အိုယ် ဘေ ဘီနွင်၊ အုဝ် ဒဲမ် ပဲ့ နီ တိုယ် ဒီ ဘေ။ န့ မုး လွင် အန် ဇဝ် အီ စိူဝ် “ဂြုဝ်း” အီ ဒွါ အာဆာက်။ န့ ဘော မုး ဇဝ် ယေဆူ အီ ဟဲ့ မိုဝ်း ဆိန့် ဒေါ ဂုဝ် အန်။ ယေ မိူဝ် ဟဲ့ ထူမ် ဂြုဝ်း အန်။ ယေ ဟဲ့ ယိုဝ် ဒီ ငါယ် ယေ၊ ဟဲ့ ယွတ် ဆီချာ အာရိုပ် အန်၊ ဟဲ့ ပွိုန် ပါ ဒုဝ် အန်။ 2 အန် ဇဝ် အီ ဒွါ အာဆာက် တီ ဟဲ့ ဘဲန် ဒူအီ။ ယေ မိူဝ် ဟဲ့ ယိုဝ် အန်၊ ဝီ ကာလာင် ဒီ ဘေ လွင် ဒီ ဒွါ အန် အာဆာက် ကာမာယ် ဒီ ဘေ။ အန် ဟဲ့ ဒွိုမ် ကွယ် ရိုမ် ဒူပ် ဇဝ်ဖြာ ဆေဆေ၊ အန် ယီ ဟဲ့ ဝီ တဲး ယေ ယိုဝ် အန်။ 3 ခဲ့ ပီ ယိုဝ် ပီ ထူမ် ယေ၊ ယေ ဝီ ကာလာင် ဒီ ဘေ၊ တဲး ဘော ဘေ ဘော ယေ ပွိုန် ဒီ ကွယ် ကာဇု ဘဲန် အူ နဝ်း။ ပါယ် တီ ဘော အေ ဘော ဇဝ်ဖြာ အီ မုး ဂုန့် အေ ဘော ဂွန် ဇဝ်ဖြာ အီ မုး ဇဝ် ယေဆူ၊ အေ ဘောကာဂ့လျီတ် ဒီ ဘော ပွိုန် ဒီ ကွယ် ကာဇု ဘဲန် အူ နဝ်း။ 4 ယေ ဒဲမ် ပဲ့ လွင် အန် တီ တိုယ် ဒီ ဘေ၊ တဲး အီ ဒါခိုယ် ကော နုဝ့် လုတ့် ခဲင် နဝ်း ယေ။

5 ဂြုဝ်း ပဲ့ ဟဲ့ ကာလာင် ဇဝ်ဖြာ ဒီ ယေ၊ ယေ ဝီ ကာလာင် ဒီ ဘေ။ န့ တဝ်း၊ ဇဝ်ဖြာ ပီ ဘ့လာင်။ အာဝ် မိုဝ်း အီ အပ် ဝွင့် မာဆေ ဒီ အန်။ 6 ပါယ် တီ၊ ဆေ အေ တဝ်း၊ ဘော အေ ဘော ဇဝ်ဖြာ ဟဲ့ ကွယ် ကာဇု ဘဲန် အူ နဝ်း၊ ဆေ အေ ယီ ဆီ ဘူင် ဘဲန် မျုဝ် ဘဲန် မျုဝ် ဒူပ် အီ အပ် အီ ဝွင့်၊ အေ ကာလုဝ်။ အေ မိူဝ် တူ ဘူင် နာ မုး နာ မှာန်။ 7 မာလဲ၊ ဆေ အေ ဟဲ့ ကွယ် ခဲင် ဘ့လာင် ပီ အန် ဇဝ် ဟဲ့ ကွယ် ခဲင် ဘ့လာင် ဆေဆေ၊ အေ မိူဝ် ဟဲ့ လာယ် ကာလဝ့်၊ လာယ် ဘဲန် အူ နဝ်း။ အေ ယီ ဟဲ့ နပ်၊ ကူပ် ဟဲ့ ခမ် ဇဝ် ယေဆူ ဒီ ယမ် ကာဒါင် အေ၊ အန် ဒီ ဂဝ်း ဝဲန် မှာပ် အေ ဒွန် မျုဝ်၊ တဲး အေ ဝီ ဆီငါ ဘွတ်။ 8 ဆေ အေ ယီ တဝ်း၊ အေ တူ မိုဝ်း မှာပ်၊ အေ ကာလုဝ် ဒုဝ် ဘြိမ် အေ။ အီ မုး အီ မှာန် မိူဝ် တူ ကွယ် ခဲင် နဝ်း အေ။ 9 မာလဲ၊ ဆေ အေ ကာလာင် မှာပ် အေ ဘော မှာန့် ဒီ ဘ့လွာ့ ဝဲန် ခဲ့ မိုဝ်း အေ မှာပ်၊ အန် ဇဝ် အီ မိုဝ်း နဝ်း ဆိူဝ် နဝ်း မှာန်၊ အန် ဒီ ဂဝ်း ဝဲန် တူတ့် မှာပ် အေ ဘော ဝဲန် နာ မိူက် ဒွန် မျုဝ် ပဲ့ ဟဲ့ ဘူင် အေ၊ တဲး နဝ်း အေ ဆီငါ ဘွတ်။ 10 ဆေ အေ ယီ တဝ်း၊ အေ တူ မိုဝ်း ဒီ ဘူင် မှာပ်၊ န့ ပီ အေ တဝ်း၊ ဂြုဝ်း ဇဝ်ဖြာ တူ မှာန်။ ဆေ န့ ပါယ် တီ၊ ဂြုဝ်း ဇဝ်ဖြာ မိူဝ် တူ ဒွိုမ် လိုပ် ခဲင် နဝ်း အေ။