1 အန် ဇဝ် ဝီ တဝ်း၊ “တဲး မဲ ဝီ ဒဲမ် အုန် ဂြုဝ်း နီ၊ ဝီ တိုယ် ဟာဝ် ဒီ အာမူ အာမာတ် ဇဝ်ဖြာ အီ လိုမ်လာ ဂေ ခဲင် ဖိုင် ဇဝ် ယေဆူ အီ ကွယ် ခဲင် မိူင် ဆာတီ။ တဲး မဲ ဒဲမ်၊ ‘ဂြုဝ်း နီ မုး ဂြုဝ်း အန် ဇဝ် အီ မိုဝ်း နဝ်း ဖွိုမ် ဇဝ်ဖြာ အီ ပီ ဝီညာန် ဘူ ကာဒင်။ အန် ဇဝ် တီ မိုဝ်း ဘော ဆီမန့် ဘူ ဘူင့်။ အုဝ် ဟဲ့ နပ် ပီ ဘူင် ဘေ။ အီ ဟဝ် ပီ ဘော တဝ်း ဘေ မိုဝ်း အာဆာက် ကာမာယ် မိူဝ်၊ နဝ်း ဖွိုမ် ဘေ ယီ ဟဲ့ ဟွတ့် ယမ်။ 2 တဲး ဘေ ဘျွင် နဝ်း၊ တဲး န့ ပီ ဘေ ဟဲ့ ဝီ န့ဆိုဝ်း။ အုဝ် ဟဲ့ ယိုဝ် ပီ ဘူင် ဘေ၊ န့ တူ ဇေ့ဇုင် ဒီ အာတ့် ဇဝ်ဖြာ။ န့ မိုဝ်း မင် အီ၊ ဂေ ဟဲ့ ပီ ဒူအီ အီ ရိန် ဒီ ယမ်၊ ဂေ ယီ ညှမ် ယမ်။ တဲး ဘေ စွယ် ဒူအီ ဂေ တီ၊ တဲး ဂေ ဝီ မိုဝ်း ပ့လူမ်၊ တဲး ဂေ ဝီ ညှိုမ် ဆီချာ။ 3 ခုဝ် အန် တီ တဲး ဘေ ဝီ ကာဒွါ့ ကာဖာ လွင် ပဲ့ ဟဲ့ ထူမ် ဟဲ့ ဟေန် ဘေ ဘော လွင် ပဲ့ ဟဲ့ ဒွါ ဇဝ်ဖြာ ဒီ ဘေ ဒေါ ညှိုမ် ဘေ ဒီ အန်။ တဲး ဘေ ဝီ ဘူင် ဒူပ် ပါယ် တီ။ တဲး ဘေ ဝီ လှုဝ်း ဝဲန် မှာပ် ဘေ။ ဆေ ဘေ တူ ဘျွင် နဝ်း ဘေ၊ အုဝ် ဒီ တး ဒူင် ကွယ် ဘေ ပီ ဒါ ပြာ၊ တူ တဲး ဘေ နပ် အာခြာဝ် ဒီ တး အုဝ်။

4 မာလဲ၊ ဒူအီ ခဲင် မိူင် ဆာတီ နီ၊ န့ ဆီ မိုဝ်း ဒူအီ မင် အီ အီ တူ ဘူင် အီ မွှိုမ် ကာအိး။ န့ ပီ၊ ဂေ တူ တဲး ခြိုင် ပီ တာ ဂေ ကာဒါတ့်။ ဂေ ဒူအီ တီ၊ ဂေ ဒီ ဝီ ပွိုန် ဒီ တာ ခြိုင် လုယ် ဘော ဟာဝ် ဒူပ် အုဝ်။ ခုဝ်၊ ဂေ မုး ဒူအီ အီ ဟဲ့ ကာအာပ် တာ၊ ကာအာပ် ဒူပ်။ 5 ဆေ န့ ယီ မိုဝ်း ဒူအီ အီ အွင် တူတ့် ဒွန် မျုဝ်၊ ဂေ ဒီ ပွိုန် ဒီ တာ ခြိုင် လုယ်။ အုဝ် မိူဝ် တူ ဘျတ် စိူဝ် ဂေ ခဲင် ဘပ် ဇာရာင် ဂေ ဒူအီ အီ ဟဲ့ ပွိုန် အာဆာက် ကာမာယ်။ အုဝ် မိူဝ် ဒီ ဝီ ကာလာင် ဒီ ဂုန့် အုဝ်၊ ဘော ဒီ ဂေ အာမူ အာမာတ် အန် လွင် ဟဲ့ ကာဒိုက် ကာဒဝ့် ဂေ ဒီ အုဝ်။ 6 ပါယ် တီ၊ ဆေ ဘေ မိုဝ်း ဟျုဝ့် အီ နပ် ဒီ ထူမ်၊ တဲး ဘေ ထူမ် ပီ ကာလာင် နဝ်း ဖွိုမ် ဇဝ်ဖြာ ဒီ ဂေ ဒူအီ ခဲင် ဖိုင် ဇဝ် ယေဆူ ဘောကာဂ့လျီတ်။’”

7 အန် ဇဝ် ဝီ တဝ်း၊ “တဲး မဲ ဒဲမ် အုန် ဂြုဝ်း နီ၊ ဝီ တိုယ် ဟာဝ် ဒီ အာမူ အာမာတ် ဇဝ်ဖြာ အီ လိုမ်လာ ဂေ ခဲင် ဖိုင် ဇဝ် ယေဆူ အီ ကွယ် ခဲင် မိူင် ဖီလဒေဖီ။ တဲး မဲ ဒဲမ်၊ ‘ဂြုဝ်း နီ မုး ဂြုဝ်း အန် ဇဝ် အီ ဆီငါ ဘွတ်၊ အီ ဆိူဝ် ဆိူဝ်၊ မှာန် မှာန်။ အန် ဇဝ် တီ ဘော မိုဝ်း ပွုန် ဒီ တဲး အီ လိုပ် ခဲင် မိူင် ပီ အိုပ် ဇဝ်ဖြာ ကူပ် မုး အန် လှုက်လှာန် အာဒါဝိတ်။ ဆေ အန် ဟီ ဝိုဝ်း မာလုဝ်း၊ အာဝ် မိုဝ်း အီ ပွိုန် ကာဘိတ်။ ဆေ အန် ဟီ ကာဘိတ်၊ အာဝ် မိုဝ်း အီ ပွိုန် ဝီ ဝိုဝ်း။ 8 အုဝ် ဟဲ့ နပ် တူတ့် ဒွန် မျုဝ် ပဲ့ ဟဲ့ ဘူင် ဘေ။ တဲး ဘေ ဘ်ု ဒီ ယွတ်။ အုဝ် ဟဲ့ ဟွတ့် ဝိုဝ်း အုန် မာလုဝ်း ဒီ ဘေ။ အာဝ် မိုဝ်း အာဆေ အီ ပွိုန် ကာဘိတ် မာလုဝ်း တီ။ ဘေ ပီ ဘော မိုဝ်း ဟဲန့် အီ စဲက် မိူဝ်၊ ဘေ ယီ ဘူင် ဒူပ် ဂြုဝ်း ပီ ကာလာင် အုဝ် ဘော မိုဝ်း နဝ်း မှာန်။ ဘေ တူ ဒွိုမ် တဝ်း၊ ဘေ တူ နပ် အုဝ်။ 9 န့ မိုဝ်း ဖိုင် ဂေ အီ ဒူပ် ဘုဝ် ကာနမ် အီ ကာလုဝ် တဝ်း ဂေ မုး ဒူအီ အာယူဒါ၊ ဂေ ယီ တူ မုး။ အုဝ် ဒီ တဲး ဂေ တး ခြိုပ်ခြဝ် ဂိုပ် ဒီ အာတ့် ဘေ။ န့ ဒီ ဘော လိုဝ်း ဒီ ဂေ ဘောကာဂ့လျီတ် လွင် ရွက့် အုဝ် ဒီ ဘေ။ 10 ကူပ် ဟဲ့ ထူမ် ဒူပ် ဘေ ဂြုဝ်း အုဝ်၊ ကူပ် ဟဲ့ ခမ် ဘေ ဒီ ယိူန်၊ အုဝ် မိူဝ် ဒီ ယွတ် မဲန် ဘေ။ ဆေ ဒူအီ ဒဲင် ကာဒါယ် နီ ဒွန် အီ ဒီ ဘော ကာဒုး ဒုက် တာင်၊ ကူပ် ထေဝ် အုဝ် ဒီ နဝ်း ဂေ၊ အုဝ် မိူဝ် တူ တဲး ဘေ ခမ်။

11 အာဝ် လှေန့် အုဝ် ဒီ ဝီ တး။ တဲး ဘေ ညှိုမ် ဟာဝ် ခဲ့ ပီ ဟဲ့ ညှိုမ် ဘေ ဒေါ တီ နီ။ ကွဲ့ တဲး အာဆေ ပွိုန် ဒီ ဖာတ် ဟာဝ် ရုး ပီ ဒီ ပွိုန် ဘေ အီ ပီ မင်ဂိုမ်။ 12 ဆေ န့ ယီ မိုဝ်း ဒူအီ အီ အွင် တူတ့် ဒွန် မျုဝ်၊ အုဝ် ဒီ တဲး အန် ကွယ် ရိုမ် ဆီချာ ဒူပ် ဇဝ်ဖြာ၊ တဲး န့ ပီ ရွင့် အီ ကွယ် ခဲင် ဟုဝ် ဇဝ်ဖြာ။ အန် မိူဝ် တူ လုဝ် ကာထုဝ့် လေး ဒေါ မှဝ်။ အုဝ် ဒဲမ် ဟပ် စိူဝ် ဇဝ်ဖြာ ပီ ကြိုပ် အုဝ် ဒဲင် ရွင့် တီ။ အုဝ် ဒီ ဒဲမ် ဟပ် ဘော စိူဝ် မိူင် ယေရူဆာလဲမ် ကာမာယ် ဒဲင် ရွင့် တီ။ မိူင် တီ၊ န့ မုး မိူင် ဇဝ်ဖြာ ပီ ကြိုပ် အုဝ်။ န့ ဒီ လေး လူင် ခဲင် ဂါင်ဟြာဝ် အီ မုး ဒူင် ကွယ် ဇဝ်ဖြာ။ ဘော စိူဝ် ကာမာယ် အုဝ်၊ အုဝ် ဒီ ဒဲမ် ဟပ် ဒဲင် ရွင့် တီ။

13 ပါယ် တီ၊ ဆေ ဘေ မိုဝ်း ဟျုဝ့် အီ နပ် ဒီ ထူမ်၊ တဲး ဘေ ထူမ် ပီ ကာလာင် နဝ်း ဖွိုမ် ဇဝ်ဖြာ ဒီ ဂေ ဒူအီ ခဲင် ဖိုင် ဇဝ် ယေဆူ အီ ကွယ် ဘဲန် ပ့လုဝ့် ဘဲန် ပ့လုဝ့်။’”

14 အန် ဇဝ် ဝီ တဝ်း၊ “တဲး မဲ ဒဲမ် အုန် ဂြုဝ်း နီ၊ ဝီ တိုယ် ဟာဝ် ဒီ အာမူ အာမာတ် ဇဝ်ဖြာ အီ လိုမ်လာ ဂေ ဒူအီ ခဲင် ဖိုင် ဇဝ် ယေဆူ အီ ကွယ် ခဲင် မိူင် လောဒီကီ။ တဲး မဲ ဒဲမ်၊ ‘ဂြုဝ်း နီ မုး ဂြုဝ်း အန် ဇဝ် အီ မုး အီ မှာန်။ အန် ဟဲ့ ကာလာင် အီ မုး အီ မှာန် လွင် ဇဝ်ဖြာ။ အန် မိူဝ် ဟဲ့ အိုပ် တူတ့် ဒွန် မျုဝ် ပဲ့ ဟဲ့ ဖာန် ဘ့လေး ဇဝ်ဖြာ။ 15 အုဝ် ဟဲ့ နပ် ပီ ဘူင် ဘေ။ ဘေ တူ ရွက့် တူ ဝဲန် ဇဝ်ဖြာ။ နဝ်း ဘေ န့ ပီ အိုမ် အီ တူ ဂျီတ် တူ ဒါတ်။ အုဝ် ဆီ တဲး ဘေ ဒါတ်။ ဆေ ဘေ တူ ဒါတ်၊ တဲး ဘေ ဂျီတ်။ 16 မာလဲ၊ ကူပ် တူ ဂျီတ် တူ ဒါတ် ဘေ တီ၊ ကူပ် ဆီအုန့် ဆီအုန့် ဘေ၊ အုဝ် ဒီ ဝဲန် ဘေ ပီ အီ ပတ့် လေး အိုမ် ဆီအုန့် ခဲင် မူတ့် ဂေ။ 17 ဘေ ဘော တဝ်း၊ “ယေ ဟဲ့ ခြမ်၊ ကြုဝ်ကြာမ် ယေ ဟဲ့ ကိူန် ကာဆဝ်၊ အာဝ် ဟူ မိုဝ်း ပီ ဒီ လုဝ် ပေါ မ့ပွါ။” ဘေ ယီ တူ ဝီ နပ် ဒုဝ် ဘေ၊ တူ နပ် ခဲ့ ဟဲ့ ဂိန် ဘေ၊ ခဲ့ မွှိုမ် ကာဝေ ဘေ၊ ခဲ့ ဟဲ့ ဖ့လာန် ဘေ။ န့ ပီ၊ ခြိုင် ပီ ဒီ တာ မိူဝ်၊ ဘေ တူ မိုဝ်း။ ငါယ် ဘေ မိူဝ် ဟဲ့ အပ်။ 18 အုဝ် ဒီ ကာလာင် အာကျာမ် အာငျာန် ဒီ ဘေ၊ တဲး ဘေ ဒိုဝ်း ပီ ဒွါ အုဝ် ဒီ ဘေ၊ တဲး န့ ပီ ဘေ စိုဝ်း ခြိဝ် ဒီ အုဝ်၊ အီ မုး ခြိဝ် ဇဲတ်၊ ခြိဝ် ဘွတ် ပဲ့ ဟဲ့ ထာရွင် အီ ခဲင် ငဝ်။ တဲး ဘေ ဝီ ပီ ဒူအီ ခြမ်။ တဲး ဘေ ဝဲန် မှာပ် ဘေ၊ တဲး န့ ပီ ဘေ စိုဝ်း စှိုပ် ခြိုင် လုယ်၊ တဲး န့ ကာဘိတ် ဒုဝ် ဂ့လ ဘေ၊ ကွဲ့ တဲး ဘေ လုဝ် ဆာယ် အီ။ တဲး န့ ပီ ဘေ စိုဝ်း ဘော ဆီနမ် ဟပ် ဒီ ငါယ် ဘေ၊ တဲး န့ လိုဝ်း ဆီချာ ဒီ ဘေ လွင် အုဝ်။

19 အုဝ် ဒီ မာနုဝ် ကာဆဝ် ဂေ ဒူအီ ပီ ရွက့် အုဝ် ဘောကာဂ့လျီတ်။ တဲး ဘေ ဝီ အွန် ဒီ ဒူပ် အုဝ်၊ ဝီ လှုဝ်း ဝီ ဝဲန် မှာပ် ဘေ။ 20 တဲး ဘေ ထူမ်။ န့ ပီ၊ အုဝ် ဟဲ့ ကွယ် ဒီ အာတ့် မာလုဝ်း ဘော ဒဲ့ ဘေ ဘော ဒွယ် မာလုဝ်း။ အာဆေ ယိုဝ် ဂြုဝ်း အုဝ် ဘော ဝိုဝ်း မာလုဝ်း တီ၊ အုဝ် ဒီ ဘော လိုပ် ခဲင် ကာင် အန်၊ ဟူမ် ရိုမ် ဒူပ် အန်။ အန် မိူဝ် ဒီ ပွိုန် ဒီ ဟူမ် ရိုမ် ဒူပ် အုဝ်။

21 ဆေ န့ ယီ မိုဝ်း ဒူအီ အီ အွင် တူတ့် ဒွန် မျုဝ်၊ အုဝ် ဒီ တဲး အန် တုတ့် ဒဲင် မာလာင် ဒူပ် အုဝ်၊ တဲး န့ ပီ ဒေါ ဟဲ့ အွင် အုဝ်၊ ဒေါ ဟဲ့ တဲး ဇဝ်ဖြာ အုဝ် တုတ့် ဒဲင် မာလာင် ဒူပ် အန် အီ မုး ဂုန့် အုဝ်။ 22 ပါယ် တီ၊ ဆေ ဘေ မိုဝ်း ဟျုဝ့် အီ နပ် ဒီ ထူမ်၊ တဲး ဘေ ထူမ် ပီ ကာလာင် နဝ်း ဖွိုမ် ဇဝ်ဖြာ ဒီ ဂေ ဒူအီ ခဲင် ဖိုင် ဇဝ် ယေဆူ အီ ကွယ် ဘဲန် ပ့လုဝ့် ဘဲန် ပ့လုဝ့်။’”