1 အုဝ် အီ မုး ဒါ တာင်၊ အုဝ် ဒဲမ် ပဲ့ နီ၊ တိုယ် ဒီ မဲ အာဂါယူ အီ မုး ဂိုက် ပီ ရွက့် အုဝ် ခါခ်ု။

2 အိုယ် ဂိုက် ပီ ရွက့် အုဝ်၊ အုဝ် ဆာခိုဝ် ဒါင် မဲ၊ တဲး မဲ ကွယ် ဒါခိုယ် ပ့လူမ် ခ။ တဲး ဒုဝ် ဘူင့် မဲ ဒါခိုယ် ပီ နဝ်း မဲ ဟဲ့ ဒါခိုယ်။ 3 နဝ်း အုဝ် ဟဲ့ ဒါခိုယ် ကာဆဝ် ဒေါ ယိုဝ် အုဝ် ဂေ ဘီနွင် မင် အီ၊ ဂေ ဟဲ့ တး ကာလာင် လွင် ဟဲ့ ညှိုမ် ဆီချာ မဲ အီ မုး အီ မှာန်။ ဂေ ကာလာင် ဘော လွင် ဘူင် မဲ နာ မုး နာ မှာန်။ 4 ဆေ အုဝ် ယိုဝ်၊ ဂွန် အုဝ် ဟဲ့ ဘူင် နာ မုး နာ မှာန်၊ န့ တဲး နဝ်း အုဝ် ဒါခိုယ် ကာဆဝ်။ အာဝ် မိုဝ်း မာဆေ အီ ဒီ တဲး အုဝ် ဒါခိုယ် လွှိုမ် တီ။

5 အိုယ် ဂိုက် ပီ ရွက့် အုဝ်၊ မဲ ဟဲ့ စွယ် ဆီချာ ဂေ ဘီနွင် ဘော ဂေ ပီ တူ ဒွိုမ် နပ် မဲ။ မဲ ဟဲ့ ရွုး ဆီချာ ဂေ။ 6 ဒူအီ ဂေ တီ ဟဲ့ ကာလာင် ပီ ပါယ် မဲ ဒီ ရွက့် ဂေ။ ဂေ ကာလာင် တဲး ဒွန် အီ ခဲင် ဖိုင် ဇဝ် ယေဆူ ထူမ်။ ဆေ မဲ ဘော စွယ် ဂေ ခဲ့ ကာအာပ် စွယ် ခြာဝ် န့တေန့် ဒူအီ အီ ဘူင် ဂါန် ဇဝ်ဖြာ၊ ဘော အာတီ ဟဲ့ မုး ဟဲ့ မွှိုမ်။ 7 ခုဝ်၊ ဒူအီ ဂေ တီ၊ ဂေ လေး ဟာဝ် ဒူပ် န့တေန့် ကူပ် ညှိုမ် ဂေ ဇဝ် ယေဆူ။ ဂေ မိူဝ် တူ ဒိုဝ်း တူ လုဝ် ပီ စွယ် ဒူအီ အီ တူ နပ် ဇဝ်ဖြာ။ 8 ပါယ် တီ၊ အေ လုဝ် စွယ် ဒူအီ ဇိုဝ် တီ၊ တဲး အေ ဘူင် ရိုမ် ဂါန် အီ ကာလာင် ဒီ အီ လွင် နာ မုး နာ မှာန်။

9 အုဝ် ဟဲ့ ဒဲမ် ပဲ့ တိုယ် ဒီ ဂေ ဒူအီ ခဲင် ဖိုင် ဇဝ် ယေဆူ။ မာလဲ၊ န့ မုး အာတာယောတာယာပ်၊ အန် ဆီ ဘဲန် ဒါ တာင် အီ ယဲတ့် အီ ဟဝ်။ အန် ယီ တူ ဆီ ဖြူမ် ရိုမ် ဒူပ် ယေ။ 10 ဆေ အုဝ် ဟီ တး ဒူင် ကွယ် မဲ၊ အုဝ် ဒီ ကာလာင် လွင် ပီ ဘူင် အန်။ အန် ဟဲ့ ကာယွင့် ယေ ဘော ကာလာင် အီ တူ မွှိုမ် လွင် ယေ။ အန် ဟဲ့ ဘူင် ခဲ့ တီ၊ ယီ ညှမ် ဘြေ့ ဒီ နဝ်း အန်။ ဂေ ဘီနွင် မိူဝ်၊ အန် တူ ရွုး။ ဒဲင် တီ၊ အန် ပီ ဝီ ခြဲ ဘော ဂေ အီ ဟဲ့ မိုဝ်း နဝ်း ဆီ ရွုး။ အန် ဘော ဟုဝ် လေး ဂေ ခဲင် ဖိုင် ဇဝ် ယေဆူ။ 11 အိုယ် ဂိုက် ပီ ရွက့် အုဝ်၊ ကွဲ့ တဲး မဲ ညိုင် မျုဝ် အီ တူ ဘွတ် အီ တူ မွှိုမ်။ တဲး မဲ ညိုင် မျုဝ် အီ ဘွတ် အီ မွှိုမ်။ အာဆေ ဘူင် နာ ဘွတ် နာ မွှိုမ်၊ အန် မုး ဂွန် ဇဝ်ဖြာ။ အာဆေ တူ ဘူင် နာ ဘွတ် နာ မွှိုမ်၊ အန် တူ ဒွိုမ် နပ်၊ ဒွိုမ် ယိုဝ် ဇဝ်ဖြာ။

12 ဒွန် အီ ဟဲ့ ကာလာင် နာ မွှိုမ် လွင် အာဒေမေတ် တွိုန်။ ပီ ဘူင် အန် နာ မုး နာ မှာန် ဒွန် မျုဝ် ဟဲ့ ဘျ ခဲ့ မွှိုမ် အန်။ ဘော ယေ ဟဲ့ ကာလာင် နာ မွှိုမ် လွင် အန်။ မဲ မိူဝ် ဟဲ့ နပ်၊ လွင် ပီ ကာလာင် ယေ တီ ဟဲ့ မှာန်။

13 အုဝ် ပီ ဘော ဟဲ့ မိုဝ်း ကိူန် ပီ ဒီ ဒဲမ် တိုယ် ဒီ မဲ မိူဝ်၊ အုဝ် တူ ဆီ ဒိုဝ်း အိုမ် မိုက် ဒဲမ် ဒီ ဇေ။ 14 အာဝ် လှေန့် အုဝ် ဒီ တး ဇမ် ဒူင် ကွယ် မဲ။ ပန် အန် တီ၊ အာယ် ဒီ ပွိုန် ဒီ လာယ် ကာမွုန် လာယ် ယိုဝ်။

15 တဲး မဲ ဒါခိုယ် ဂျာမ်ဆာ။ ဂေ ဂိုက် ဒွန် အီ အီ ကွယ် ဒူပ် အုဝ်၊ ဂေ နမ်လှုဝ်း မဲ။ တဲး မဲ ကာလာင် ဒီ ဂိုက် အီ ကွယ် ရိုမ် ဒူပ် မဲ လွင် ပီ နမ်လှုဝ်း အုဝ် ဘော ဒီ ဂေ ဒွန် အီ။