အုဝ် ဝီ ကာလာင် ပေါ အူ မျုဝ် ဒီ ဘေ ဒူအီ ခြမ်။ ဘေ လုဝ် ယာမ် ဘော ဒတ် တာင်။ ခုဝ်၊ ဘေ ဒီ ကာဒုး ဒုက် ဘဲန် မျုဝ် ဘဲန် မျုဝ်။ 2 ဒုက် တီ ဟီ တး၊ ကြုဝ်ကြာမ် ဘေ ဒီ လိုဝ် တူတ့်။ ဘော မာဖျာပ် ဂေ မာဝ ဒီ ဟူမ် ခြိုင် ဘေ။ 3 ခြိဝ် ဂေ ရွိုန် ဘေ မိူဝ် ဒီ အျီင် ရျီး။ ကူပ် အျီင် ရျီး တီ န့ ဒီ လိုဝ်း ဆီချာ၊ ဘေ တူ တာ ကြုဝ်ကြာမ် ဘေ၊ စွယ် ဒူအီ ဂိန်။ ခုဝ် အန် တီ ဇဝ်ဖြာ ဒီ ဒမ် မှာပ် ဒီ ဘေ၊ တဲး ဘေ ကာဒုး ဒုက် ပီ ငဝ် ဟူမ် ယင် ဘေ။ ကူပ် ကာဇု ဘေ ကြုဝ်ကြာမ် တီ၊ အာခြာဝ် ဟဲ့ ကာတတ် ဇဝ် ယေဆူ ဒီ ဝီ တး၊ ဘေ ဒီ ခမ် ဒုက် ဇိုဝ် တီ။ 4 တဲး ဘေ ထူမ် ပီ တဝ်း အုဝ်။ ဘေ ဟဲ့ ဇာင် ဒူအီ ဆုဝ့် ပီ ဆမ် ဘေ။ ဘေ ယီ တူ ဒွါ ရွိုန် ခဲ့ လုဝ် ဘေ ဒွါ။ လွင် မှာပ် ဘေ တီ ဇဝ်ဖြာ ဟဲ့ နပ်။ ဇဝ်ဖြာ အီ မိုဝ်း ပွုန် တာင် လွှိုမ် တူတ့်၊ အန် ဟဲ့ ထူမ် ခဲ့ ယာမ် ဂေ ဒူအီ အီ ဆုဝ့် ငှုဝ် ဘေ။ 5 ဒေါ ကွယ် ဘေ ဒဲင် ကာဒါယ် နီ၊ ဘေ ဟဲ့ ကွယ် ဒါခိုယ်၊ အာဝ် မိုဝ်း ပီ ဒီ လုဝ် မာဆေ။ ခဲ့ ပီ ဆီ ပွိုန် ဘေ၊ ဘေ ဟဲ့ ပွိုန်။ ဒေါ အန် တီ ဘေ ဟဲ့ ဟူမ် တဲး ဘေ ဂ့လန့် တဲး ဘေ ပီ ဒုဝ် ဆတ်ဒါဝါ အီ ဟူမ် တဲး ဂေ ဂ့လန့် အာတ့် ငဝ်း အီ ဒီ ဟူမ် ယင် ဂေ။ 6 ဘေ မိူဝ် ဟဲ့ ဒမ် မှာပ် ဒီ ဒူအီ မွှိုမ်၊ ဘူင် တဲး ဂေ ကော ယမ်။ ဂေ ဒူအီ မွှိုမ် တီ မိူဝ် ခမ်၊ တူ တဝ်း မာဆေ။

7 ခုဝ် အန် တီ ဘေ ဘီနွင်၊ ဘေ လုဝ် အူတ် နဝ်း၊ တဲး ဘေ ခမ် ဒုက် ပီ ဒွါ အီ ဟဝ် ဒီ ဘေ၊ တဲး ဘေ နှဝ့် ပန် ဒီ ဝီ တး ဇဝ် ယေဆူ လူင် ဒဲင် ကာဒါယ်။ ဆေ န့ မုး ဒူအီ ရန့် မာန် ရန့် နာ၊ ဆေ အန် ဟဲ့ ဟွတ့် ဆမ် ငှုဝ်၊ အန် ဝီ နှဝ့် လှေန့်၊ တဲး ငှုဝ် ကာမာယ် ကော လေး။ ငဝ်း ငှုဝ် ကာမာယ် တီ ဟဲ့ ကိူန်။ ခုဝ်၊ အန် ခမ် ဒီ နှဝ့်။ အန် နပ် ဒီ အူတ် နဝ်း၊ နှဝ့် တဲး ဂ့လာယ် တး အာတ့် ဆမ် ဘော ဝါယ် ဟဲ့ ဟွတ့် ဆမ်။ 8 ပါယ် တီ ဘော ဘေ လုဝ် နှဝ့် ဇဝ် ယေဆူ၊ တဲး နဝ်း ဘေ ညှိုမ် ဆီချာ။ ဇဝ် ယေဆူ ဟဲ့ ကာတတ် ဒီ ဝီ တး။ 9 ဘေ ဘီနွင်၊ ကွဲ့ တဲး ဘေ ကာလာင် ဂြုဝ်း တူ မွှိုမ်။ ဆေ ဘေ တူ ထူမ် ဂြုဝ်း တီ၊ ဇဝ်ဖြာ ဒီ ဒမ် မှာပ် ဒီ ဘေ။ ဒါ အီ ဆုင်ဖျာတ် အာမူ ဘေ ဟဲ့ ကာတတ် ဒီ တး။

10 ဘေ ဘီနွင်၊ ဘေ လုဝ် လှုဝ်း ဂေ ဒူအီ အီ ဘျာန် ဂြုဝ်း ဇဝ်ဖြာ။ ဂေ ဟဲ့ အူတ် နဝ်း၊ ဟဲ့ ခမ် ဒုက် ဘဲန် မျုဝ် ဘဲန် မျုဝ်။ ခဲ့ ပီ အူတ် ဂေ နဝ်း၊ တဲး ဘော ဘေ ညိုင် ဂေ။ 11 ဘေ မိူဝ် ဟဲ့ နပ်၊ ယေ ဟဲ့ ကာလာင် လွင် ဒူအီ အီ ဘျာန် ဂြုဝ်း ဇဝ်ဖြာ ဂေ တီ၊ ဂေ ဟဲ့ ဒါခိုယ် ကူပ် ခမ် ဂေ ဒုက် ဒွန် မျုဝ်၊ ယီ တူ ဝဲန် ဂါန် ဇဝ်ဖြာ။ ဘေ ဟဲ့ ဒွိုမ် ထူမ် လွင် ဒါ အာယုဝ်ဘာ တွိုန်။ အန် ဟဲ့ ခမ် ဒုက် တာင်၊ ယီ တူ ဝဲန် ဇဝ်ဖြာ။ ဟဲ့ ဟွတ့်၊ ဇဝ်ဖြာ ဝီ မွင့်ကာရာ ဒွါ ဒီ အန်။ ဇဝ်ဖြာ ဒီ စွယ် ဘော ကာဝေ ဒူအီ ဆေဆေ။

12 ဘေ ဘီနွင် အုဝ်၊ ဒဲင် ပဲ့ ဟဲ့ ကာလာင် အုဝ် ဇိုဝ် တီ တူတ့် ဒွန် မျုဝ်၊ ဘေ လုဝ် ဒူပ် ပီ တဝ်း အုဝ် နီ။ ကွဲ့ ဒိူင် တဝ်း၊ “ဆေ ဂြုဝ်း အုဝ် တူ မှာန်၊ တဲး ဘ့လေ ကာဆး ဒး အုဝ်။” ကွဲ့ တဝ်း၊ “ဆေ အုဝ် ကာလုဝ်၊ တဲး ကာဒါယ် ညွှတ် အုဝ်။” ကွဲ့ တဝ်း ဂြုဝ်း ဇိုဝ် တီ။ ဆေ ဟဲ့ မုး၊ တဲး ဘေ တဝ်း “ဟဲ့ မုး။” ဆေ အာဝ် မုး၊ တဲး ဘေ တဝ်း၊ “အာဝ် မုး။” ခဲ့ တီ ဘေ လုဝ် ကာလာင်၊ ကွဲ့ တဲး ဇဝ်ဖြာ ဒမ် မှာပ် ဒီ ဘေ။

13 ဆေ န့ ယီ မိုဝ်း ဘီနွင် ကာတဲ ဘေ၊ အီ ဟဲ့ ကာဒုး ဒုက်၊ တဲး အန် ဆာခိုဝ် ဒီ ဇဝ်ဖြာ။ ဆေ န့ မုး ဒူအီ ဒါခိုယ်၊ တဲး အန် တဝ်း န့စေန့်၊ အိူပ် ဇဝ်ဖြာ ခဲင် နဝ်း။ 14 ဆေ န့ မိုဝ်း ဒူအီ ကာတဲ ဘေ အီ ဟဲ့ ဆဝ်၊ မိုဝ်း ရောဂါ၊ တဲး အန် ဒဲ့ ဂေ ဒါ တာင် ခဲင် ဖိုင် ဇဝ် ယေဆူ။ တဲး ဂေ တး၊ ဖဝ်း နာမန် ဒဲင် ဂိန့် အန်၊ ဂါဝ် ပွုန် ဇဝ် ယေဆူ၊ ဆာခိုဝ် ဒါင် အန်။ 15 ဆေ ဂေ ဆာခိုဝ် ပါယ် တီ ဘော ညှိုမ် ဘိုင် ဇဝ်ဖြာ၊ န့ ဒီ တဲး ဒူအီ ဆဝ် ဝီ ကဲန်။ ဇဝ်ဖြာ ဒီ တဲး အန် ဝီ ပွိုန် ယိတ့် ဟာဝ်။ ဆေ ဒူအီ ဆဝ် မိုဝ်း မှာပ်၊ ဇဝ်ဖြာ ဒီ ဘော ဂဝ်း ဝဲန် မှာပ် အန် တီ။ 16 ခုဝ် အန် တီ ဘေ ဘော လုဝ် လာယ် ကာလာင် မှာပ် ဘေ၊ လာယ် ဆာခိုဝ် ဒါင် ဘေ၊ တဲး ဘေ ကဲန်။ ဆေ ဒူအီ မိုဝ်း နဝ်း ဆိူဝ် နဝ်း မှာန်၊ ပီ ဆာခိုဝ် အန် မိုဝ်း ပွုန် တာင်။ အန် ဒီ ပွိုန် ပီ မှာန့် အန်။

17 န့ ယီ မုး အာအေလီယ တွိုန်၊ အန် မုး ဒူအီ ပီ အေ။ အန် ယီ ဆာခိုဝ် မှာန့် ကာဆဝ်၊ ကွဲ့ တဲး ဂ့လာယ် စုဝ်း။ ဟဲ့ ဟွတ့် ဂ့လာယ် မိူဝ် တူ စုဝ်း အာဒါ အူယ် ဆီနမ် ဒီ ဒဝ် မာဂျီန်။ 18 ဝါယ် အန် တီ အန် ဝီ ဆာခိုဝ် ပေါ အူ ဇေန့်။ ဟဲ့ ဟွတ့်၊ ဂ့လာယ် ဝီ စုဝ်း ခဲင် ဂါင်ဟြာဝ်၊ တဲး န့ ဝီ လတ့် ပီ ဒီ ဟူမ် ဒဲင် ကာဒါယ်။

19 ဘေ ဘီနွင် အုဝ်၊ ဆေ န့ မိုဝ်း ဒူအီ အူ ဝီ ကာတဲ ဘေ၊ ဆေ အန် ဟဲ့ ဝး အာဝ် ဟူ ဒူပ် နာ မှာန်။ ဆေ န့ ယီ မိုဝ်း ဒူအီ အီ ဝီ ဒဲ့ တး အန်၊ ဝီ စွယ် တဲး အန် ဝီ ဒူပ် ဆီချာ ဇဝ်ဖြာ၊ ဒူအီ တီ ဟဲ့ ဘူင် နာ မွှိုမ်။ 20 ခုဝ်၊ အုဝ် တဝ်း ဒီ ဘေ၊ ဆေ ဒူအီ အူ ဝီ ဟဲ့ ဘူင် မှာပ်၊ ဆေ ပေါ အူ ဝီ ဝီ စွယ် တဲး အန် ဝး န့တေန့် မှာပ် တီ၊ ဝီ ဟာဝ် ဒူပ် န့တေန့် မွှိုမ်၊ အန် ဟဲ့ ချွတ် ဒူအီ တီ၊ ကွဲ့ တဲး အာဆာက် အန် စှိုမ်။ အန် ဘော စွယ် ကွဲ့ ဟူ တဲး မှာပ် ဝီ မိုဝ်း ကိူန်။

ခဲ့ တီ အုဝ် အာယာကူပ် ဟဲ့ ဒဲမ် ပဲ့ ဒီ ဘေ ဒူအီ အီ ညှိုမ် ဇဝ် ယေဆူ။