အုဝ် အာယူဒါ အီ မုး ဝါ အာယာကူပ် တွိုန်၊ အုဝ် ဘော မုး ဒဲစေန့် ဇဝ် ယေဆူ။ အုဝ် ဒဲမ် ပဲ့ နီ တိုယ် ဒီ ဘေ ဒူအီ ပဲ့ ဟဲ့ ရဝ်း ဇဝ်ဖြာ။ ဇဝ်ဖြာ မိူဝ် ဟဲ့ ရွက့် ဘေ။ ဘော ဇဝ် ယေဆူ ဟဲ့ ဘ်ု ရိတ် အာဆာက် ဘေ။

2 တဲး ဇဝ်ဖြာ ဒွါ ကိူန် နဝ်း ရွက့် ကာဝေ ဘော နဝ်း ဂျီတ် ဒီ ဘေ။

3 အိုယ် ဘေ ဂိုက် ပီ ရွက့် အုဝ်၊ အုဝ် ဟဲ့ ခြာမ် ဒီ ဒဲမ် ပဲ့ တိုယ် ဒီ ဘေ လွင် ဇဝ်ဖြာ အီ ဟဲ့ ချွတ် အေ ဒွန် အီ။ အုဝ် ယီ ဟဲ့ နပ် အူ ဇေန့်၊ ပီ ဒီ ဒဲမ် အုဝ်၊ န့ လုဝ် ကာဆုး နဝ်း ဘေ ဘော တဲး န့ ဘဲန် ပ့လူမ် ဘဲန် ဟဲန့် ဒီ နဝ်း ဘေ။ ခုဝ်၊ ဇဝ်ဖြာ ဟဲ့ ဟွတ့် ဒွါ ဂြုဝ်း ပီ ကာလာင် အန် ဒီ ဂေ အီ ညှိုမ် အန်။ ဂြုဝ်း အန် တီ အန် ဟဲ့ ဒွါ မီ အူ ဇေန့်၊ တဲး န့ ကွယ် ပါယ် တီ ဆေဆေ။ အုဝ် မိူဝ် ကာဆုး ဘေ၊ တဲး ဘေ ခြဲ ဂေ အီ ကာဘး ဒီ ဂြုဝ်း ဇဝ်ဖြာ တီ။ 4 ခုဝ်၊ ဒူအီ အီ တူ နပ် ဇဝ်ဖြာ မင် အီ၊ ဂေ ဟဲ့ ပြာ ဒီ တး လိုပ် ခဲင် ဖိုင် ဘေ။ ဒူအီ ဂေ တီ ဟဲ့ ဝီ ကာဘ့လျီ့ ဒါရာ လွင် ပီ ဂေဇူ ဇဝ်ဖြာ၊ တဲး ဂေ ပွိုန် ဒီ ဒူပ် နဝ်း ကာဝါတ့် ဂေ။ ဂေ မိူဝ် ဝဲန် ဇဝ် ယေဆူ အီ မုး ဒါ ကာညာ အီ အိုပ် အေ၊ အီ မုး မီ အူ ကာဒင် တီ။ ခါ အာတ့် ဟဲ့ လှေန့် ကာဆဝ် ဇဝ်ဖြာ ဟဲ့ ဒွိုမ် ဒဲမ် အုန် ခဲင် ဘပ် အန် လွင် ဒူအီ ဂေ တီ။ အန် ဟဲ့ ဟွတ့် ဒမ် မှာပ် ဂေ၊ တဲး ဂေ ခမ် တူတ့် မှာပ် ဂေ။

5 ဒေါ တီ နီ၊ ဘေ ပီ ဘော ဟဲ့ နပ် လွင် အန် တီ မိူဝ်၊ အုဝ် ဆီ ဒမ် ဆာဒိက် ဒီ ဘေ။ ဇဝ်ဖြာ ဟဲ့ ဟွတ့် ချွတ် လေး ဂေ ဒူအီ အီဆာရေလ ခဲင် မိူင် အဲဂိုပ် တွိုန်။ ဝါယ် အန် တီ ဇဝ်ဖြာ ပီ ဝီ ပျာတ့် ဝဲန် ဂေ ဒူအီ အီ တူ ညှိုမ် အန်။ 6 ဘော ဂေ အာမူ အာမာတ် ဇဝ်ဖြာ အီ တူ ဘူင် ပီ ကာအာပ် ဘူင်၊ အီ ဟဲ့ ဝဲန် ဒူင် ကွယ် ဘြိမ် ဂေ၊ ဂေ လုဝ် ခမ် မှာပ် ဂေ ဆေဆေ။ ဇဝ်ဖြာ ဟဲ့ ပက် ဝန် ဟိန် ဒီ ဂေ၊ ဝီ ခြွင့် ဂေ ခဲင် အပ် ဝွင့်၊ တဲး ဂေ ကွယ် ဒီ တီ၊ တဲး န့ ကော ဇမ် ဆီငဲ ဒီ ဆုင်ဖျာတ် ဇဝ်ဖြာ အာမူ ဂေ။ ဆီငဲ တီ မုး ဆီငဲ တာင် ကာဆဝ်။ 7 တဲး ဘေ လှုဝ်း ဘော မိူင် ဆုဝ်ဒူမ် ဂါယ် မိူင် ဂုဝ်မုဝ်ရာ ဘော မိူင် အီ ကွယ် ကာတတ် မိူင် ဂါယ် တီ။ ဒူအီ အီ ကွယ် ခဲင် မိူင် ဂေ တီ၊ ဂေ ဟဲ့ ဘူင် အီ မွှိုမ် ကာအိး။ ဂေ အီမာယ် ဒုဝ် အီမာယ် ဟဲ့ လာယ် လုတ့် လာယ် လာယ်၊ ဘူင် ဒူပ် နဝ်း ကာဝါတ့် ဂေ။ ဂေ မုး ဒူအီ ဟာယ် အီ လုဝ် ကွယ် ခဲင် ငဝ် အီ ကုး ဆေဆေ။ လွင် အန် တီ န့ ဘဲန် အူဖာမာ ဒီ ဒူအီ ဘောကာဂ့လျီတ်၊ တဲး ဂေ နပ် ဒီ ဆာဒိက်။

8 ပါယ် တီ ဒူအီ ဟာယ် ဂေ တီ၊ ဂေ အီ တူ နပ် ဇဝ်ဖြာ၊ ဂေ ဒူပ် ပီ မ့ဘာဝ် ဂေ။ ဂေ ဝီ ဘူင် အီ ကာဒါတ့် ဒီ ဒုဝ် ဘူင့် ဂေ။ ဂေ ဘော လုက်တာယ် ပွုန် ဂေ ဒါ တာင် ဘော ခဲန့် ဇဝ် အီ မိုဝ်း အာဖုင် ဒင်ခုဝ် တာင်။ 9 န့ ယီ မုး ဒါ ကာညာ အာမူ အာမာတ် ဇဝ်ဖြာ အီ စိူဝ် အာမီခေလဝ်၊ အီ ကွယ် ခဲင် ဂါင်ဟြာဝ်၊ အန် မိူဝ် ညှမ် ဘူင် ပါယ် တီ။ ဒေါ လာယ် ကာအေး ကာထဲန့် အာမီခေလဝ် ဂါယ် ဘုဝ် ကာနမ် ကူပ် ဆီ ပွိုန် ဂါယ် ဒုဝ် ယမ် အာမုဝ်ဆဲ တွိုန်၊ အန် တူ ယ ကာလာင် ဂြုဝ်း အီ ခဲန့် အီ ဖျာက် ဘုဝ် ကာနမ်။ အန် တဝ်း လဲ၊ “တဲး ဇဝ်ဖြာ အေး မဲ။” 10 အီ မုး ဒူအီ ဟာယ် ဂေ တီ၊ ဂေ ယီ နပ် ဒီ ကာလာင် နာ စီစိဝ် လွင် ပီ တူ နပ် ဂေ။ ဂေ ပီ ဒုဝ် ဆတ်၊ အီ တူ နပ် ဒီ ဇေန့်ဇာ မာဆေ။ ဆေ ဂေ ယီ ဒူပ် ဘူင် ပီ နပ် ဂေ ရာင် ဂေ၊ ဘူင် ပီ တူ လုဝ် ကာဖာ ဂေ၊ န့ တဲး ဂေ လိုဝ် စှိုမ်။

11 ဂေ ဒီ ခမ် ဝူတ် ဂေ အာခါခ်ု။ ခုဝ်၊ ပီ ဘူင် ဂေ ဟဲ့ ပီ ပီ ဘူင် အာကန့် တွိုန်။ ကူပ် ဆီ ပွိုန် ဂေ ရွိုန် ခြိဝ်၊ န့ တဲး ဂေ ဘူင် ကာလိုပ် ပီ ပီ ဘူင် အာဘာလာအမ် တွိုန်။ ဂေ ဆီ ဝဲန် ပွုန် အီ အိုပ် ဂေ ပီ ပီ ဒွိုမ် ဘူင် အာခုဝ်ရာ။ ဂေ ဒီ ဘော လိုဝ် စှိုမ် ပီ အန်။

12 ဆေ ဘေ ဘူင် ဘ့လွယ် ဘော ဟူမ် ရိုမ်၊ ဂေ ဒူအီ ဇိုဝ် တီ၊ ဂေ ဒီ တး လိုပ် ဘ့လွယ် ဟူမ် ရိုမ် ဒူပ် ဘေ၊ တူ နပ် ဒီ ဆာယ် အီ။ ဂေ ဘော ပီ န့အု ပီ ဘုတ် ခုန်၊ ယီ တူ မိုဝ်း ဂ့လာယ်။ ဂေ ဘော ပီ ဟေ အီ တူ မိုဝ်း ဘ့လေ အာခြာဝ် ဒီ လုဝ် ဘ့လေ အန်။ ဂေ ဘော ပီ ဟေ အီ ယမ် ကာဟဝ်း အာခြာဝ် ဆောဒါတ်၊ အီ လုဝ် ရိုတ့် ဝဲန် ဘော ရျီး အန်၊ ကွဲ့ တဲး န့ ဆီ မိုဝ်း။ 13 ဂေ ဘော ပီ အိုမ် အီ ဆီလွယ် ကာဆဝ်၊ တဲး န့ မိုဝ်း ပုး အိုမ် ကိူန်။ အီ မွှိုမ် ဆာယ် ဂေ၊ န့ ဒီ ပီ ပုး အိုမ် တီ။ ဂေ ဘော ပီ ဆီမန့် အီ ဟူ ဒူပ် န့တေန့် ဂေ။ ခုဝ်၊ ဇဝ်ဖြာ ဒီ တဲး ဂေ ကွယ် ခဲင် အပ် ဝွင့် အီ လိုက် ကာဆဝ်၊ တဲး ဂေ ကွယ် ဒီ တီ ဆေဆေ။

14 အာဟေန် ဟဲ့ ကာဒုတ် တး ဒီ အာဒါမ် ဒေါ ဟဲ့ နုဝ့် စုဝ် န့ ဘူ။ အန် ဟဲ့ ဒွိုမ် ကာလာင် လွင် ဒူအီ ဂေ တီ။ အန် တဝ်း၊ “ဘ်ု ဘေ ယွတ်၊ ဇဝ်ဖြာ ဒီ ယဲတ့် တး ဒူအီ အီ ဆီငါ ဘွတ် ဘဲန် မှိုန့် ဘဲန် ဆဲန်။ 15 ဂေ ဒီ တး ဆုင်ဖျာတ် အာမူ ဒူအီ ဘောကာဂ့လျီတ်။ ဂေ ဒီ တး ဒမ် မှာပ် ဒီ ဒူအီ အီ တူ နပ် ဇဝ်ဖြာ၊ အီ ဘူင် ပီ တူ အိုင် ဇဝ်ဖြာ။ ဂေ ဒီ ဆုင်ဖျာတ် အာမူ ဒွန် အီ အီ ကာလာင် ဂြုဝ်း ဟာယ် ဂြုဝ်း တူ မွှိုမ် လွင် ဇဝ်ဖြာ ကူပ် တူ နပ် ဂေ ဇဝ်ဖြာ။” 16 ဒူအီ ဂေ တီ၊ ဂေ မုး ဒူအီ ဆီမာ ပိုန့်၊ နပ် ဒီ နဲန အီ၊ ဘော အိုင် ဒီ ဘူင် ဒူပ် နဝ်း ဘြိမ် ဂေ။ ဂေ ဘော ကာလာင် ဂြုဝ်း ပီခိုက် ပီစာ။ ဂေ ဘော နပ် ဒီ ဝွက့်ဝဲန့် ကဝ် အီ ဟဝ်၊ တဲး န့ ဘဲန် အာဂျိုဝ် ဒီ ဒုဝ် ဘြိမ် ဂေ။

17 အိုယ် ဘေ ဒူအီ ပီ ရွက့် အုဝ်၊ တဲး ဘေ လှုဝ်း ဂြုဝ်း ပီ ကာလာင် ဂေ ဒူအီ ပီ ရဝ်း ပီ တိုယ် ဇဝ် ယေဆူ ဆိန့် ဒေါ မွိုန်။ ဂေ ဟဲ့ ဒွိုမ် တဝ်း၊ 18 “ပန် ဒီ တူတ့် ဇာတ် နီ၊ န့ ဒီ မိုဝ်း ဒူအီ အီ ဘူင် နာ တူ မွှိုမ်။ ဂေ တူ ဒူပ် ဇဝ်ဖြာ၊ ဂေ ဒီ ကာညး ဘေ ဘော ဘူင် ဒူပ် နဝ်း ဘြိမ် ဂေ။” 19 ဒူအီ ဂေ တီ၊ ဂေ ဘော နပ် ဒီ ဘူင် တဲး ဘေ လာယ် ကာယဝ်း ဘဲန် ဖိုင် ဘဲန် ဖိုင်။ ဂေ ဘော ဘူင် ဒူပ် မီ နဝ်း ဂေ။ နဝ်း ဖွိုမ် ဇဝ်ဖြာ ယီ တူ ကွယ် ခဲင် နဝ်း ဂေ။

20 ဘေ ဒူအီ ပီ ရွက့် အုဝ်၊ တဲး နဝ်း ဘေ ကြဲ ဒီ မန် ဆီချာ၊ တဲး ဘေ ညှိုမ် ဆီချာ အီ ဟဲ့ ဘွတ် လွှိုမ် ဒွန် မျုဝ် တွိုန်။ တဲး ဘေ ဆာခိုဝ် ဒူပ် ပီ ဘျ နဝ်း ဖွိုမ် ဇဝ်ဖြာ ဒီ ဘေ။ 21 ဒေါ နှဝ့် ဘေ ဇဝ် ယေဆူ ဒီ ဝီ တး၊ တဲး ဘေ ကာဒိုက် ကာဒဝ့် ဒီ ဇဝ်ဖြာ အီ ဟဲ့ ရွက့် ကာဝေ ဘေ။ တဲး ဘေ နှဝ့် ဇဝ် ယေဆူ၊ အီ ဒီ ဒွါ အာဆာက် ကာမာယ် ဒီ ဘေ၊ တဲး ဘေ ကွယ် ရိုမ် ဒူပ် အန် ဆေဆေ။ 22 ဆေ န့ မိုဝ်း ဒူအီ အီ မိုဝ်း နဝ်း ကာလိင် ကာလဲ၊ တဲး ဘေ ဂေဇူ ဂေ။ 23 တဲး ဘေ စွယ် အီ တဲး န့ ချွတ် ဂေ၊ တဲး န့ ပီ ဘေ ဒိူတ် လေး ဂေ ခဲင် ငဝ်။ တဲး ဘေ ဂေဇူ အီ ဘော ရုဝ်ဆေ ဇဝ်ဖြာ။ မာလဲ၊ တဲး ဘေ ကာအိး မှာပ် အီ ဒူပ် နဝ်း ဘြိမ် အီ ပီ ခြိုင် ဘြိမ် အီ မွှိုမ် ကာအိး။

24 ဇဝ်ဖြာ ယီ နပ် ဒီ ဘ်ု ရိတ် ဘေ၊ ကွဲ့ တဲး ဘေ ကာလိုပ် ဒီ ဘူင် မှာပ်။ အန် ဘော နပ် ဒီ ဘျွင် နဝ်း ဘေ၊ ကွဲ့ တဲး န့ ဆီ မိုဝ်း အီ တူ မွှိုမ် မာဆေ၊ တဲး နဝ်း ဘေ ဒါခိုယ် ကာဆဝ်။ ဟဲ့ ဟွတ့်၊ အန် ဒီ တဲး ဘေ ကွယ် ဒီ အာတ့် အန် ဇဝ် အီ မိုဝ်း အာဖုင် ဒင်ခုဝ် တာင် ကာဆဝ်။

25 န့ မိုဝ်း မီ ဇဝ်ဖြာ အူ ကာဒင်၊ အန် ဟဲ့ ချွတ် အေ။ ကူပ် ညှိုမ် အေ ဇဝ် ယေဆူ အီ မုး ဒါ ကာညာ အီ အိုပ် အေ၊ တဲး အေ အိူပ် မျုက် ဇဝ်ဖြာ တီ၊ တဲး အန် မိုဝ်း အာဖုင် ဒင်ခုဝ်၊ မိုဝ်း ဆာရေ ဆေဆေ။ အန် ဇဝ် ဟဲ့ မိုဝ်း ပွုန် တာင် အီ အိုပ် တူတ့် ဒွန် မျုဝ် ဆိန့် ဒေါ မွိုန် ကော ဇမ် ဒေါ တီ နီ။ အန် ဒီ ဘော အိုပ် ပါယ် တီ ဟာဝ် နာ အာတ့် ဒွန် စုဝ် ဒွန် ဇာတ်။ ဆာတူ။