အိုယ် ဘေ အီ ပီ ဂွန် ပီ ရွက့် အုဝ်၊ အုဝ် ဒဲမ် ဂြုဝ်း နီ တိုယ် ဒီ ဘေ၊ ကွဲ့ တဲး ဘေ ဘူင် မှာပ်။ ဆေ မင် အီ ယီ ဟဲ့ ကာလိုပ် ဒီ ဘူင် မှာပ် အေ ဟဲ့ မိုဝ်း ဇဝ် ယေဆူ အီ မိုဝ်း နဝ်း ဆိူဝ် နဝ်း မှာန်။ အန် ဒီ ဝီ ဆာခိုဝ် ဒီ ဇဝ်ဖြာ ဒါင် အေ။ 2 ဇဝ်ဖြာ နပ် ဒီ ဂဝ်း ဝဲန် မှာပ် အေ ကူပ် ဟဲ့ ခမ် ဇဝ် ယေဆူ ဒီ ယမ် ကာဒါင် အေ။ အာဝ် မုး မီ မှာပ် အေ အန် ဂဝ်း ဝဲန်။ အန် ဘော ဂဝ်း ဝဲန် မှာပ် ဂေ ဒူအီ ဘောကာဂ့လျီတ် အီ ကွယ် ဒဲင် ကာဒါယ် နီ။

3 ဆေ အေ ဘူင် ဒူပ် ဂြုဝ်း ပီ စ်ု အန် ဇဝ်၊ အေ ဒီ နပ် အန်။ န့ ဟဲ့ ကာလှုး ဒီ နဝ်း အေ လွင် အန်။ 4 အာဆေ တဝ်း၊ “အုဝ် ဟဲ့ နပ် အန် ဇဝ် တီ၊” အန် ယီ တူ ဘူင် ဒူပ် ပီ စ်ု အန် ဇဝ်၊ ဒူအီ တီ၊ အန် ကာလုဝ်။ နာ မုး နာ မှာန် မိူဝ် တူ ကွယ် ခဲင် နဝ်း အန်။ 5 အာဆေ ယီ ဘူင် ဒူပ် ဂြုဝ်း ပီ စ်ု အန် ဇဝ်၊ ဟဲ့ မှာန် အန် ရွက့် ဇဝ်ဖြာ အာခါခ်ု။ အန် ဒီ ဘော နပ်၊ အန် ဟဲ့ ကွယ် ကာဒိုက် ကာဒဝ့် ဒီ အန် ဇဝ်။ 6 အာဆေ တဝ်း၊ “အုဝ် ဟဲ့ ကွယ် ကာဒိုက် ကာဒဝ့် ဒီ အန် ဇဝ်၊” အန် လုဝ် ဘူင် ပီ ပီ ဘူင် ဇဝ် ယေဆူ။

7 အိုယ် ဘေ အီ မုး ဂိုက် ပီ ရွက့် အုဝ်၊ ပီ ဒဲမ် အုဝ် ဒီ ဘေ နီ၊ အာဝ် မုး ဒါရာ ကာမာယ်။ န့ မုး ဒါရာ ဘြိမ် ပီ နပ် ဘေ အူ ဆိန့် ဒေါ ဂုဝ် အန်။ ဒါရာ အုဝ် နီ၊ န့ မုး ဒါရာ ဘြိမ် ပဲ့ ဟဲ့ ဒွိုမ် ထူမ် ဘေ။ 8 ယီ ပွိုန် တဝ်း၊ န့ မုး ဒါရာ ကာမာယ်။ ခုဝ်၊ ပဲ့ ဟဲ့ ဘူင် ဇဝ် ယေဆူ ဘော ပဲ့ ဟဲ့ ညှိုမ် ဘေ၊ န့ ဟဲ့ ဘျ လွင် ဟဲ့ မုး ဟဲ့ မှာန် ဒါရာ တီ။ အေ ဟဲ့ ယိုဝ်၊ အပ် ဝွင့် ဟဲ့ ကြဲ ဒီ ဟြာယ်။ ဘ့လာင် အီ ပွိုန် ယိုဝ် ဒေါ တီ နီ၊ ဟဲ့ မှာန် အာခါခ်ု။

9 အာဆေ ယီ တဝ်း၊ “န့ ပီ အုဝ် ဟဲ့ ကွယ် ခဲင် ဘ့လာင်၊” ဆေ အန် ယီ ဆီ ဇွင့် ဘီနွင် အန်၊ န့ ပီ အန် ညှမ် ကွယ် ခဲင် ဘ့လာင်။ အန် ဆီ ကွယ် ခဲင် အပ် ဝွင့် ဇမ် ဒေါ တီ နီ။ 10 အာဆေ ဟဲ့ ရွက့် ဘီနွင် အန်၊ န့ ပီ အန် ဟဲ့ ကွယ် ခဲင် ဘ့လာင်။ အန် မိူဝ် တူ တာ ဒုး မာဆေ အီ တဲး အန် ကေး။ 11 ဆေ ဒူအီ ယီ ဆီ ဇွင့် ဘီနွင် အန်၊ န့ ပီ အန် ကွယ် ခဲင် အပ် ဝွင့်။ န့တေန့် နာ ဒီ ဟာဝ် မိူဝ်၊ အန် တူ နပ်။ ခုဝ်၊ အပ် ဝွင့် တီ ဟဲ့ ဘူင် ကွဲ့ တဲး ငါယ် အန် ယိုဝ်။

12 အိုယ် ဘေ အီ ပီ ဂွန် ပီ ရွက့် အုဝ်၊ အုဝ် ဒဲမ် ဒီ ဘေ လွင် ဇဝ်ဖြာ ဟဲ့ ဂဝ်း ဝဲန် မှာပ် ဘေ။ ခုဝ်၊ ဇဝ် ယေဆူ ဟဲ့ ခမ် ဒီ ယမ် ကာဒါင် ဘေ။

13 အိုယ် ဘေ အီ ပီ ဂုန့်၊ အုဝ် ဒဲမ် ဒီ ဘေ လွင် ဟဲ့ လာယ် နပ် လာယ် ဒွိုမ် ဘေ ဒီ ဇဝ် ယေဆူ အီ ကွယ် အူ ဆိန့် ဒေါ ဂုဝ် အန်။

အိုယ် ဘေ အီ ပီ ကာညူမ်၊ အုဝ် ဒဲမ် ဒီ ဘေ လွင် ဟဲ့ အွင် ဘေ ဘုဝ် ကာနမ် အီ ဟာယ် ကာဆဝ်။

အိုယ် ဘေ အီ ပီ ဂွန်၊ အုဝ် ဒဲမ် ဒီ ဘေ လွင် ဟဲ့ လာယ် နပ်၊ လာယ် ဒွိုမ် ဘေ ဒီ ဂုန့် အေ အီ မုး ဇဝ်ဖြာ။

14 အိုယ် ဘေ အီ ပီ ဂုန့်၊ အုဝ် ဒဲမ် ဒီ ဘေ လွင် ဟဲ့ နပ် ဘေ အန် ဇဝ် အီ ကွယ် အူ ဆိန့် ဒေါ ဂုဝ် တွိုန်။

အိုယ် ဘေ အီ ပီ ကာညူမ်၊ အုဝ် ဒဲမ် ဒီ ဘေ လွင် ဟဲ့ မိုဝ်း ဘေ ပ့လူမ် ဂေ ဟဲန့်။ ဘော ဂြုဝ်း ဇဝ်ဖြာ ဟဲ့ ကွယ် ခဲင် နဝ်း ဘေ။ ဘေ မိူဝ် ဟဲ့ အွင် ဘုဝ် ကာနမ် အီ ဟာယ် ကာဆဝ်။

15 ကွဲ့ တဲး ဘေ ရွက့် အာမျုဝ် အီ ကွယ် ဒဲင် ကာဒါယ်၊ အီ တူ ဘာ့ ဇဝ်ဖြာ။ ကွဲ့ တဲး ဘေ ရွက့် ဘော ကြုဝ်ကြာမ် အီ ကွယ် ဒဲင် ကာဒါယ် နီ။ အာဆေ ရွက့် အာမျုဝ် အီ ကွယ် ဒဲင် ကာဒါယ် နီ၊ အန် တူ ရွက့် ဇဝ်ဖြာ။ 16 ခုဝ်၊ ခဲ့ ကွယ် ဒဲင် ကာဒါယ် နီ ဒွန် မျုဝ်၊ န့ ဘော မုး ပီ အိုင် ဒုဝ် ဘြိမ် အေ၊ ဘော နဝ်း ဆီ ပွိုန် ခဲ့ ပီ ယိုဝ် အေ၊ ဘော နဝ်း ပီဖုင်၊ နဝ်း ဆီ တဲး အီ အိူပ်၊ နဝ်း ဇိုဝ် တီ ဒွန် မျုဝ် အာဝ် မုး နဝ်း ပီ ဒွါ ဇဝ်ဖြာ။ န့ မုး နဝ်း အာမျုဝ် ဂေ အီ ကွယ် ဒဲင် ကာဒါယ် နီ။ 17 ဘော ကာဒါယ် နီ ဘော ပီ ဆီ ပွိုန် အေ ဒွန် မျုဝ် ဒဲင် ကာဒါယ် နီ၊ န့ ဒီ ဟြာယ် တူတ့်။ အာဆေ ယီ ဘူင် ဒူပ် ပီ အိုင် ဇဝ်ဖြာ၊ အန် ဒီ ကွယ် ဆေဆေ။

18 အိုယ် ဘေ အီ ပီ ဂွန် ပီ ရွက့် အုဝ်၊ ဒေါ တီ နီ ဟဲ့ ဇမ် အာခြာဝ် ဒီ တူတ့် ဇာတ် နီ။ ဘေ မိူဝ် ဟဲ့ ဒွိုမ် ယိုဝ် အီ ဟဝ် တဝ်း၊ ဒူအီ အူ ဝီ အီ မုး ရန်ဆူ ဇဝ် ယေဆူ အီ ကာဘး ဒီ အန်၊ အန် ဒီ တး။ ဒေါ တီ နီ ဂေ ကိူန် အီ ပီ ရန်ဆူ တီ၊ ဂေ ဟဲ့ ဟွတ့် တး။ ခုဝ်၊ အေ နပ်၊ ဒေါ တီ နီ ဟဲ့ မုး အာခြာဝ် ဒီ တူတ့် ဇာတ် နီ။ 19 ဒူအီ ဂေ တီ၊ ဂေ ဟဲ့ ဒွိုမ် ကွယ် ရိုမ် ဒူပ် အေ။ ဂေ ယီ ဟဲ့ လေး တ ဖိုင် အေ။ ခုဝ်၊ ဂေ တူ မုး အာမျုဝ် အေ။ ဆေ ဂေ မုး အာမျုဝ် အေ၊ ဂေ ဒီ ကွယ် ရိုမ် ဒူပ် အေ။ ဂေ ဟဲ့ လေး တ ဖိုင် အေ၊ တဲး န့ လိုဝ်း ဆီချာ၊ ဂေ တူ မုး အာမျုဝ် အေ ခေါ အူ ဝီ။

20 အန် ဇဝ် အီ ဆီငါ ဘွတ် ဟဲ့ ဒွါ နဝ်း ဖွိုမ် ဇဝ်ဖြာ ဒီ ဘေ။ န့ ပီ အန် ဟဲ့ ဖဝ်း နာမန် ဒီ ဂိန့် ဘေ။ ဘေ ဒွန် အီ မိူဝ် ဟဲ့ နပ် နာ မုး နာ မှာန်။ 21 အုဝ် ဒဲမ် ပဲ့ နီ ဒီ ဘေ၊ အာဝ် မုး ကူပ် တူ နပ် ဘေ နာ မုး နာ မှာန်။ အုဝ် ဒဲမ် ဒီ ဘေ ကူပ် ဟဲ့ နပ် ဘေ နာ မုး နာ မှာန်။ ဘေ မိူဝ် ဟဲ့ နပ်၊ အာဆေ ဒူပ် နာ မုး နာ မှာန်၊ အန် တူ ကာလုဝ်။ 22 ဒူအီ အီ ဆီမာ ကာလုဝ်၊ အန် မုး အာဆေ။း န့ မုး ဒူအီ အီ တဝ်း၊ ဇဝ် ယေဆူ တူ မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ ဘော ရန်ဆူ ဇဝ် ယေဆူ အီ ဘူင် ကာဘး ဒီ အန် တွိုန် ဟဲ့ တဝ်း ပါယ် တီ။ အန် ဟဲ့ ဝဲန် ဇဝ်ဖြာ အီ မုး ဂုန့် အေ၊ ဟဲ့ ဝဲန် ဘော ဂွန် အန် အီ မုး ဇဝ် ယေဆူ။ 23 အာဆေ ယီ ဝဲန် ဂွန် ဇဝ်ဖြာ၊ အန် ဟဲ့ ဝဲန် ဘော ဂုန့် အန်။ အာဆေ ရွုး ဂွန် ဇဝ်ဖြာ၊ အန် ဟဲ့ ရွုး ဘော ဂုန့် အန်။

24 လွင် ပဲ့ ဟဲ့ ဒွိုမ် ထူမ် ဘေ အူ ဆိန့် ဒေါ ဂုဝ် တွိုန်၊ တဲး န့ ကွယ် ခဲင် နဝ်း ဘေ။ ဆေ ဂြုဝ်း တီ ကွယ် ခဲင် နဝ်း ဘေ၊ ဘေ ဒီ ကွယ် ကာဒိုက် ကာဒဝ့် ဒီ ဂွန် ဇဝ်ဖြာ။ ဘေ ဒီ ကွယ် ကာဒိုက် ကာဒဝ့် ဘော ဒီ ဂုန့် အန်။ 25 ပဲ့ ဟဲ့ တဝ်း ဇဝ် ယေဆူ ဒီ ဒွါ ဒီ အေ၊ န့ မုး အာဆာက် ကာမာယ် အီ တဲး အေ ကွယ် ရိုမ် ဒူပ် ဇဝ်ဖြာ ဆေဆေ။

26 အုဝ် ဒဲမ် ပဲ့ နီ ဒီ ဘေ၊ တဲး ဘေ နပ် လွင် ဂေ အီ ဆီ ကာလုဝ် ဘေ။ 27 မာလဲ၊ အီ မုး ဘေ၊ ဇဝ် ယေဆူ ဟဲ့ ဒွါ နဝ်း ဖွိုမ် ဇဝ်ဖြာ ဒီ ဘေ တဲး န့ ကွယ် ခဲင် နဝ်း ဘေ။ ခုဝ်၊ အာဝ် လုဝ် အာဆေ မာနုဝ် ဘေ။ နဝ်း ဖွိုမ် ဇဝ်ဖြာ တီ အီ ဒီ မာနုဝ် ဘေ ဒွန် မျုဝ်။ ခဲ့ ပီ မာနုဝ် နဝ်း ဖွိုမ် ဇဝ်ဖြာ၊ န့ တူ ကာလိုပ်။ အန် မာနုဝ် နာ မုး နာ မှာန်။ ခုဝ်၊ တဲး ဘေ ထူမ် ပီ မာနုဝ် နဝ်း ဖွိုမ် ဇဝ်ဖြာ လွင် ကွယ် ကာဒိုက် ကာဒဝ့် ဘေ ဒီ ဇဝ် ယေဆူ။ 28 အိုယ် ဘေ အီ ပီ ဂွန် ပီ ရွက့် အုဝ်၊ တဲး ဘေ ကာဒိုက် ကာဒဝ့် ဒီ ဇဝ် ယေဆူ ဆေဆေ။ ဆေ အန် ဟီ တး၊ ကွဲ့ တဲး ဘေ လုဝ် ချြီင် လုဝ် ဆာယ်။ တဲး ဘေ မိုဝ်း နဝ်း ယ ဆီငဲ ဒီ တး အန် တီ။ 29 ပါယ် တီ၊ ဆေ ဘေ ဟဲ့ နပ် ဇဝ် ယေဆူ မိုဝ်း နဝ်း ဆိူဝ် နဝ်း မှာန်၊ ဘေ ဒီ ဘော နပ် လွင် ဂေ အီ ဘူင် ဒူပ် နာ မုး နာ မှာန်၊ ဂေ မုး ဂွန် ဇဝ်ဖြာ။