1 အုဝ် အီ မုး ဒါ တာင်၊ အုဝ် ဒဲမ် ပဲ့ နီ တိုယ် ဒီ နာင် အီ မုး ဒူအီ ပီ ရဝ်း ဇဝ်ဖြာ။ အုဝ် ဒဲမ် ဘော ဒီ ဂွန် အန် ဂေ ဒွန် အီ။ ဘေ မုး ဒူအီ ပီ ရွက့် အုဝ် အာခါခ်ု။ အာဝ် ဝန် မီ အုဝ် ဟဲ့ ရွက့် ဘေ၊ ဘော ဂေ အီ နပ် နာ မုး နာ မှာန် ဒွန် အီ ဟဲ့ ရွက့် ဘေ။ 2 ယေ ရွက့် ဘေ ကူပ် ဟဲ့ မိုဝ်း ယေ နာ မုး နာ မှာန် ခဲင် နဝ်း ယေ။ န့ ဒီ ဘော ကွယ် ပါယ် တီ ဆေဆေ။

3 တဲး ဇဝ်ဖြာ အီ မုး ဂုန့် အေ ဘော ဇဝ် ယေဆူ အီ မုး ဂွန် ဇဝ်ဖြာ ကာဝေ အေ ဘော ဂေဇူ အေ။ တဲး အန် ဇဝ် ဒွါ ဘော နဝ်း ဂျီတ် ဒီ အေ။ တဲး အေ ရွက့် ဘော ဘူင် နာ မုး နာ မှာန် ဆေဆေ။

4 အုဝ် ဟဲ့ ယိုဝ်၊ ဂေ ဂွန် မဲ နာင် မင် အီ ဟဲ့ ဒူပ် နာ မုး နာ မှာန်၊ ဘူင် ဒူပ် ပီ စ်ု ဇဝ်ဖြာ အီ မုး ဂုန့် အေ။ ခုဝ်၊ အုဝ် ဟဲ့ ခူယ် ကာဆဝ်။ 5 ဒေါ တီ နီ အုဝ် ဒဲမ် ဒီ မဲ နာင်၊ တဲး ဘေ လာယ် ရွက့်။ အာတီ၊ အာဝ် မုး ဒါရာ ကာမာယ် ပီ ဒဲမ် အုဝ်။ ဇဝ်ဖြာ ဟဲ့ စ်ု အေ လာယ် ရွက့် အူ ဆိန့် ဒေါ ဂုဝ် အန်။ 6 ဆေ မဲ ရွက့် ပါယ် တီ၊ န့ တဲး မဲ ဘူင် ဒူပ် ဂြုဝ်း ပီ ဒမ် အုန် ဇဝ်ဖြာ။ ဂြုဝ်း တီ အေ ဟဲ့ ဒွိုမ် ထူမ် အူ ဆိန့် ဒေါ ဂုဝ် အန်။ န့ တဝ်း၊ တဲး အေ ရွက့် ဆေဆေ။

7 ဒူအီ အီ ဆီမာ ကာလုဝ် ဟဲ့ ကိူန်။ ဂေ ဟဲ့ ကွယ် ဒွန် နာ ဒွန် ပ့လုဝ့် ဒဲင် ကာဒါယ် နီ။ ဒူအီ ဇိုဝ် တီ၊ ဂေ တူ ညှိုမ်၊ ဇဝ် ယေဆူ ဟဲ့ တး ဘဲန် ဒူအီ။ ဘော ဒူအီ ဝီ ဆီမာ ကာလုဝ် ဘော ဘဲန် ရန်ဆူ အီ ကာဘး ဒီ ဇဝ် ယေဆူ တွိုန်၊ အန် မုး ဒူအီ ဇိုဝ် တီ။ 8 ခုဝ် အန် တီ တဲး ဘေ ဆာဒိက် ဒုဝ် ဘေ၊ ကွဲ့ တဲး ပီ ဘူင် ဘေ စှိုမ် ဟြာယ် ပီယေန့်။ တဲး ဘေ ပွိုန် အာဂျိုဝ် အန်၊ တဲး န့ ကော ဇေ့ဇုင်။ 9 အာဆေ ယီ ဘူင် ပီ အိုင် အန်၊ တူ ထူမ် တူ ဒိုဝ်း ပီ မာနုဝ် ဇဝ် ယေဆူ၊ န့ ပီ ဇဝ်ဖြာ တူ ကွယ် ခဲင် နဝ်း အန်။ အာဆေ ထူမ် ပီ မာနုဝ် ဇဝ် ယေဆူ၊ အန် ဟဲ့ မိုဝ်း ဇဝ်ဖြာ၊ မိုဝ်း ဘော ဇဝ် ယေဆူ ခဲင် နဝ်း အန်။ 10 ဆေ န့ မိုဝ်း ဒူအီ အီ တး ဒူင် ကွယ် ဘေ၊ ဆေ အန် တူ ကာလာင် ပီ ပီ မာနုဝ် အုဝ် နီ၊ ကွဲ့ ရွုး အန်၊ ကွဲ့ ဘာင် အန် လိုပ် ခဲင် ကာင် ဘေ။ 11 ခုဝ်၊ ဆေ ဘေ ရွုး ဒူအီ ဝီ တီ၊ န့ ပီ ဘော ဘေ ဟဲ့ ဘဲန် ဂိုက် အန်၊ ဘူင် အီ ဟာယ် အီ မိူက် ဒူပ် အန်။ 12 အုဝ် ပီ ဘော ဟဲ့ မိုဝ်း ပီ ဒီ ဒဲမ် ကိူန် တိုယ် ဒီ ဘေ မိူဝ်၊ အုဝ် တူ ဆီ ဒိုဝ်း အိုမ် မိုက် ဒဲမ် ဒီ ဇေ။ အုဝ် ဆီ ဟာဝ် ဇမ် ဒူင် ကွယ် ဘေ၊ တဲး အေ ပွိုန် ဒီ လာယ် ကာမွုန်၊ တဲး နဝ်း ဒါခိုယ် အေ ကော နုဝ့် လုတ့်။

13 ဂေ ဂွန် ဝါ မဲ နာင်၊ အီ မုး ဒူအီ ပီ ရဝ်း ဇဝ်ဖြာ၊ ဂေ ဟဲ့ နမ်လှုဝ်း မဲ နာင်။