1 အန် ဇဝ် ဝီ တဝ်း၊ “တဲး မဲ ဒဲမ် အုန် ဂြုဝ်း နီ၊ ဝီ တိုယ် ဟာဝ် ဒီ အာမူ အာမာတ် ဇဝ်ဖြာ အီ လိုမ်လာ ဂေ ခဲင် ဖိုင် ဇဝ် ယေဆူ အီ ကွယ် ခဲင် မိူင် အဲဖဲ။ တဲး မဲ ဒဲမ်၊ ‘ဂြုဝ်း နီ မုး ဂြုဝ်း အန် ဇဝ် အီ ဂူင့် ဆီမန့် ဘူ ဘူင့်။ အန် မိူဝ် ဟာဝ် ဝိဝ် ဟာဝ် ဝေန့် ဒီ ကာတဲ ငဝ် အွမ် ခြိဝ် ဘူ ဘူင့်။ 2 အုဝ် ဟဲ့ ဟွတ့် နပ် လွင် ပဲ့ ဟဲ့ ဘူင် ဘေ။ ဘေ ဟဲ့ ဘူင် ဂါန် အီ ညှာပ် ကာဆဝ် ဘော ခမ် ဒီ အူတ် ဒီ ယိူန် ဘဲန် မျုဝ် ဘဲန် မျုဝ်။ အုဝ် ဟဲ့ နပ် ဘော လွင် ဘေ တူ ခမ် ဒူအီ တူ မွှိုမ်၊ ဘော လွင် ဘေ ဟဲ့ ယွတ် ဆီချာ အီ တဝ်း ဂေ မုး ဒူအီ ပီ ရဝ်း ပီ တိုယ် ဇဝ် ယေဆူ။ ဂေ ယီ တူ မုး။ ဘေ မိူဝ် ဟဲ့ နပ်၊ ဂေ ကာလုဝ်။ 3 ဘေ မိူဝ် ဟဲ့ ခမ် ဒုက် ခမ် ညှာပ်၊ ခမ် ဒီ ယိူန် လှေန့် ကူပ် ညှိုမ် ဘေ ဒီ အုဝ်။ ဘေ မိူဝ် တူ တဲး နဝ်း ဘေ ဒီလှး။

4 မာလဲ၊ အုဝ် မိုဝ်း ပီ ဒီ နဲ ဘေ။ ဒေါ တီ နီ၊ ဘေ ဟူ ရွက့် အုဝ် ပီ ဒေါ ရွက့် ဘေ ဒီ အုဝ် ခါ အာတ့် ဒေါ ကာစုး ဘေ ဒီ ညှိုမ်။ 5 တဲး ဘေ ဝီ ကာဒွါ့ ကာဖာ လွင် နဝ်း ရွက့် ဘေ ဟဲ့ ယူမ် ခဲ့ မှဝ်။ တဲး ဘေ ဝီ လှုဝ်း ဘော ဝဲန် မှာပ် ဘေ၊ ဝီ ဘူင် ခဲ့ ပီ ဒွိုမ် ဘူင် ဘေ အာတ့် နီ။ ဆေ အာဝ် ပါယ် တီ၊ အုဝ် ဒီ တး ခြန် ခြန် ဒူင် ကွယ် ဘေ ဘော ဒိုဝ်း ဝဲန် ဒင် ငဝ် အွမ် ဘေ။ 6 ပီ ဘော ဟဲ့ ပါယ် တီ မိူဝ်၊ ဟဲ့ မိုဝ်း ပေါ အူ မျုဝ် အီ ဟဲ့ လဝ့် နဝ်း အုဝ်။ ပီ ဘူင် ဂေ ဒီဘဲ အာနီကောလာ တွိုန် အီ မုး ပီ ဇွင့် အုဝ်၊ ဘော ဘေ ဟဲ့ ဇွင့်။

7 ပါယ် တီ၊ ဆေ ဘေ မိုဝ်း ဟျုဝ့် အီ နပ် ဒီ ထူမ်၊ တဲး ဘေ ထူမ် ပီ ကာလာင် နဝ်း ဖွိုမ် ဇဝ်ဖြာ ဒီ ဂေ အီ ကွယ် ခဲင် ဖိုင် ဇဝ် ယေဆူ။ ဆေ န့ ယီ မိုဝ်း ဒူအီ အီ အွင် တူတ့် ဒွန် မျုဝ်၊ အုဝ် ဒီ တဲး အန် ဟူမ် ဘ့လေ ဒီ ဟေ အီ ဒွါ အာဆာက် ဒီ အီ။ ဟေ တီ ဟဲ့ ကွယ် ခဲင် မိူင် ဒါခိုယ်၊ မိူင် ဂျာမ်ဆာ အီ မုး မိူင် ဇဝ်ဖြာ။’”

8 အန် ဇဝ် ဝီ တဝ်း၊ “တဲး မဲ ဒဲမ် အုန် ဂြုဝ်း နီ၊ ဝီ တိုယ် ဟာဝ် ဒီ အာမူ အာမာတ် ဇဝ်ဖြာ အီ လိုမ်လာ ဂေ ခဲင် ဖိုင် ဇဝ် ယေဆူ အီ ကွယ် ခဲင် မိူင် ဆာမူနာ။ တဲး မဲ ဒဲမ်၊ ‘ဂြုဝ်း နီ မုး ဂြုဝ်း အန် ဇဝ် အီ ကာစုး တူတ့် ဒွန် မျုဝ် ဘော ဘူင် တဲး န့ ဟွတ့်။ န့ ဘော မုး ဂြုဝ်း အန် ဇဝ် အီ ဟဲ့ ဝီ ယိတ့် ဝီ အိမ်။ 9 အုဝ် ဟဲ့ နပ် ခဲ့ ဟဲ့ ဒုက် ဟဲ့ ညှာပ် ကာဆဝ် ဘေ။ ဘေ ပီ ဘော ဟဲ့ ဂိန် ကာဆဝ် မိူဝ်၊ ဘေ ယီ ပီ ဒူအီ ခြမ်။ အုဝ် ဟဲ့ နပ် ဘော လွင် ဂေ အီ ဖျာက် ဘေ၊ ဂေ အီ ညိုင်ရာင် တဝ်း ဂေ မုး ဒူအီ အာယူဒါ၊ ဂေ ယီ တူ မုး။ ဂေ ဟဲ့ တး ခဲင် ဇူင် ဘုဝ် ကာနမ် ဝီ လုက်တာယ် ဘေ။ 10 ကွဲ့ တဲး ဘေ ယုဝ် ခေါ အူ မျုဝ် ဒုက် ပီ လုဝ် ခမ် ဘေ။ အုဝ် ကာလာင် ဒီ ဘေ၊ ဘုဝ် ကာနမ် ဟဲ့ ခြာမ် ဒီ ဒိုဝ်း ဒူအီ ဘေ မင် အီ၊ ခြွင့် ခဲင် ကာပိုမ်၊ တဲး အန် ပွိုန် ဒီ ဇဲတ် ဒီ ယွတ် ဘေ။ ဘေ ဒီ လုဝ် ခမ် ဒုက် ဇိုဝ် တီ၊ တဲး န့ ကော နုဝ့် ဂိုဝ် ဆီငဲ။ ဘေ ပီ ဘော လုဝ် ယမ် မိူဝ်၊ တဲး ဘေ ဒူပ် ဆီချာ အုဝ်။ ဆေ ဘေ ဘူင် ပါယ် တီ၊ အုဝ် ဒီ ဒွါ အာဆာက် ဒီ ဘေ အီ ပီ မင်ဂိုမ်။

11 ပါယ် တီ၊ ဆေ ဘေ မိုဝ်း ဟျုဝ့် အီ နပ် ဒီ ထူမ်၊ တဲး ဘေ ထူမ် ပီ ကာလာင် နဝ်း ဖွိုမ် ဇဝ်ဖြာ ဒီ ဂေ ဒူအီ ခဲင် ဖိုင် ဇဝ် ယေဆူ။ ဆေ န့ ယီ မိုဝ်း ဒူအီ အီ အွင် တူတ့် ဒွန် မျုဝ်၊ အန် တူ လုဝ် ယမ် ပေါ အူ ဇေန့်။’”

12 အန် ဇဝ် ဝီ တဝ်း၊ “တဲး မဲ ဒဲမ် အုန် ဂြုဝ်း နီ၊ ဝီ တိုယ် ဟာဝ် ဒီ ဂေ အာမူ အာမာတ် ဇဝ်ဖြာ အီ လိုမ်လာ ဂေ ခဲင် ဖိုင် ဇဝ် ယေဆူ အီ ကွယ် ခဲင် မိူင် ဘေန်ရာဂမ်။ တဲး မဲ ဒဲမ်၊ ‘ဂြုဝ်း နီ မုး ဂြုဝ်း အန် ဇဝ် အီ ဂူင့် မာပွါ့ လာင် အီ လမ် ကာဆဝ် အီ မိုဝ်း ဘ့လာ အာ ဘ့လာက် တွိုန်။ 13 အုဝ် ဟဲ့ နပ် ဒူင် ကွယ် ဘေ၊ န့ မုး ဒူင် ကွယ် မာလာင် ဘုဝ် ကာနမ်။ ဘေ ယီ မိုဝ်း နဝ်း ဆိူဝ်၊ နဝ်း အီ ညှိုမ် ဆီချာ အုဝ်။ ဘေ မိူဝ် တူ ဝဲန် နဝ်း ညှိုမ် ဘေ ဒီ အုဝ် ဒေါ ကွယ် အာတီပါ အီ ဟဲ့ ကာလာင် လွင် အုဝ် ဆေဆေ။ ဂေ ယီ ဟဲ့ ငဝ်း ယမ် အန် ခဲင် မိူင် ဘေ အီ မုး ဒူင် ကွယ် ဘုဝ် ကာနမ် တီ။

14 မာလဲ၊ အုဝ် မိုဝ်း ပီ ဒီ နဲ ဘေ မင် မျုဝ်။ ကာတဲ ဘေ န့ မိုဝ်း မင် အီ၊ ဂေ ဟဲ့ ဝီ ထူမ် ဒူပ် ဂြုဝ်း အာဘာလာအမ်။ အန် ဟဲ့ ဒွိုမ် ဒွါ အာကျာမ် အာငျာန် ဒီ ခုန်ဒီခမ် အာဘာလာက်၊ တဲး ဂေ ကာဆုး ဒူအီ အီဆာရေလ ဘူင် မှာပ်၊ တဲး ဂေ ဟူမ် ဘော ပီ လှူ အီ ဒီ အာရိုပ် ရာင်၊ တဲး ဂေ ဘူင် အီ မွှိုမ် ကာအိး၊ လာယ် လုတ့် လာယ် လာယ်။ 15 ပါယ် တီ၊ ကာတဲ ဘေ န့ ဘော မိုဝ်း မင် အီ အီ ဟဲ့ ဝီ ထူမ် ပီ မာနုဝ် ဒီဘဲ အာနီကောလာ တွိုန်။ 16 ခုဝ် အန် တီ တဲး ဘေ ဝီ လှုဝ်း ဘော ဝဲန် မှာပ် ဘေ။ ဆေ အာဝ် ပါယ် တီ၊ အုဝ် ဒီ တး ခြန် ခြန် ဒူင် ကွယ် ဘေ။ အုဝ် ဒီ ဂူင့် မာပွါ့ လာင် အီ လေး ခဲင် မူတ့် အုဝ် တွိုန်၊ ကာဂုဝ်း ဒီ ဂေ ဒူအီ ဇိုဝ် တီ။

17 ပါယ် တီ၊ ဆေ ဘေ မိုဝ်း ဟျုဝ့် အီ နပ် ဒီ ထူမ်၊ တဲး ဘေ ထူမ် ပီ ကာလာင် နဝ်း ဖွိုမ် ဇဝ်ဖြာ ဒီ ဂေ ဒူအီ ခဲင် ဖိုင် ဇဝ် ယေဆူ။ ဆေ န့ ယီ မိုဝ်း ဒူအီ အီ အွင် တူတ့် ဒွန် မျုဝ်၊ အုဝ် ဒီ ဒွါ အန် ဟူမ် ခါမုန် မာနာ ပဲ့ ဟဲ့ ချြီင် အုန် အီ။ အုဝ် ဒီ ဒွါ ဘော မာဝ် လုယ် အူ ဘူင့် ဒီ အန်။ ဒဲင် မာဝ် တီ၊ ဟဲ့ ဒဲမ် စိူဝ် ကာမာယ်။ စိူဝ် တီ၊ အာဝ် မိုဝ်း အာဆေ နပ်။ မိုဝ်း မီ ဝီ အီ မိုဝ်း မာဝ် တီ အီ နပ်။’”

18 အန် ဇဝ် ဝီ တဝ်း၊ “တဲး မဲ ဒဲမ် အုန် ဂြုဝ်း နီ၊ ဝီ တိုယ် ဟာဝ် ဒီ အာမူ အာမာတ် ဇဝ်ဖြာ အီ လိုမ်လာ ဂေ ခဲင် ဖိုင် ဇဝ် ယေဆူ အီ ကွယ် ခဲင် မိူင် ထီအာထီရာ။ တဲး မဲ ဒဲမ်၊ ‘ဂြုဝ်း နီ မုး ဂြုဝ်း ဂွန် ဇဝ်ဖြာ အီ မိုဝ်း ငါယ် အီ ဘ့လာင် ပီ ပ့လဲ့ ငဝ် ဘော ပ့လဝ် အီ ကာလ ပီ ဘွင့် ဒေန့် တွိုန်။ 19 အုဝ် ဟဲ့ နပ် ပီ ဘူင် ပီ ပါယ် ဘေ။ အုဝ် ဟဲ့ နပ်၊ ဘေ ဟဲ့ ရွက့်၊ ဟဲ့ ညှိုမ် ဆီချာ ဇဝ်ဖြာ။ ဘေ မိူဝ် ဟဲ့ လာယ် စွယ် ဘော ဟဲ့ ခမ် ဒီ အူတ်၊ ခမ် ဒီ ယိူန်။ အုဝ် ဟဲ့ နပ် ပီ ဘူင် ဘေ ဒေါ တီ နီ၊ န့ ဟဲ့ ကိူန် လွှိုမ် ပီ ဘူင် ဘေ အာတ့် နီ။

20 မာလဲ၊ အုဝ် မိုဝ်း ပီ ဒီ နဲ ဘေ မင် မျုဝ်။ ဘေ ဟဲ့ ဝီ ထူမ် ဂြုဝ်း အီဘိုန့် အီ စိူဝ် နာင် ယေစာဘေန် အီ တဝ်း၊ အန် မုး ဒူအီ အီ ဘျာန် ဂြုဝ်း ဇဝ်ဖြာ။ ဘေ ယီ တူ ခြဲ အန်။ ပီ မာနုဝ် အန် ဟဲ့ ကာဆုး ဂေ ဒဲစေန့် အုဝ်၊ တဲး ဂေ ဒူပ် နဝ်း ကာဝါတ့် ဂေ၊ ဘူင် အီ မွှိုမ် ကာအိး။ န့ ဘော ကာဆုး ဂေ ဟူမ် ပီ လှူ အီ ဒီ အာရိုပ် ရာင်။ 21 အုဝ် ဟဲ့ ဒွါ တဲး အန် ပွိုန် ဒီ လှုဝ်း မှာပ် အန်၊ တဲး အန် ဝဲန် နဝ်း ကာဝါတ့် တီ။ အန် ယီ တူ ဆီ ဝဲန်။ 22 ခုဝ် အန် တီ အုဝ် ဒီ ဘ့လေး အန် ဒဲင် ကာစှူင့် အိတ် အန်၊ တဲး ဘော အန် ဘော ဂေ အီ ဟဲ့ လာယ် လုတ့် လာယ် လာယ် ဒီ အန် ဝီ ခမ် ဒုက် အီ မွှိုမ် ယုဝ် ကာဆဝ် ကူပ် တူ လှုဝ်း ဂေ မှာပ် ပဲ့ ဟဲ့ ကာလိုပ် ဂေ။ 23 ခဲ့ ကွယ် ဂွန် အန် ဒွန် အီ၊ အုဝ် ဒီ တဲး ဂေ ယမ် တူတ့်။ ဆေ ဟီ ဘူင် ပါယ် တီ၊ ဂေ ဒူအီ ခဲင် ဖိုင် ဇဝ် ယေဆူ၊ ဂေ ဘောကာဂ့လျီတ် ဒီ နပ်၊ ဟဲ့ မုး အုဝ် အီ နပ် ခဲ့ ကွယ် ခဲင် နဝ်း ခဲင် ဖွိုမ်၊ ခဲင် ကာဒူမ် ကာဆျီ့ ဒူအီ ဒွန် အီ။ အုဝ် ဒီ ဝီ ဘူင် ဝျီ့ ခဲ့ ပီ ဘူင် ဂေ ဝီ မှဝ် ဝီ အန်။ 24 မာလဲ၊ အုဝ် ဒီ ကာလာင် ဒီ ဘေ အီ ဆီ ဂိတ် ဆီ ကွယ် ခဲင် မိူင် ထီအာထီရာ၊ ဘေ အီ တူ ထူမ် တူ ဒူပ် ပီ မာနုဝ် နာင် ယေစာဘေန် တီ၊ ဘေ အီ တူ ဟေန် ပီ တဝ်း အီ ဟဝ်၊ န့ မုး ဂြုဝ်း ကာနမ် အီ လိုက် ကာဆဝ်။ အုဝ် ကာလာင် ဒီ ဘေ၊ အုဝ် တူ ဆီ စ်ု ဘေ ဘူင် အီ ဝဲ ညှာပ် ကာပွါ ဒီ ဘေ။ 25 တဲး ဘေ ယီ ညှိုမ် ဟာဝ် ခဲ့ ပီ ညှိုမ် ဘေ ဒေါ တီ နီ၊ တဲး ကော ဇမ် ပန် ဒီ ဝီ တး အုဝ်။

26 ဆေ န့ ယီ မိုဝ်း ဒူအီ အီ အွင် တူတ့် ဒွန် မျုဝ်၊ အီ ဘူင် ဒူပ် ပီ အိုင် အုဝ် ကော ဇမ် ကာဒဲ့၊ အုဝ် ဒီ ဒွါ ပွုန် ဒီ အန်၊ တဲး အန် ပွိုန် ဒီ အိုပ် ဂေ ဒူအီ အာမျုဝ် ဟဝ်။ 27-28 အုဝ် ဒီ ဒွါ ပွုန် ဒီ အန်၊ တဲး အန် အိုပ် ဒူအီ ဒွန် မျုဝ်။ တဲး ဂေ ကာဒုး ဒီ ထူမ် အန်၊ တဲး န့ ပီ အန် ဂူင့် လျီး ဟိန်။ အန် ဒီ ဘော အိုပ် ပျာတ့် ဂေ အီ တူ ထူမ်၊ တဲး န့ ကော ပီ အီ မး ကာလာတ့် ကာလုဝ့် ကာဒါယ်။ အုဝ် ဒီ ဘော အာပ် မာလာင် ညှာ ဒီ အန် ကူပ် ဟဲ့ အွင် အန်။ 29 ပါယ် တီ၊ ဆေ ဘေ မိုဝ်း ဟျုဝ့် အီ နပ် ဒီ ထူမ်၊ တဲး ဘေ ထူမ် ပီ ကာလာင် နဝ်း ဖွိုမ် ဇဝ်ဖြာ ဒီ ဂေ ဒူအီ ခဲင် ဖိုင် ဇဝ် ယေဆူ ဘောကာဂ့လျီတ်။’”