ဘေ ဘီနွင် အုဝ်၊ ကွဲ့ တဲး ဒူအီ ကိူန် ဘဲန် ဒါ ဆာရာ မာနုဝ် အီ။ ဘေ နပ်၊ ဆေ ယေ ဒါ ဆာရာ ကာလိုပ်၊ ဇဝ်ဖြာ ဒီ ဒမ် မှာပ် ဒီ ယေ လွှိုမ် အီ ဟဝ်။ 2 အေ ဒွန် အီ နပ် ဒီ ကာလိုပ် ဘဲန် ဇေန့် ဘဲန် ဇေန့်။ ဆေ န့ မိုဝ်း ဒူအီ အီ ကာလာင် ဂြုဝ်း တူ ကာလိုပ် ဒေါ မှဝ်၊ နဝ်း အန် အာဝ် ဟူ လုဝ် မ့ပြာယ် မာဆေ။ အန် မိူဝ် ဟဲ့ ပဲ ဒီ အိုပ် တူတ့် ဒုဝ် အန်။

3 အေ နပ် ဒီ ဟပ် န့ကဝ့် ခဲင် မူတ့် မင်ပြွင့်၊ တဲး အန် ဒူပ် ပီ အိုင် အေ။ ဟိန် ဒီတဲတ် တီ နပ် ဒီ အိုပ် တူတ့် ဒုဝ် မင်ပြွင့်။ 4 ဘော ရိုဝ် ဆင်ဖုဝ် ဂေ ဘူင် ပါယ် တီ။ ဒုဝ် ရိုဝ် ဆင်ဖုဝ် ဟဲ့ တာင် ကာဆဝ်။ န့ ဘော လုဝ် ခုန် တး ဘုတ်၊ တဲး ရိုဝ် ဆင်ဖုဝ် ပွိုန် ဒီ ဟာဝ်။ န့ ယီ မိုဝ်း မင် ဘတ် ရိုဝ် အီ ဒီတဲတ်၊ နပ် ဒီ ယဲတ့် ရိုဝ် ဆင်ဖုဝ် တာင် တဲး အန် ဟာဝ် ဒူင် အိုင် ဒူအီ အီ ဘတ်။ 5 ဆီဒ အေ မိူဝ် ပါယ် တီ။ ဆီဒ ဟဲ့ ဒီတဲတ် ခဲင် ဒုဝ် ဘူင့် ဒူအီ။ န့ ယီ ပွိုန် ကာလာင် ဂြုဝ်း တာင်။ တဲး ဘေ ဇေန့်ဇာ ဘော ကာစှူတ့် ငဝ်။ န့ ဒီတဲတ်၊ ယီ နပ် ဒီ ကုး တာင်၊ ဝီ ကာဆိုမ် ပြဲ တာင် ကော တူတ့်။ 6 ဆီဒ အေ ပီ ကာစှူတ့် ငဝ် တီ။ န့ ကွယ် ခဲင် ဒုဝ် အေ၊ နပ် ဒီ ဘူင် နာ တူ မွှိုမ် နာ စာဝ် ဘဲန် မျုဝ် ဘဲန် မျုဝ်။ န့ ပီ ငဝ် အီ လေး ခဲင် ကာလုဝ့် ငါရာယ် ဟဲ့ ပီဒဝ့် ဒီ ဆီဒ အေ၊ တဲး အေ ကာလာင် ဂြုဝ်း တူ မွှိုမ်၊ အီ တဲး အေ ဘဲန် ဒူအီ တူ မွှိုမ်၊ တဲး ဘော အာဆာက် အေ ကော စှိုမ်။

7 အေ အာမျုဝ် ဒူအီ နပ် ဒီ ပဲ ဒုဝ် ဆတ်ဒါဝါ ဘဲန် မျုဝ် ဘဲန် မျုဝ်။ ဘော မာဆိမ် ဘော ဒုဝ် ဆတ်ဒါဝါ အီ ကွယ် ဒဲင် ကာဒါယ် ဘော ဒုဝ် အီ ကွယ် ခဲင် အိုမ်၊ အေ ဒူအီ နပ် ဒီ အိုပ် တူတ့် ဒွန် မျုဝ်။ 8 န့ ယီ တူ မိုဝ်း ဒူအီ အီ နပ် ဒီ ယိူန် ဂြုဝ်း အန်။ ဆီဒ တီ အာဝ် ယေန် ဒေါ မှဝ်။ အန် ဘူင် နာ တူ မွှိုမ် ဆေဆေ။ န့ ပီ ဆီဒ မိုဝ်း အာယ် မာဟန့် အီ ပဲ ဒီ ငဝ်း ယမ် ဒူအီ။

9 န့ မုး ဆီဒ အူ ဘူင့် တီ၊ အီ နပ် ဒီ အိူပ် ဇဝ်ဖြာ အီ မုး ဂုန့် အေ၊ ပီ ဝီ နပ် ဒီ အေး အီ ဟဝ်၊ အီ မုး ဒူအီ ပီ ဘူင် ဘ့လေး ဇဝ်ဖြာ၊ တဲး ဂေ ပီ အာရိုပ် အန်။ 10 ဘော ဂြုဝ်း မွင့်ကာရာ တဲး ဒီ အီ ဘော ဂြုဝ်း ဒိူင် အီ နပ် ဒီ လေး ခဲင် မူတ့် အေ တီ။ ဘေ ဘီနွင်၊ အာဝ် ကာအာပ် အေ ဘူင် ပါယ် တီ။ 11 ဆေ န့ မုး အိုမ် ခိုမ်၊ အာဝ် ပွိုန် လေး အိုမ် ဆီငဲး ဘော အိုမ် ပြာင် ခဲင် အိုမ် ခိုမ် အူ ကာဒဝ် တီ။ 12 ဘေ ဘီနွင် အုဝ်၊ တဲး ဘေ ဘော ဇေန့်ဇာ လွင် ဟေ။ ဆေ န့ မုး ဟေ ဒီပူ၊ အာဝ် ပွိုန် လေး ဘ့လေ နာမန်။ န့ မိူဝ် တူ မိုဝ်း ဟေ မာငုန် အီ မိုဝ်း ဘ့လေ ဒီပူ။ ဘော အိုမ် ခိုမ် ဘော ပါယ် တီ။ ဆေ အိုမ် ခိုမ် လေး အိုမ် ပြာင်၊ အာဝ် ပွိုန် ဝီ လေး အိုမ် ဆီငဲး။

13 ဆေ န့ မိုဝ်း ဒူအီ အီ မိုဝ်း အာငျာန် ကာတဲ ဘေ၊ အန် လုဝ် ဘျ နာ မွှိုမ် ပီ ဘူင် အန်၊ တဲး န့ လိုဝ်း လွင် အာငျာန် အန်။ ဆေ အန် တူ ပီခိုက် နဝ်း အန်၊ ဘူင် နာ မွှိုမ် ဒွန် မျုဝ်၊ ဟဲ့ နပ် ဆီချာ၊ ပီ ဘူင် အန် ဇိုဝ် တီ ဟဲ့ လေး အာငျာန် ဘွတ်။ 14 ဆေ ဘေ ယီ မိုဝ်း နဝ်း ရူ၊ နဝ်း လှယ့် အီ၊ ဆေ ဘေ မိုဝ်း နဝ်း ဆီ ပွိုန် ဒွန် မျုဝ်၊ ကွဲ့ တဲး ဘေ ပီခိုက် ဘေ လွင် နဝ်း ဇိုဝ် တီ။ ကွဲ့ တဝ်း၊ ပီ ဘူင် ဘေ ဟဲ့ မှာန် ဟဲ့ မုး။ 15 အာဆေ ထာင် ပီ ဘူင် အန် ဇိုဝ် တီ ဟဲ့ မုး အာငျာန်၊ န့ တူ မုး အာငျာန် ဘွတ် အီ တး နာ ဒဲင်။ န့ မုး အာငျာန် ဒူအီ၊ အာဝ် ဒူပ် ပီ အိုင် နဝ်း ဖွိုမ် ဇဝ်ဖြာ။ န့ မုး အာငျာန် ပီ ဒွါ ဘုဝ် ကာနမ်။ 16 ခုဝ်၊ ဆေ ဘေ မိုဝ်း နဝ်း လှယ့် အီ ဘော နဝ်း ဆီ ပွိုန် ဒွန် မျုဝ်၊ ဘေ ဒီ နပ် ဒီ ဘူင် ကာဝှ်ု ကာဝျှီန် နာ တူ မွှိုမ် ဒွန် မျုဝ်။

17 ဆေ န့ ယီ မုး အာငျာန် ပီ ဒွါ ဇဝ်ဖြာ ဒီ အီ၊ န့ ဟဲ့ ဘွတ်။ န့ ဘော ဘူင် တဲး အီ လာယ် ဖြူမ်၊ ဘူင် တူတ့် ဒွန် မျုဝ်၊ တဲး န့ ဒါခိုယ်။ န့ တဲး အီ လာယ် ထူမ် ဂြုဝ်း ဘော နပ် ဒီ ကာဝေ ကာဆဝ် အီ ဟဝ်။ န့ ဘော ဘူင် နာ မွှိုမ် ဒွန် မျုဝ်၊ တူ မိုဝ်း ဒူင် ရွက့် ဒူင် ဇွင့်။ န့ မိူဝ် တူ ညိုင်ရာင် ဒေါ မှဝ်။ 18 ဂေ အီ မိုဝ်း နဝ်း ဇိုဝ် တီ၊ ဂေ ပီ ဒူအီ အီ ဆမ် ကာအာင် ဘ့လေ ခဲင် ကာဒါယ်။ ဂေ ဘူင် တဲး အီ လာယ် ရွက့် လာယ် ကာလဝ့်။ ဟဲ့ ဟွတ့် န့ ပီ ပီ ဆမ် ဂေ ဝီ မိုဝ်း ဘ့လေ။ ဘ့လေ တီ ပီ ဒူအီ ဟဝ် အီ ဘူင် နာ မှာန် နာ မွှိုမ်၊ အီ ဟဲ့ ဘြဲ ကိူန်။