မှဝ် န့ ပါယ် ပီ လာယ် ကာဂုဝ်း လာယ် ကာထဲန့် ဘေ။း န့ ပါယ် နီ။ နဝ်း ဘေ၊ န့ မုး နဝ်း ဆီ ပွိုန် ဘဲန် မျုဝ် ဘဲန် မျုဝ်။ ပီ ဆီ ပွိုန် ဘဲန် မျုဝ် ဘဲန် မျုဝ် ဇိုဝ် တီ၊ န့ ပီ ဟဲ့ လာယ် ကာဂုဝ်း ခဲင် နဝ်း ဘေ။ 2 ခဲ့ ပီ ဆီ ပွိုန် ဘေ၊ ဘေ တူ ပွိုန်။ ဘေ ဘော ငဝ်း အီ၊ တဲး ဘေ ပွိုန်။ ဘေ ယီ တူ ပွိုန် ခဲ့ ပီ ဆီ ပွိုန် ဘေ။ ဟဲ့ ဟွတ့်၊ ဘေ ဝီ လာယ် ရူ လာယ် ကာဂုဝ်း။ ကူပ် တူ မှာန့် ဘေ ဒီ ဇဝ်ဖြာ၊ ဘေ တူ ပွိုန်။ 3 ဆေ ဘေ ယီ မှာန့် ဒီ ဇဝ်ဖြာ၊ ဘေ တူ ပွိုန် ပီ မှာန့် ဘေ ကူပ် တူ ကာဆိူဝ် နဝ်း ဘေ။ ပီ ဆီ ပွိုန် ဘေ၊ ဘေ ဆီ တဲး န့ လဝ့် မီ နဝ်း လောဖ ဘေ။ ဘေ တူ ဆီ တဲး န့ လဝ့် နဝ်း ဇဝ်ဖြာ။

4 ပီ ဘူင် ဂေ ဒီ ဇဝ်ဖြာ၊ န့ ပီ ပီ ဘူင် ဂေ အီ လုတ့် အီဘိုန့်။ ဘေ လုဝ် နပ်၊ ဆေ ဘေ လာယ် ကာဂိုက် ဒီ ဒူအီ ဟဝ် အီ တူ ညှိုမ်၊ ဘေ ဒီ ကာယဝ်း ဒီ ဇဝ်ဖြာ။ ခုဝ်၊ ဆေ န့ မိုဝ်း ဒူအီ အူ ဝီ၊ တဝ်း ဒီ ဘဲန် ဂိုက် ဂေ ဒူအီ တူ ညှိုမ် ဇဝ်ဖြာ၊ အန် ဝီ ဘဲန် ရန်ဆူ ဇဝ်ဖြာ။ 5 ခဲင် ဘပ် ဇဝ်ဖြာ န့ တဝ်း လွင် နဝ်း ဖွိုမ် ဇဝ်ဖြာ အီ ကွယ် ခဲင် နဝ်း အေ၊ အန် လှယ့် အေ၊ တဲး အေ ရွက့် မီ ဇဝ်ဖြာ။ ဘေ လုဝ် လှုဝ်း လွင် အန် တီ၊ ကွဲ့ တဲး ဘေ ဝဲန် ဂြုဝ်း တီ။ 6 ဇဝ်ဖြာ ယီ ကာဝေ ကာဆဝ် အေ၊ ဒွါ နဝ်း မှာန် ဒီ အေ။ ခုဝ် အန် တီ န့ ဟဲ့ ဒဲမ် အုန် ခဲင် ဘပ် ဇဝ်ဖြာ တဝ်း၊ “ဇဝ်ဖြာ တူ စွယ် ဒူအီ အီ ပီခိုက် နဝ်း။ အန် ယီ ကာဝေ ဒူအီ အီ တူ ပီခိုက် နဝ်း။”

7 ခုဝ် အန် တီ တဲး ဘေ တဲး ဇဝ်ဖြာ အိုပ် နဝ်း ဘေ။ ဆေ ဘုဝ် ကာနမ် အီ စိူဝ် ဆာတာန် တး ကာတတ် ဘေ၊ ဘေ လုဝ် ကာဘိတ် နဝ်း ဘေ ဘော ဝဲန် ဂြုဝ်း အန်။ ပန် တီ အန် ဒီ ဝီ တဝ် တ ဘေ အူ ဇေန့်။ 8 ဆေ ဘေ ယီ တဝ်း ဒီ ကွယ် ကာတတ် ရိုမ် ဒူပ် ဇဝ်ဖြာ၊ ဇဝ်ဖြာ ဒီ ဝီ တး ကွယ် ကာတတ် ဘေ။ ဘေ ဒူအီ အီ ဘူင် မှာပ် ဆေဆေ၊ တဲး ဘေ ဝဲန် မှာပ်၊ တဲး န့ ပီ ဘေ ဘာယ် ဒဲ ဘေ၊ တဲး န့ ဝီ ဘွတ်။ ဘော ဘေ ဒူအီ အီ မိုဝ်း နဝ်း ကာဘ့လျီ့ ကာဘ့လ၊ တဲး ဘေ ဝဲန် နဝ်း တီ၊ တဲး န့ ဝီ ဘဲန် နဝ်း ဆီငါ ဘွတ်။ 9 တဲး န့ ဘဲန် နဝ်း က့လိုဝ် နဝ်း လိုဝ် ဒီ ဘေ ကူပ် မှာပ် ဘေ၊ တဲး ဘေ ဘော ယာမ် တာင်။ အာဆေ ကာညး၊ တဲး အန် ဝီ က့လိုဝ်။ အာဆေ ခူယ်၊ တဲး အန် ဝီ ဘဲန် နဝ်း စန်၊ နဝ်း အာဝ် ဒါခိုယ်။ 10 ပါယ် တီ ဘေ လုဝ် ပီတျီမ် နဝ်း ဘေ၊ ဂူမ် ဒီ အာတ့် ဇဝ်ဖြာ။ ဟဲ့ ဟွတ့်၊ ဇဝ်ဖြာ ဒီ တဲး ဘေ ဝီ ယိတ့်၊ ဝီ တဲး ဘေ မိုဝ်း နဝ်း တာင်။

11 ဘေ ဘီနွင်၊ ကွဲ့ တဲး ဘေ လာယ် ကာလာင် နာ တူ မွှိုမ်၊ နာ စာဝ်။ အာဆေ ကာလာင် နာ တူ မှာန် လွင် ဘီနွင် အန် ဘော ဖျာက် အန်၊ န့ ပီ၊ အန် ဖျာက် ဒါရာ ဇဝ်ဖြာ တဝ်း၊ န့ တူ မှာန်၊ အာဝ် လုဝ် ရွက့် အီ ဟဝ် ဒူပ် ပီ စ်ု ဒါရာ ဇဝ်ဖြာ။ ဆေ ဘေ ယီ ဘူင် ပါယ် တီ၊ ဘော ဘေ အာဝ် ဟူ ဒူပ် ဒါရာ ဇဝ်ဖြာ။ န့ ပီ ဘေ ဟဲ့ ဝဲန် ဒါရာ တီ တဝ်း၊ န့ တူ မှာန်၊ အာဝ် လုဝ် ဒူပ်။ 12 န့ မိုဝ်း မီ ဇဝ်ဖြာ အူ ကာဒင် အီ ဟဲ့ ဒွါ ဒါရာ။ မီ အန် ပွိုန် ဒမ် မှာပ် ဒီ အီ။ အန် ပွိုန် ချွတ် ဒူအီ ဘော တဲး အာဆာက် ဂေ စှိုမ်။ ဆေ န့ ယီ မုး ဘေ၊ အာဝ် မိုဝ်း အာဆေ ခ့ဝါင် ဘေ ဆုင်ဖျာတ် အာမူ အီ တဝ်း၊ ဂေ မိုဝ်း မှာပ်။

13 ဘေ လုဝ် ဝီ ထူမ် ပေါ အူ မျုဝ်။ ဘေ နပ် ဒီ တဝ်း၊ “ခဲညှာ ယေ ဒီ ဟာဝ် မိူင် နာ နီ၊ မိူင် နာ နေန့်။ ယေ ဒီ ဟာဝ် ကွယ် ခဲင် မိူင် တီ အာဒါ အူ ဆီနမ်၊ ဝီ ကာစိုဝ်း ကာယွင့် ကြုဝ်ကြာမ်၊ တဲး ယေ ပွိုန် ကိူန် ရွိုန်။” 14 ဆေ ဘေ တဝ်း ပါယ် တီ၊ ဘေ ယီ တူ နပ်၊ ခဲညှာ န့ ဒီ ပါယ် မှဝ်။ အာဆာက် ဘေ အာဝ် တူင့်။ န့ ပီ ဒက် ငဝ် အီ ပွိုန် ယိုဝ် အာဒါ အူ ကာစန်။ ဟဲ့ ဟွတ့်၊ န့ ဟြာယ်၊ အာဝ် ဟူ ပွိုန် ယိုဝ်။ 15 ခုဝ် အန် တီ ဘေ လုဝ် တဝ်း၊ “ဆေ ဇဝ်ဖြာ တဲး ယေ ဘူင်၊ ဆေ ယေ ဆီ ကွယ် ဆီ မိုဝ်း အာဆာက်၊ ယေ ဒီ ဘူင် ပါယ် နီ ပါယ် နီ။” 16 ဘေ ယီ တူ တဝ်း ပါယ် တီ။ ဘေ ကာလာင် ဂြုဝ်း ပီဖုင် ဘော ပီခိုက် နဝ်း ဘေ။ ဂြုဝ်း ဇိုဝ် တီ အာဝ် မွှိုမ်၊ န့ ဘဲန် နာ ဟာယ် နာ မိူက်။ 17 အာဆေ နပ် နာ မွှိုမ် ဘဲန် မျုဝ် ဘဲန် မျုဝ် ပီ လုဝ် အန် ဘူင်၊ ဆေ အန် ယီ တူ ဘူင်၊ န့ ဘဲန် မှာပ် ဒီ အန်။