒေါ တီ နီ ဒူအီ အီ မိုဝ်း နဝ်း ဖွိုမ် အန်၊ ဂေ ဟဲ့ ဟွတ့် တး ကွယ် ဒဲင် ကာဒါယ် နီ။

4 အိုယ် ဘေ အီ ပီ ဂွန် ပီ ရွက့် အုဝ်၊ ဘေ ဟဲ့ ဘဲန် ဒူအီ ပီ အိုပ် ဇဝ်ဖြာ။ ဘေ မိူဝ် ဟဲ့ အွင် ဂေ ဒူအီ အီ ညိုင်ရာင် ဒီ ဘျာန် ဂြုဝ်း ဇဝ်ဖြာ တီ၊ ကူပ် ဟဲ့ ကွယ် နဝ်း ဖွိုမ် ဇဝ်ဖြာ ခဲင် နဝ်း ဘေ။ နဝ်း ဖွိုမ် ဇဝ်ဖြာ တီ၊ ဟဲ့ မိုဝ်း အာဖုင် ဒင်ခုဝ် တာင် လွှိုမ် ရန်ဆူ ဇဝ် ယေဆူ အီ ကွယ် ဒဲင် ကာဒါယ် နီ။ 5 ဖိုင် ဂေ တီ၊ ဂေ မုး ဒူအီ ဒဲင် ကာဒါယ် နီ။ ဂေ ဘော ကာလာင် အာမျုဝ် ပီ ကာဖာ ဂေ ဒူအီ အီ ကွယ် ဒဲင် ကာဒါယ် နီ။ ဒူအီ အီ ကွယ် ဒဲင် ကာဒါယ် နီ မိူဝ် ဒီ ဘော ထူမ် ဂြုဝ်း ဂေ။ 6 အီ မုး အေ၊ အေ မုး ဒူအီ ပီ အိုပ် ဇဝ်ဖြာ။ အာဆေ ဟဲ့ နပ် ဇဝ်ဖြာ၊ အန် ဒီ ထူမ် ဂြုဝ်း အေ။ အာဆေ တူ မုး ဒူအီ ပီ အိုပ် ဇဝ်ဖြာ၊ အန် တူ ထူမ် ဂြုဝ်း အေ။ ပါယ် တီ၊ အေ ဒီ ဘော နပ် ဆီချာ၊ အာဆေ မိုဝ်း နဝ်း ဖွိုမ် အီ မှာန် ဘော အာဆေ မိုဝ်း နဝ်း ဖွိုမ် အီ တူ မှာန်။

7 အိုယ် ဘေ ဘီနွင် ပီ ရွက့် အုဝ်၊ တဲး အေ လာယ် ရွက့်။ ခုဝ်၊ ဇဝ်ဖြာ တဲး အေ မိုဝ်း နဝ်း ရွက့်။ အာဆေ မိုဝ်း နဝ်း ရွက့်၊ အန် မုး ဂွန် ဇဝ်ဖြာ၊ အန် ဘော နပ် ဇဝ်ဖြာ။ 8 အာဆေ တူ မိုဝ်း နဝ်း ရွက့်၊ အန် တူ နပ် ဇဝ်ဖြာ။ ခုဝ်၊ ဇဝ်ဖြာ မိုဝ်း နဝ်း ရွက့်။ 9 ဇဝ်ဖြာ ဟဲ့ ဘျ နဝ်း ရွက့် အန် ပါယ် နီ။ အန် ဇဝ် ပီ ဘော မိုဝ်း ဂွန် မီ အူ ဝီ မိူဝ်၊ အန် ယီ တိုယ် ဂွန် အန် တီ၊ တဲး အန် လူင် ဒဲင် ကာဒါယ် နီ၊ တဲး အန် ပွိုန် ဒီ ဒွါ အာဆာက် ကာမာယ် ဒီ အေ။ 10 နဝ်း ရွက့် ပီ တဝ်း အုဝ် တီ၊ အာဝ် မုး အေ အီ ရွက့် ဇဝ်ဖြာ။ န့ မုး ဇဝ်ဖြာ အီ ဟဲ့ ရွက့် အေ။ အန် ဟဲ့ တိုယ် ဂွန် အန် တး လူင် ဒဲင် ကာဒါယ် နီ ဘော ခမ် ဒီ ယမ် ကာဒါင် အေ၊ တဲး အန် ဂဝ်း ဝဲန် မှာပ် အေ။ 11 အိုယ် ဘေ ဘီနွင် ပီ ရွက့် အုဝ်၊ ကူပ် ဟဲ့ ရွက့် ဇဝ်ဖြာ ဒီ အေ ပါယ် တီ၊ အေ မိူဝ် ဟဲ့ လုဝ် လာယ် ရွက့်။ 12 အာဝ် မိုဝ်း အာဆေ အီ ဟဲ့ ဒွိုမ် ယိုဝ် ဇဝ်ဖြာ။ ဆေ အေ ယီ လာယ် ရွက့်၊ ဇဝ်ဖြာ ဒီ ကွယ် ကာဒိုက် ကာဒဝ့် ဒီ အေ။ နဝ်း ရွက့် အန် ဇဝ် မိူဝ် ဒီ နုဝ့် ခဲင် နဝ်း အေ။

13 ဇဝ်ဖြာ ဟဲ့ ဒွါ နဝ်း ဖွိုမ် အန် ဒီ အေ။ ခုဝ်၊ အေ နပ် ဆီချာ၊ ဇဝ်ဖြာ ဟဲ့ ကာဒိုက် ကာဒဝ့် ဒီ အေ၊ ဘော အေ ဟဲ့ ကာဒိုက် ကာဒဝ့် ဒီ ဇဝ်ဖြာ။ 14 ယေ ယီ ဟဲ့ ဟွတ့် ယိုဝ်၊ ဟဲ့ ဝီ ကာလာင် ဒီ ဒွန် အီ လွင် ဇဝ်ဖြာ အီ မုး ဂုန့် အေ၊ အန် ဟဲ့ တိုယ် တး ဂွန် အန်၊ တဲး အန် ချွတ် ဒူအီ ဒဲင် ကာဒါယ် ဘောကာဂ့လျီတ်။ 15 အာဆေ တဝ်း၊ ဇဝ် ယေဆူ မုး ဂွန် ဇဝ်ဖြာ၊ ဒူအီ ဝီ တီ ဟဲ့ ကာဒိုက် ကာဒဝ့် ဒီ ဇဝ်ဖြာ။ ဇဝ်ဖြာ မိူဝ် ဟဲ့ ကာဒိုက် ကာဒဝ့် ဒီ အန်။ 16 ခုဝ် အန် တီ အေ ဟဲ့ နပ်၊ ဟဲ့ ပွိုန် ညှိုမ်၊ ဇဝ်ဖြာ ဟဲ့ ရွက့် အေ။

ဇဝ်ဖြာ မိုဝ်း နဝ်း ရွက့်။ ဒူအီ ဒွန် အီ အီ မိုဝ်း နဝ်း ရွက့် မိူဝ်၊ အန် ဟဲ့ ကာဒိုက် ကာဒဝ့် ဒီ ဇဝ်ဖြာ။ ဇဝ်ဖြာ မိူဝ် ဟဲ့ ကာဒိုက် ကာဒဝ့် ဒီ အန်။ 17 ဆေ အေ ကာဒိုက် ကာဒဝ့် ဒီ ဇဝ်ဖြာ ပါယ် တီ၊ နဝ်း ရွက့် ဇဝ်ဖြာ ကော နုဝ့် ခဲင် နဝ်း အေ။ အေ မိူဝ် ဒီ မိုဝ်း နဝ်း ယ ပန် ဒီ ဇမ် ဆီငဲ ဒီ ဆုင်ဖျာတ် အန် ဇဝ် အာမူ အီ။ ခုဝ်၊ ဒေါ ကွယ် အေ ဒဲင် ကာဒါယ် နီ၊ အေ မိူဝ် ဘူင် ပီ ဒွိုမ် ဘူင် ဇဝ် ယေဆူ။ 18 ဆေ အေ ရွက့်၊ အေ မိူဝ် တူ ယုဝ်။ ဆေ အေ ရွက့် ဆီချာ၊ န့ ဘော ပဲ ဒီ ဆုတ့် တဝ် နဝ်း ယုဝ်။ ပီ ယုဝ် အေ၊ အေ ယုဝ် ဒီ ခမ် မှာပ်။ ခုဝ်၊ အာဆေ ဆီ မိုဝ်း နဝ်း ယုဝ်၊ အန် ညှမ် ရွက့် ဆီချာ။

19 အေ မိုဝ်း နဝ်း ရွက့် ကူပ် ဟဲ့ ရွက့် ဇဝ်ဖြာ အေ ဒီ အာတ့်။ 20 ဆေ န့ မိုဝ်း ဒူအီ အီ တဝ်း၊ “အုဝ် ဟဲ့ ရွက့် ဇဝ်ဖြာ။” အန် ယီ ဆီ ဇွင့် ဘီနွင် အန်၊ ဒူအီ ဝီ တီ ကာလုဝ်။ ခုဝ်၊ ဆေ အန် တူ ပွိုန် ရွက့် ဘီနွင် ပဲ့ ဟဲ့ ယိုဝ် အန်၊ အန် တူ ပွိုန် ရွက့် ဇဝ်ဖြာ ပီ တူ ပွိုန် ယိုဝ် အန်။ 21 ခုဝ်၊ ဇဝ် ယေဆူ ဟဲ့ ဒွါ ဒါရာ ဒီ အေ။ အန် တဝ်း၊ အာဆေ ရွက့် ဇဝ်ဖြာ၊ အန် ဒီ လုဝ် ရွက့် ဘော ဘီနွင် အန်။