အုဝ် အာပေတာရူ အီ မုး ဒူအီ ပီ ရဝ်း ပီ တိုယ် ဇဝ် ယေဆူ၊ အုဝ် ဒဲမ် ပဲ့ နီ တိုယ် ဒီ ဘေ ဘီနွင် အီ ကွယ် ကာယဝ်း ဘဲန် အိူင် ဘဲန် အိူင်။ န့ ဘော မုး အိူင် ဖူန်ထူ၊ အိူင် ဂါလာထီ၊ အိူင် ကာပါဒုဝ်နီ၊ အိူင် အာဆီယာ၊ ဘော အိူင် ဘီဆီနာ။ 2 ဘေ ဟဲ့ ဘဲန် ဒူအီ ပီ ရဝ်း ဇဝ်ဖြာ၊ တဲး န့ ဒူပ် ပဲ့ ဟဲ့ ခြာမ် ဇဝ်ဖြာ ဒီ ဘူင်။ နဝ်း ဖွိုမ် ဇဝ်ဖြာ ဟဲ့ တဲး ဘေ ဘဲန် ဒူအီ အီ ဆီငါ ဘွတ်၊ တဲး ဘေ ပွိုန် ဒီ ထူမ် ဒူပ် ပီ ကာလာင် ဇဝ် ယေဆူ၊ တဲး ဇဝ် ယေဆူ ဂဝ်း ဝဲန် မှာပ် ဘေ ကူပ် ဟဲ့ ခမ် အန် ဒီ ယမ် ကာဒါင် ဘေ။ အုဝ် မှာန့်၊ တဲး ဘေ ပွိုန် ကိူန် ပီ ဂေဇူ ဇဝ် ယေဆူ၊ တဲး အန် ဒွါ ဘော နဝ်း ဂျီတ် ကာဆဝ် ဒီ ဘေ။

3 အေ ဒါင် ဂုင် ဂေဇူ ဒီ ဇဝ်ဖြာ အီ မုး ဂုန့် ဇဝ် ယေဆူ။ ပီ ဂေဇူ ဇဝ်ဖြာ ဒီ အေ ဟဲ့ ကိူန် ကာဆဝ်။ အန် ဟဲ့ ဘူင် တဲး အေ ဘဲန် ဒူအီ ကာမာယ်၊ တဲး န့ ပီ အေ ဟဲ့ ဝီ ဂွိုတ် ပေါ အူ ဇေန့်။ ကူပ် ဟဲ့ ဝီ ယိတ့် ဝီ အိမ် ဇဝ် ယေဆူ ဝါယ် ဟဲ့ ဟွတ့် ယမ် အန်၊ န့ တဲး အေ မိုဝ်း ပီ နှဝ့် န့ဒဝ့် အီ တူ နပ် ဒီ ကာလုတ့် နဝ်း ဒေါ မှဝ်။ 4 အေ မိူဝ် ဟဲ့ ပွိုန် ခါဂုန် အီ ဘွတ်၊ အီ တူ နပ် ဒီ လိုဝ်၊ အီ တူ နပ် ဒီ ဟြာယ်။ ဇဝ်ဖြာ ဟဲ့ ဘ့လေး အုန် ဇိုဝ် တီ ခဲင် ဂါင်ဟြာဝ် အာဒါ ဘေ။ 5 န့ ဘော မုး ပွုန် ဇဝ်ဖြာ အီ ဘ်ု ရိတ် အာဆာက် အေ ကူပ် ညှိုမ် အေ ဒီ အန်၊ တဲး အန် ပွိုန် ဒီ ချွတ် အေ။ ပီ ဒီ ဘူင် ဇဝ်ဖြာ ဇိုဝ် တီ၊ န့ ဒီ ဘော လိုဝ်း ဆီချာ ပန် ဒီ တူတ့် ဇာတ် နီ။ 6 ဒေါ တီ နီ၊ ဘေ ပီ ဘော လုဝ် ခမ် ဒုက် ဘဲန် မျုဝ် ဘဲန် မျုဝ်၊ ပီ ဘော မိုဝ်း နဝ်း က့လိုဝ် အာဒါ အူ ကာစန် မိူဝ်၊ တဲး နဝ်း ဘေ ယီ ခူယ် ဒါခိုယ် ကာဆဝ် ကူပ် ပဲ့ ဟဲ့ ကာလာင် အုဝ် ဇိုဝ် တီ ဒီ ဘေ ဒွန် မျုဝ်။ 7 ပီ လုဝ် ခမ် ဘေ တီ၊ န့ တဲး ဇဝ်ဖြာ ထေဝ် ဒီ ယွတ် ယုဝ် ဘေ ညှိုမ် ဆီချာ။ န့ ပီ ခြိဝ် အီ လုဝ် ဒင် ခဲင် ငဝ် ဘော လုဝ် ထာရွင်။ ဆေ ဘေ ညှိုမ် ဆီချာ၊ ငဝ်း ဘေ ဟဲ့ တာင် လွှိုမ် ခြိဝ် ဇဲတ်။ ခြိဝ် တီ၊ ပီ ဘော ဟဲ့ ဘွတ် မိူဝ်၊ န့ ယီ နပ် ဒီ လိုဝ်၊ နပ် ဒီ ဟြာယ်။ ဆေ ဘေ ဟဲ့ ခမ် ဒုက် ဇိုဝ် တီ၊ ဇဝ်ဖြာ ဒီ ဘော အိူပ် မျုက် ဘေ ဘော တဲး ဘေ မိုဝ်း ဆာရေ ပန် ဒီ ဝီ တး လူင် ဇဝ် ယေဆူ။ 8 အန် ဇဝ် တီ၊ ဘေ ပီ ဆ ဒွိုမ် ယိုဝ် အန် မိူဝ်၊ ဘေ ယီ ရွက့် အန်။ ဘော ဒေါ တီ နီ မိူဝ်၊ ဘေ ညှမ် ယိုဝ် အန်၊ ဘေ ယီ ညှိုမ် အန် ဘော မိုဝ်း နဝ်း ဒါခိုယ် ကာဆဝ် ကော ဟူ နပ် ဒီ ကာလာင်။ နဝ်း ဒါခိုယ် ဘေ တီ၊ န့ တဲး ဘေ မိုဝ်း ဆာရေ၊ မိုဝ်း ဘော အာဖုင် ဒင်ခုဝ်။ 9 ဘေ ဟဲ့ ဒါခိုယ် ပါယ် တီ ခုဝ်၊ ပန် ဒီ ဝီ တး ဇဝ် ယေဆူ၊ အန် ဒီ ချွတ် နဝ်း ဖွိုမ် ဘေ။ ပါယ် တီ၊ ဘေ ဒီ ပွိုန် တူတ့် ဒွန် မျုဝ် ခဲ့ ပီ ညှိုမ် ဘေ။

10 ဂေ ဒူအီ အီ ဘျာန် ဂြုဝ်း ဇဝ်ဖြာ၊ ဂေ ဟဲ့ ဒွိုမ် ကာလာင် လွင် ဂေဇူ ပီ ဒီ ဒွါ ဇဝ်ဖြာ ဒီ ဘေ တီ။ ဂေ ဘော ဟဲ့ ဟြေတ့် ဘော ဒီမွှတ် ကော ဇေ့ လွင် ဇဝ်ဖြာ အီ ဒီ ချွတ် ဒူအီ။ 11 ဂေ ဟဲ့ ဆီ နပ် ဆီချာ ပန် မှဝ် အန် ဒီ ချွတ် ဂေ။ ဂေ ဆီ နပ် ဘော မှဝ် အန် ဒီ ပါယ် ဒီ ချွတ် ဂေ။ ခုဝ်၊ နဝ်း ဖွိုမ် ဇဝ် ယေဆူ အီ ကွယ် ခဲင် နဝ်း ဂေ ဟဲ့ ဘျ တဲး ဂေ နပ်၊ ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ၊ အန် လုဝ် ခမ် ဒုက် တာင် ကာဆဝ်။ ဟဲ့ ဟွတ့်၊ အန် ပီ ဒီ ဝီ မိုဝ်း အာဖုင် ဒင်ခုဝ် တာင်။ 12 ဇဝ်ဖြာ ဟဲ့ ဟွတ့် ဘျ ဒီ ဂေ ဒူအီ အီ ဘျာန် ဂြုဝ်း ဇဝ်ဖြာ တီ၊ န့ တူ မုး ဂေ အီ ဒီ ပွိုန် အာဂျိုဝ် တီ။ န့ ယီ မုး ဘေ အီ ဒီ ပွိုန်။ ဒေါ တီ နီ၊ န့ မုး ဂေ ဒူအီ အီ ဟဲ့ ကာလာင် ဒီ ဘေ လွင် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်၊ ဂေ ဟဲ့ ဝီ ကာလာင် လွင် ဇဝ်ဖြာ ဒီ ချွတ် ဘေ။ န့ မုး နဝ်း ဖွိုမ် ဇဝ်ဖြာ ပီ တိုယ် ဇဝ်ဖြာ လူင် ခဲင် ဂါင်ဟြာဝ်၊ အန် ဟဲ့ တဲး ဂေ ကာလာင် တဲး ဘေ ထူမ်။ ဘော ဂေ အာမူ အာမာတ် ဇဝ်ဖြာ ဆီ နပ် ကာဆဝ် လွင် အန် တီ။

13 ကူပ် န့ ပါယ် တီ၊ တဲး ဘေ ဘ့လေး အာငျာန် ဘေ၊ တဲး န့ ပီ ဒါ ဆိုက် အီ ဟဲ့ ခြိုင် ဒီ ကာဂုဝ်း။ တဲး ဘေ ဘော ဆာဒိက် ဘိုင် ဆီချာ ပီ ဒီ ဂေဇူ ဇဝ် ယေဆူ ဒီ ဘေ ပန် ဒီ ဝီ တး လူင် အန် ဒဲင် ကာဒါယ် နီ။ 14 ကွဲ့ တဲး ဘေ ဘူင် ဒူပ် ပီ အိုင် ဘေ ပီ အာတ့် ညှိုမ် ဘေ ဇဝ်ဖြာ။ ခုဝ်၊ ဘေ ဟဲ့ ဟွတ့် ဘဲန် ဂွန် ဇဝ်ဖြာ အီ နပ် ဒီ ထူမ် ဂြုဝ်း အန်။ 15 ပီ ဘူင် ဘေ ဒွန် မျုဝ် တဲး န့ ဆီငါ ဘွတ်၊ တဲး န့ ကာဒါန် ဒီ ဇဝ်ဖြာ အီ ဟဲ့ ရဝ်း ဘေ၊ အီ ဟဲ့ ဆီငါ ဘွတ်။ 16 ခုဝ်၊ ခဲင် ဘပ် ဇဝ်ဖြာ န့ ဟဲ့ ဒဲမ် အုန် တဝ်း၊ “ကူပ် ဟဲ့ ဆီငါ ဘွတ် အုဝ်၊ အုဝ် ဆီ တဲး ဘော ဘေ ဆီငါ ဘွတ်။”

17 ဇဝ်ဖြာ တူ မိုဝ်း ဒူင် ရွက့် ဒူင် ဇွင့်။ အန် မိူဝ် ဒီ ဆုင်ဖျာတ် ဒူပ် ခဲ့ ပီ ဘူင် ဝီ မှဝ် ဝီ အန်။ ဘေ မိူဝ် ဟဲ့ ဆာခိုဝ် ဒီ အန် ဇဝ် တီ တဝ်း၊ “အိုယ် ဂုန့် ယေ။” ခုဝ် အန် တီ တဲး ဘေ ရုဝ်ဆေ ဘော ယုဝ် အန် ဇဝ် ဆေဆေ၊ တဲး ဘေ ကွယ် ဒဲင် ကာဒါယ် နီ၊ တဲး န့ ပီ ဘေ မုး ခဲတ့်။ 18 ဘေ ဟဲ့ ဒွိုမ် ဒူပ် ဟိတ် ဘေ အီ တူ မိုဝ်း ဒီခုဝ်။ ဂေ ဂုန့် ဒင် ဘေ ဒေါ မွိုန် ဟဲ့ ဒွိုမ် ဘူင် ဇိုဝ် တီ ဘော မာနုဝ် ဘေ တဲး ဘေ ဘူင် ဒူပ်။ ဇဝ်ဖြာ ယီ ဟဲ့ ထုတ် လေး ဘေ၊ ကွဲ့ ဟူ တဲး ဘေ လုဝ် ဒူပ် ဇိုဝ် တီ။ ခုဝ်၊ တဲး ဘေ လှုဝ်း ဆေဆေ၊ န့ တူ မုး ရွိုန် ဂေ ခြိဝ် ပီ ဒွါ ဇဝ်ဖြာ တဲး အန် ထုတ် လေး ဘေ။ န့ မိူဝ် တူ မုး ကြုဝ်ကြာမ် အီ နပ် ဒီ လိုဝ်၊ ပီ ဒွါ အန် ဇဝ်။ 19 န့ ယီ မုး ဇဝ် ယေဆူ အီ ဟဲ့ ခမ် ဒီ ယမ် ကာဒါင် ဘေ။ ဇဝ်ဖြာ ဟဲ့ ဒွါ အာဆာက် အန် အီ ဟဲ့ ငဝ်း တာင် ကာဆဝ်၊ တဲး အန် ချွတ် ဘေ။ အန် ဟဲ့ ပီ ဂွန် မာဘူ အီ တူ မိုဝ်း ဒူင် စှေ၊ ပီ လုဝ် လှူ ဂေ ဒူအီ။ 20 ဇဝ်ဖြာ ဟဲ့ ရဝ်း ဇဝ် ယေဆူ တီ ဆိန့် အာတ့် မိုဝ်း ကာဒါယ် ဘော ဂါင်ဟြာဝ်။ အန် ဇဝ် ယီ ဟဲ့ တဲး အန် လူင် ဒဲင် ကာဒါယ် ဒေါ တီ နီ ဒေါ မုး အာခြာဝ် ဒီ ကာဒဲ့ ဟွတ့် တူတ့်။ အန် ဟဲ့ ဘူင် ပါယ် တီ၊ တဲး န့ ဘဲန် အာဂျိုဝ် ဒီ ဘေ။ 21 ကူပ် တး ဇဝ် ယေဆူ တီ၊ ဘေ မိူဝ် ပွိုန် ဒီ ညှိုမ် ဘိုင် ဇဝ်ဖြာ အီ ဟဲ့ တဲး ဇဝ် ယေဆူ ဝီ ယိတ့် ဝီ အိမ်။ အန် မိူဝ် တဲး ဇဝ် ယေဆူ မိုဝ်း အာဖုင် ဒင်ခုဝ်။ ခုဝ် အန် တီ ဘေ မိူဝ် ညှိုမ် ဘော နှဝ့် န့ဒဝ့် ဇဝ်ဖြာ။

22 ကူပ် ဟဲ့ ထူမ် ဘေ ဂြုဝ်း ဇဝ်ဖြာ၊ န့ ဘော တဲး ဘေ ဘဲန် ဒူအီ အီ ဆီငါ ဘွတ်။ န့ တဲး ဘေ ဘော နပ် ဒီ ရွက့် ခါခ်ု ဂေ ဘီနွင် အီ ညှိုမ် ဇဝ် ယေဆူ။ ခုဝ်၊ တဲး ဘော နဝ်း ဘော ဖွိုမ် ဘေ ဝဲ လာယ် ရွက့်။ 23 ဘေ လုဝ် လာယ် ရွက့် ကူပ် ဟဲ့ ဘဲန် ဘေ ဒူအီ ကာမာယ် ကူပ် ညှိုမ် ဘေ ဂြုဝ်း ဇဝ်ဖြာ အီ တူ နပ် ဒီ လိုဝ် အီ ကွယ် ဆေဆေ။ န့ ပီ ဘေ ဟဲ့ ဂွိုတ် ပေါ အူ ဇေန့်၊ ယီ တူ ပီ ဂွန် အီ ဂွိုတ် ဒီ ဒူအီ။ 24 ခုဝ်၊ ခဲင် ဘပ် ဇဝ်ဖြာ န့ ဟဲ့ ဒဲမ် တဝ်း၊ “ခဲ့ ကွယ် ဒူအီ ဘောကာဂ့လျီတ်၊ ဂေ ပီ ပေတ့် ဂေ ပြဲ။ အာဖုင် ဒင်ခုဝ် ဂေ မိူဝ်၊ န့ ပီ ဘုဝ်း ပေတ့် ဂေ ဘုဝ်း ပြဲ။ ပြဲ ဂေ ပေတ့် ဘော နပ် ဒီ ဟျီ့ ကာဟဝ်း။ ဘုဝ်း အန် မိူဝ် ဘော နပ် ဒီ ရး ဒီ စုဝ်း။ 25 အီ မုး ဂြုဝ်း ဇဝ်ဖြာ၊ န့ ယီ ကွယ် ဆေဆေ။” ဂြုဝ်း ဇဝ်ဖြာ တီ၊ န့ မုး လွင် ဇဝ် ယေဆူ အီ တဲး နဝ်း ဒူအီ ဒါခိုယ်။ ဘေ မိူဝ် ဟဲ့ ဟွတ့် ထူမ် ဂြုဝ်း တီ။