ဘပ် နီ မုး ဘပ် လွင် ဘဲန် မျုဝ် ဘဲန် မျုဝ် ပီ ဘျ ဇဝ် ယေဆူ ဒီ အာယောဟာန်။ ဇဝ်ဖြာ ဟဲ့ ဒွိုမ် ဘျ လွင် အန် တီ ဒီ ဇဝ် ယေဆူ၊ တဲး ဂေ ဒဲစေန့် အန် နပ် အီ ဒီ စေဝ် ဘဲန်။ ဇဝ် ယေဆူ ဟဲ့ စ်ု အာမူ အာမာတ် အန် ဟာဝ် ဒီ အာယောဟာန် အီ မုး ဒဲစေန့် ဇဝ် ယေဆူ၊ တဲး အန် ဘျ တူတ့် ဒွန် မျုဝ် ဒီ အာယောဟာန် တွိုန်။ 2 အာယောဟာန် မိူဝ်၊ ဟဲ့ ဝီ ဒဲမ် အုန် ပဲ့ ဟဲ့ ယိုဝ် အန် ဒွန် မျုဝ် အီ မုး ဂြုဝ်း ဇဝ်ဖြာ ဘော ပီ ဘျ ဇဝ် ယေဆူ။ 3 အာဆေ တိး ပဲ့ နီ တဲး အီ ထူမ်၊ အန် ဒီ ဘျုဝ် ဒါခိုယ်။ ဘော ဂေ အီ ထူမ် ဂြုဝ်း နီ ဘော ဘူင် ဒူပ် ပီ ဒဲမ် အုန် ခဲင် ဘပ် နီ၊ ဂေ ဒီ ဘျုဝ် ဒါခိုယ်။ ခုဝ်၊ အာခြာဝ် အန် ဟဲ့ ကာတတ် ဒီ ဇမ်။

4-6 အုဝ် အာယောဟာန် ဟဲ့ ဒဲမ် ပဲ့ ဖိူန် ဂေ နီ တိုယ် ဒီ ဘေ ဒူအီ ခဲင် ဖိုင် ဇဝ် ယေဆူ အီ ကွယ် ဘူ ပ့လုဝ့် ခဲင် အိူင် အာဆီယာ။ တဲး ဇဝ်ဖြာ ဘော နဝ်း ဖွိုမ် ဇဝ်ဖြာ ဘော ဇဝ် ယေဆူ ဂေဇူ ဘေ ဘော ဒွါ နဝ်း ဂျီတ် ဒီ ဘေ။ ဇဝ်ဖြာ ဟဲ့ ဒွိုမ် ကွယ် ဆိန့် ဒေါ မွိုန် ကော ဇမ် ဒေါ တီ နီ။ အန် ဒီ ကွယ် ဆေဆေ ဘော နာ အာတ့် နီ ဟာဝ်။ နဝ်း ဖွိုမ် ဇဝ်ဖြာ ဘော ပီ ဝီညာန် ဘွတ် ဘူ ကာဒင် အီ ကွယ် ခူပ် မာလာင် ဇဝ်ဖြာ။ ဇဝ် ယေဆူ အီ ဟဲ့ ကာလာင် နာ မုး နာ မှာန် လွင် ဇဝ်ဖြာ၊ အန် ဘော မုး ဝီ အာတ့်၊ အီ ဟဲ့ ဝီ ယိတ့် ဝီ အိမ် ဝါယ် ဟဲ့ ဟွတ့် ယမ် အန်။ အန် ဘော မိုဝ်း ပွုန် အီ တာင် လွှိုမ် ပွုန် ခုန်ဒီခမ် ဒွန် ကာဒင် အီ အိုပ် ကာဒါယ် နီ။ ဇဝ် ယေဆူ တီ ဟဲ့ ရွက့် ကာဆဝ် အေ။ အန် ဟဲ့ ဂဝ်း ဝဲန် မှာပ် အေ ဒေါ ခမ် အန် ဒီ ယမ် ကာဒါင် အေ။ အန် ဟဲ့ တဲး အေ လိုပ် ခဲင် မိူင် ပီ အိုပ် ဇဝ်ဖြာ အီ မုး ဂုန့် ဇဝ် ယေဆူ။ အန် မိူဝ် ဟဲ့ တဲး အေ မိုဝ်း ပွုန် ပီ ခုန်ဒီခမ် ဘော တဲး အေ ဘဲန် ပီ ဒူအီ အီ လှူ ဒီ ဇဝ်ဖြာ ဒါင် အီ၊ တဲး ဇဝ် ယေဆူ တီ မိုဝ်း အာဖုင် ဒင်ခုဝ် ဆေဆေ။ တဲး အန် ဘော အိုပ် တူတ့် ဒွန် မျုဝ် ဒွန် စုဝ် ဒွန် ဘာန်။ ဆာတူ။

7 ဘ်ု ဘေ ယွတ်၊ အန် ဇဝ် ဒီ ပဝ့် န့အု တး။ ဒူအီ ဒွန် အီ ဘော ဂေ အီ ဟဲ့ ဆတ် အန်၊ ဂေ ဒီ ဝီ ယိုဝ် အန်။ ဂေ ဒူအီ ဒွန် မျုဝ် အီ ကွယ် ဒဲင် ကာဒါယ်၊ ဂေ ဒီ ဘော ယာမ် ဘော ငှဝ် ကူပ် အန် ဇဝ်။ န့ ဒီ ဘဲန် မှာန် ပါယ် တီ အာခါခ်ု။

8 ဇဝ်ဖြာ တဝ်း၊ “အုဝ် မုး အီ ကာစုး တူတ့် ဒွန် မျုဝ်။ အုဝ် ဒီ ဘော ဘူင် တဲး န့ ကော ဟွတ့်။^a အုဝ် ဟဲ့ ကွယ် ဆိန့် ဒေါ ဂုဝ် အန် ကော ဇမ် ဒေါ တီ နီ။ အုဝ် ဒီ ကွယ် ဆေဆေ ဘော နာ အာတ့် ဟာဝ်။ အုဝ် မိူဝ် အိုပ် တူတ့် ဒွန် မျုဝ်။”

9 အုဝ် အာယောဟာန် အီ မုး အီကတ် ဘေ၊ အုဝ် ဘော မုး ဒီဘဲ ဇဝ် ယေဆူ အူ ဝီ။ အုဝ် မိူဝ် ဟဲ့ ခမ် ဒုက် ခမ် ညှာပ်၊ ခမ် ဒီ အူတ် ဒီ ယိူန် ဒူပ် ဘေ။ အုဝ် ဒီ ဘော ကွယ် ခဲင် မိူင် ပီ အိုပ် ဇဝ်ဖြာ ပီ ဘေ။ အုဝ် ဟဲ့ ကွယ် ဒီ ဂုန် အိုမ် အီ စိူဝ် ဘာမူ ကူပ် ကာလာင် အုဝ် လွင် ဂြုဝ်း ဇဝ်ဖြာ ဘော လွင် ဇဝ် ယေဆူ။ 10 အူ ဆီငဲ ဒေါ မုး ဆီငဲ ဒီလှဝ်၊ နဝ်း ဖွိုမ် ဇဝ်ဖြာ ဟဲ့ ပ့လိုက် အုဝ်။ အုဝ် ဘော ယိုဝ် ဟမ် တာင် တး နာ ပန် အုဝ်။ န့ ဘော ပီ ဟမ် ဝဝ် နိုင် မာပဲ။ 11 ဟမ် တီ န့ ဘော လေး ဂြုဝ်း တဝ်း၊ “ခဲ့ ပီ ယိုဝ် မဲ တီ၊ တဲး မဲ ဒဲမ် အုန် ခဲင် ပဲ့၊ ဝီ တိုယ် ဟာဝ် ဒီ ဂေ ဒူအီ ခဲင် ဖိုင် ဇဝ် ယေဆူ အီ ကွယ် ခဲင် မိူင် ဘူ မိူင်။ မိူင် တီ ဘော မုး မိူင် အဲဖဲ၊ မိူင် ဆာမူနာ၊ မိူင် ဘေန်ရာဂမ်၊ မိူင် ထီအာထီရာ၊ မိူင် ဆာတီ၊ မိူင် ဖီလဒေဖီ၊ ဘော မိူင် လောဒီကီ။”

12 ဟဲ့ ဟွတ့် ကာလာင် ဂြုဝ်း တီ၊ အုဝ် ဘော ဝီ ယွတ် နာ ပန်၊ အာဆေ န့ မုး၊ အီ ကာလာင် ဂြုဝ်း ဒီ အုဝ် တီ။ အုဝ် ဘော ဝီ ယိုဝ် ငဝ် အွမ် ခြိဝ် ဘူ ဘူင့်။ 13 ဒီ ကာတဲ ငဝ် အွမ် တီ၊ န့ ဝီ မိုဝ်း အူ ဝီ။ အာရိုပ် အန် ပီ ဂွန် ဒူအီ။ အန် စှိုပ် ခြိုင် အီ ဇမ် ပ့လဝ် အန်၊ ပီ ဝီ မိုဝ်း ဘိက် ခြိဝ် ဝါယ် လဲင် ဒီ ဘာင်နဝ်း အန်။ 14 ဟိုက် ဂိန့် အန် မိူဝ် လုယ် ပီ ဟိုက် မာဘူ ဂေ ဘျြီ။ ငါယ် အန် မိူဝ် ဘ့လာင် ပီ ပ့လဲ့ ငဝ်။ 15 ပ့လဝ် အန် မိူဝ် ကာလ ပီ ဘွင့် ဒေန့် အီ ဇဲတ် ပီ ဒုဝ့် အီ ခဲင် ငဝ်။ ဂြုဝ်း အန် မိူဝ် တာင် ပီ ဟမ် အိုမ် ဒီစှာ။ 16 ခဲင် ဒဲ အန် ဘ့လာက် အာအး၊ အန် ဂူင့် ဆီမန့် ဘူ ဘူင့်။ ဘော မာပွါ့ လာင် အီ လမ် ကာဆဝ်၊ အီ မိုဝ်း ဘ့လာ အာ ဘ့လာက် ဘော လေး ခဲင် မူတ့် အန်။ နာ အန် မိူဝ် ဘ့လာင် ပီ ဘ့လာင် ဆီငဲ ဒေါ ကာတဲ ဆီငဲ။

17 ဒေါ ယိုဝ် အုဝ် ဒီ အန်၊ အုဝ် ဘော ကေး ဂိုပ် ဒီ ပ့လဝ် အန် ပီ ဒူအီ ယမ်။ အန် ဘော ဒိုဝ်း ဒဲ အန် ဘ့လာက် အာအး ဒါင် ဒဲင် ဒုဝ် အုဝ် တဝ်း၊ “မဲ ကွဲ့ ယုဝ်၊ အုဝ် မုး အီ ကာစုး တူတ့် ဒွန် မျုဝ်၊ အုဝ် ဒီ ဘော ဘူင် တဲး န့ ကော ဟွတ့်။ 18 အုဝ် မုး အီ အိမ်။ အုဝ် ဟဲ့ ဟွတ့် ယမ်၊ အုဝ် ယီ ဟဲ့ ဝီ အိမ်။ အုဝ် အီ ကွယ် ဆေဆေ ဒွန် စုဝ် ဒွန် ဘာန်။ အုဝ် အီ အိုပ် ပွုန် အီ တဲး အီ ယမ်။ အုဝ် အိုပ် ဘော မိူင် မာရာန။

19 ခုဝ်၊ တဲး မဲ ဒဲမ် အုန် ခဲ့ ပီ ယိုဝ် မဲ လွင် အီ ဟဲ့ ဘဲန် ဒေါ တီ နီ၊ ဘော လွင် အီ ဒီ ဘဲန် ဝါယ် နီ။ 20 အုဝ် ဘော တဝ်း ဒီ မဲ လွင် ပီ ယိုဝ် မဲ ခဲင် ဒဲ အုဝ် ဘ့လာက် အာအး၊ ဘော လွင် ငဝ် အွမ် ဘူ ဘူင့် ဂေ ဆီမန့် ဘူ ဘူင့် တွိုန်။ ဆီဖဝ် အန် န့ ပါယ် နီ။ ဆီမန့် ဘူ ဘူင့် ဂေ ပီ အာမူ အာမာတ် ဇဝ်ဖြာ ဘူ ကာဒင် အီ ယွတ် မဲန် ဒူအီ ခဲင် ဖိုင် ဇဝ် ယေဆူ ဘူ ပ့လုဝ့် တွိုန်။ ဖိုင် ဇဝ် ယေဆူ အီ ကွယ် ဘူ ပ့လုဝ့် တီ၊ ဂေ ပီ ငဝ် အွမ် ခြိဝ် ဘူ ဘူင့် တွိုန်။”