အုဝ် အာဆီမူန် အီ စိူဝ် ဘော အာပေတာရူ၊ အုဝ် မုး ဒဲစေန့် ဇဝ်ဖြာ ဘော မုး ဒူအီ ပီ ရဝ်း ပီ တိုယ် ဇဝ် ယေဆူ။ အုဝ် ဒဲမ် ပဲ့ နီ တိုယ် ဒီ ဒွန် အီ အီ ညှိုမ် ဆီချာ ဇဝ်ဖြာ။ ပီ ညှိုမ် ဒူအီ ဂေ တီ ဘော ပီ ညှိုမ် ယေ ဟဲ့ မုး အူ မျုဝ်။ န့ ယီ မုး ဇဝ်ဖြာ ဘော ဇဝ် ယေဆူ အီ ဟဲ့ ချွတ် အေ။ ကူပ် မိုဝ်း အန် ဇဝ် နဝ်း ဆိူဝ် နဝ်း မှာန်၊ အန် ဟဲ့ တဲး အေ ညှိုမ် ပါယ် တီ။

2 တဲး ဇဝ်ဖြာ ဘော ဇဝ် ယေဆူ ဂေဇူ ဘေ၊ ဒွါ ဘော နဝ်း ဂျီတ် ဒီ ဘေ၊ တဲး န့ ကော နုဝ့် လုတ့် ခဲင် နဝ်း ဘေ။ ကူပ် နပ် ဘေ ဇဝ်ဖြာ ဘော ကူပ် နပ် ဘေ ဇဝ် ယေဆူ အီ မုး ဒါ ကာညာ အီ အိုပ် ဘေ၊ တဲး အန် ဇဝ် မွင့်ကာရာ ဒွါ ဒီ ဘေ ပါယ် တီ။

3 ပွုန် ဇဝ်ဖြာ ဟဲ့ တဲး အေ မိုဝ်း တူတ့် ဒွန် မျုဝ် ခဲ့ ပီ လုဝ် အေ၊ တဲး အေ ပွိုန် ဒီ ကွယ် ဒဲင် ကာဒါယ် နီ ဘော တဲး အေ ပွိုန် ဒီ ဒူပ် ဇဝ်ဖြာ။ အန် ဇဝ် အီ ဟဲ့ မိုဝ်း အာဖုင် ဒင်ခုဝ် ဘော မိုဝ်း နဝ်း ဘွတ် နဝ်း မွှိုမ်၊ အန် ဟဲ့ တဲး အေ လာယ် နပ် ဒီ အန်။ ကူပ် ဟဲ့ လာယ် နပ် အေ ဒီ အန် တီ၊ အေ ဟဲ့ ပွိုန် တူတ့် ဒွန် မျုဝ် ခဲ့ ပီ လုဝ် အေ။ 4 ခုဝ် အန် တီ အန် ဇဝ် ဟဲ့ ဒွါ ကာဒိက် ဆတ်ဇာ အီ ဟဲ့ ငဝ်း တာင် ကာဆဝ် ဒီ အေ။ ကူပ် ဘိုင် ဘေ ကာဒိက် ဆတ်ဇာ အန် တီ၊ န့ ဒီ တဲး ဘေ လွတ် မျုဝ် အီ နပ် ဒီ လိုဝ်၊ အီ နပ် ဒီ စှိုမ် ဒဲင် ကာဒါယ် နီ၊ တဲး ဘေ ကာဒိုက် ကာဒဝ့် ဒီ ဇဝ်ဖြာ ဘော တဲး ဘေ မိုဝ်း နဝ်း အီ ပီ နဝ်း ဇဝ်ဖြာ။

5 ကူပ် န့ ပါယ် တီ၊ တဲး ဘေ ခတ် နဝ်း ဒီ ညှိုမ် ဆီချာ ဇဝ်ဖြာ။ ဆေ ဘေ ဟဲ့ ညှိုမ် ဆီချာ ဇဝ်ဖြာ၊ တဲး ဘေ ဘော မိုဝ်း အာငျာန် အီ နပ် ဘဲန် မျုဝ် ဘဲန် မျုဝ်။ 6 ဆေ ဘေ ဟဲ့ မိုဝ်း အာငျာန် အီ နပ် ဘဲန် မျုဝ် ဘဲန် မျုဝ် တီ၊ တဲး ဘေ ပဲ ဒီ အိုပ် ဒုဝ် ဘြိမ် ဘေ။ ဆေ ဘေ ဟဲ့ ပဲ ဒီ အိုပ် ဒုဝ် ဘြိမ် ဘေ တီ၊ တဲး ဘေ ဝီ မိုဝ်း နဝ်း အီ ခမ် ဒီ ယိူန်။ ဆေ ဘေ ဟဲ့ မိုဝ်း နဝ်း အီ ခမ် ဒီ ယိူန် တီ၊ တဲး ဘေ ဝီ မိုဝ်း နဝ်း ဆီ ဒူပ် ဆီချာ ဇဝ်ဖြာ။ 7 ဆေ ဘေ ဟဲ့ မိုဝ်း နဝ်း အီ ဆီ ဒူပ် ဆီချာ ဇဝ်ဖြာ တီ၊ တဲး ဘေ ဝီ မိုဝ်း နဝ်း လာယ် ရွက့် ဒီ ဘီနွင်။ ဆေ ဘေ ဟဲ့ လာယ် ရွက့် ဒီ ဘီနွင် ဘေ၊ တဲး ဘေ ဝီ မိုဝ်း နဝ်း ရွက့် ဒွန် အီ။ 8 ဆေ ဘေ တဲး နာ မွှိုမ် ဇိုဝ် တီ ကြဲ ဒီ ကိူန် ခဲင် နဝ်း ဘေ၊ န့ ဒီ တဲး ဘေ အွန် ဒီ ဘူင် နာ မွှိုမ် ဘဲန် မျုဝ် ဘဲန် မျုဝ်၊ တဲး န့ ဘော ဘဲန် အာဂျိုဝ် ဒီ ဘေ။ န့ တဲး ဘေ ဘော မိုဝ်း အာငျာန် အီ နပ် ဆီချာ ဇဝ် ယေဆူ။ 9 မာလဲ၊ အာဆေ တူ မိုဝ်း နာ မွှိုမ် ဇိုဝ် တီ၊ အန် ပီ ဒူအီ ငါယ် အပ်၊ ဒူအီ အီ တူ ယိုဝ် တူင့်။ အန် မိူဝ် ဟဲ့ ပိဝ် လွင် ဇဝ်ဖြာ ဟဲ့ ဟွတ့် ဂဝ်း ဝဲန် မှာပ် အန်။

10 ခုဝ် အန် တီ ဘေ ဘီနွင် အုဝ်၊ တဲး ဘေ ဝဲ အွန် ဒီ ဘူင် တဲး န့ ကာအာပ် ဒီ ဇဝ်ဖြာ အီ ဟဲ့ ရဝ်း ဘေ၊ တဲး ဘေ လှုဝ်း ဆေဆေ လွင် အန် တီ။ ဆေ ဘေ ဘူင် ပါယ် တီ၊ ဘေ တူ ဝဲန် ဇဝ်ဖြာ ဒေါ မှဝ်။ 11 ပါယ် တီ၊ အန် ဇဝ် ဒီ ဇွန်ဇူမ် ဒီ ခ့ဝါင် တဲး ဘေ လိုပ် ကွယ် ဆေဆေ ခဲင် မိူင် ပီ အိုပ် ဇဝ်ဖြာ အီ မုး ဒူင် ကွယ် ဇဝ် ယေဆူ အီ ဟဲ့ ချွတ် အေ။

12 ဘေ ပီ ဘော ဟဲ့ နပ် လွင် အန် တီ ဘော ညှိုမ် ဆီချာ နာ မှာန် မိူဝ်၊ အုဝ် ယီ ဆီ ဒမ် ဆာဒိက် ဒီ ဘေ ဆေဆေ လွင် ဇိုဝ် တီ ဒွန် မျုဝ်၊ ကွဲ့ တဲး ဘေ ပိဝ်။ 13 အုဝ် ထာင်၊ ဒေါ ဆီ ကွယ် အုဝ် ဒဲင် ကာဒါယ် နီ၊ န့ ဟဲ့ ကာအာပ် အုဝ် ဒမ် ဆာဒိက် ဒီ ဘေ၊ တဲး ဘေ လှုဝ်း ဂြုဝ်း ဇိုဝ် တီ ဆေဆေ။ 14 ခုဝ်၊ အုဝ် ဟဲ့ ဟွတ့် နပ်၊ အာဝ် ဟူ ဘော လှေန့် အုဝ် ဒီ ကာပ့လု ဇာတ် အုဝ်။ ဇဝ် ယေဆူ အီ မုး ဒါ ကာညာ အေ၊ အန် ဟဲ့ ဟွတ့် ကာလာင် ဆီချာ လွင် အန် တီ ဒီ အုဝ်။ 15 အုဝ် မိူဝ် ဂျုဝ်ဂျာ ဒီ ဘူင် တူတ့် ဒွန် မျုဝ်၊ တဲး ဘေ နုဝ် ဆေဆေ လွင် ဇိုဝ် တီ ဝါယ် ဟူ ကွယ် အုဝ် ဒဲင် ကာဒါယ် နီ။

16 ဒေါ ဒွိုမ် ကာလာင် ယေ ဒီ ဘေ လွင် ပွုန် ဇဝ် ယေဆူ ဘော လွင် ပန် ဒီ ဝီ တး အန် ဇဝ်၊ အာဝ် မုး ယေ ခဲ အာဘိုမ် ပီ ဒဲမ် ဂေ အီ လွှက့် ဒီ ကာလုဝ်။ ဟဲ့ မုး ဒုဝ် ယေ အီ ယိုဝ် ပီ ပါယ် အာဖုင် ဒင်ခုဝ် အန် ဇဝ်။ 17 ဂြုဝ်း ဇဝ်ဖြာ ဟဲ့ ဒွိုမ် လေး တး ခဲင် ဒူင် မိုဝ်း အာဖုင် ဒင်ခုဝ် တာင် တဝ်း၊ “ဝီ တီ ဟဲ့ မုး ဂွန် ပီ ရွက့် အုဝ်။ အန် ဟဲ့ လဝ့် ကာဆဝ် နဝ်း အုဝ်။” ဒေါ ကာလာင် ဇဝ်ဖြာ အီ မုး ဂုန့် ဇဝ် ယေဆူ ဂြုဝ်း တီ၊ အန် ဘော ဒွါ အာဖုင် ဒင်ခုဝ် ဘော ဆာရေ ဒီ ဇဝ် ယေဆူ။ 18 ဒေါ ကွယ် ရိုမ် ယေ ဒူပ် အန် ဇဝ် ဒဲင် နွန် အီ မုး ဒူင် ဘွတ် တွိုန်၊ ယေ ဟဲ့ ယိုဝ် ဆီချာ ဂြုဝ်း တီ အီ ဟဲ့ ကာလာင် လေး ခဲင် ဂါင်ဟြာဝ်။

19 ယေ ဟဲ့ မိုဝ်း ဘော ဂြုဝ်း ဂေ ဒူအီ အီ ဘျာန် ဂြုဝ်း ဇဝ်ဖြာ။ န့ ဟဲ့ တဲး ယေ ဝဲ နပ် ခဲမ် လွင် ဇဝ် ယေဆူ။ ခုဝ်၊ ဆေ ဘေ ထူမ် ဆီချာ ဂြုဝ်း ဇဝ်ဖြာ တီ၊ န့ ဒီ ဘဲန် နာ မွှိုမ် ဒီ ဘေ။ ဂြုဝ်း တီ၊ ပီ ငဝ် အွမ် အီ တဲး န့ ဘ့လာင် ခဲင် ဒူင် အပ် ဝွင့်။ န့ ဒီ ဘော ဘ့လာင် ကော ဇမ် ပန် ဒီ လေး ဆီငဲ။ ဆေ ဂြုဝ်း ဇဝ်ဖြာ ဟဲ့ ကာလှုး ဒီ နဝ်း ဘေ၊ န့ ဒီ ပီ မာလာင် ညှာ အီ လေး ခဲင် ဘ့လေန့်။ 20 ဒဲင် တီ၊ ဘေ လုဝ် လှုဝ်း လွင် ဂြုဝ်း ဂေ ဒူအီ အီ ဘျာန် ဂြုဝ်း ဇဝ်ဖြာ ပီ ဒဲမ် အုန် ခဲင် ဘပ် ဇဝ်ဖြာ။ န့ တူ မုး ဂြုဝ်း အီ လေး ခဲင် အာငျာန် ဒုဝ် ဘြိမ် ဂေ၊ ဝီ ကာလာင် ပီ ပါယ် ဆီဖဝ် အန်။ 21 ခုဝ်၊ ဂြုဝ်း ဒူအီ အီ ဘျာန် ဂြုဝ်း ဇဝ်ဖြာ အာဝ် ဒူပ် ပီ ဇေန့်ဇာ ဒူအီ။ နဝ်း ဖွိုမ် ဇဝ်ဖြာ အီ ဆီငါ ဘွတ် ဟဲ့ ဘျ ဒီ ဂေ ဂြုဝ်း တီ။ ဂေ မိူဝ် ဘိုင် ဇဝ်ဖြာ ဒီ ကာလာင်။