ဘေ ဘီနွင် အုဝ်၊ ဆေ ဘေ ညှိုမ် ဇဝ် ယေဆူ၊ အီ မုး ဒူအီ ပီ ရဝ်း ပီ တိုယ် ဇဝ်ဖြာ၊ ဘေ ညှိုမ် အန် ဇဝ် အီ မိုဝ်း အာဖုင် ဒင်ခုဝ်။ ခုဝ်၊ ကွဲ့ တဲး ဘေ မိုဝ်း ဒူင် ရွက့် ဒူင် ဇွင့်။ 2 အူဖာမာ အန်၊ ဆေ န့ မိုဝ်း ဒူအီ အူ ဝီ၊ အန် တာ ခြိုင် စှိတ်၊ တာ ဆီကာနူ ခြိဝ်၊ တး လိုပ် ခဲင် ဇူင် ဘေ၊ ပီ ဝီ မိုဝ်း ဒူအီ ဂိန် အူ ဝီ တာ ခြိုင် ဘြိမ်၊ အန် မိူဝ် တး လိုပ် ခဲင် ဇူင် ဘေ။ 3 ဆေ ဘေ ယိုဝ် ဒူအီ စှိတ် တွိုန်၊ ဘေ ဘော တဝ်း ဒီ အန်၊ “တဲး မဲ တး တုတ့် နာ ဒဲင်။” ဟဲ့ ဟွတ့်၊ ဘေ ဘော တဝ်း ဒီ ဒူအီ ဂိန် တွိုန်၊ “မဲ ဟာဝ် စွင့် နာ ဒွယ်။” ဘေ ဘော တဝ်း ဒီ အန်၊ “တဲး မဲ တုတ့် နာ ခြိုမ်၊ တုတ့် ခူပ် ကာစှူင့် အုဝ်။” 4 ဆေ ဘေ ဘူင် ပါယ် တီ၊ ဘေ မိုဝ်း ဒူင် ရွက့် ဒူင် ဇွင့်။ ပီ ဇေန့်ဇာ ဘေ အာဝ် မွှိုမ်။

5 ဘေ ဘီနွင် ပီ ရွက့် အုဝ်၊ တဲး ဘေ ထူမ် ဂြုဝ်း အုဝ်။ တဲး ဘေ ယွတ် ဒူအီ ပီ ရဝ်း ဇဝ်ဖြာ။ ဆေ ဒူအီ ဟဝ်၊ အီ တူ ညှိုမ် ဝီ တဝ်း၊ ဒူအီ နီ ဟဲ့ ဂိန်၊ န့ မုး ဒူအီ ဝီ တီ၊ ဇဝ်ဖြာ ဟဲ့ တဲး အန် ညှိုမ် ဆီချာ၊ တဲး န့ ပီ အန် ဟဲ့ ခြမ် ခဲင် နဝ်း အန်။ ဇဝ်ဖြာ ဒီ တဲး ဂေ အီ ရွက့် အန် လိုပ် ခဲင် မိူင် ပီ အိုပ် အန်။ 6 ဘေ ယီ တူ ရုဝ်ဆေ ဂေ ဒူအီ ဂိန်။ ဘေ လုဝ် ဇေန့်ဇာ၊ အာဆေ တဲး ဘေ ကာဒုး ဒုက်။ န့ မုး ဒူအီ ခြမ်။ န့ ဘော မုး ဂေ၊ အီ ဖျာက် ဘေ၊ တဲး ဒါ တာင် ဒမ် မှာပ် ဒီ ဘေ။ 7 န့ ဘော မုး ဂေ ဒူအီ ခြမ်၊ ဂေ ခဲန့် ဇဝ် ယေဆူ အီ ဘွတ်၊ အီ ရွက့် ဘေ၊ အီ မုး ဒါ ကာညာ အီ အိုပ် ဘေ။

8 ခဲင် ဘပ် ဇဝ်ဖြာ ဟဲ့ ဒဲမ် အုန် ဒါရာ ဘွတ် အီ တဝ်း၊ “ဘေ လုဝ် ရွက့် အီ ဟဝ်၊ တဲး န့ ပီ ဘေ ရွက့် ဒုဝ် ဘြိမ် ဘေ။” ဆေ ဘေ ဒူပ် ဒါရာ တီ၊ ဘေ ဘူင် နာ မှာန် နာ မွှိုမ်။ 9 ဆေ ဘေ ယီ မိုဝ်း ဒူင် ရွက့် ဒူင် ဇွင့်၊ န့ ဒီ ဘဲန် မှာပ် ဒီ ဘေ။ ဘေ မိူဝ် ဟဲ့ လုတ့် ဒါရာ ဇဝ်ဖြာ။ 10 ခုဝ်၊ အာဆေ တဝ်း အန် ဒူပ် ဒါရာ ဇဝ်ဖြာ၊ အန် ပီ ဘော ကာလိုပ် အီ စဲက် မိူဝ်၊ ဟဲ့ ဟွတ့် ဘဲန် မှာပ် ဒီ အန်။ အန် ဟဲ့ ဟွတ့် လုတ့် တူတ့် ဒါရာ။ 11 ဇဝ်ဖြာ ဟဲ့ တဝ်း၊ “ကွဲ့ လုတ့် အီဘိုန့် အီ။” အန် မိူဝ် တဝ်း၊ “ကွဲ့ ငဝ်း အာဆာက် အီ။” ဆေ န့ မိုဝ်း ဒူအီ အူ ဝီ၊ အန် တူ လုတ့် အီဘိုန့် အီ၊ အန် ယီ ငဝ်း အာဆာက် အီ၊ အန် ဟဲ့ ဟွတ့် လုတ့် ဒါရာ ဇဝ်ဖြာ။

12 ဂြုဝ်း ပီ ကာလာင် ဘေ ဘော ပီ ဘူင် ဘေ၊ န့ လုဝ် ဒူပ် တူတ့် ဒါရာ၊ ကွဲ့ တဲး န့ ဘဲန် မှာပ် ဒီ ဘေ။ တဲး ဘေ လှုဝ်း ဆေဆေ၊ ဇဝ်ဖြာ ဒီ ဒိုဝ်း ဒါရာ အန်၊ ဝီ ဆုင်ဖျာတ် ပဲ့ ဟဲ့ ဘူင် ဒွန် အီ။ 13 ဆေ ဘေ တူ ကာဝေ အီ ဟဝ်၊ ဇဝ်ဖြာ မိူဝ် တူ ကာဝေ ဘေ ပန် ဒီ ဆုင်ဖျာတ် အန် အာမူ ဘေ။ အာဆေ နပ် ဒီ ကာဝေ အီ၊ အန် တူ လုဝ် ယုဝ် ဇဝ်ဖြာ ဆုင်ဖျာတ် အာမူ အန်။

14 ဘေ ဘီနွင် အုဝ်၊ ဆေ န့ မိုဝ်း ဒူအီ အူ ဝီ၊ အန် တဝ်း အန် ညှိုမ် ဇဝ် ယေဆူ၊ အန် ယီ တူ ဘူင် နာ မွှိုမ် ပီ ကာအာပ် ဘူင်၊ ပီ ညှိုမ် အန် အာဝ် မိုဝ်း အာဂျိုဝ် မာဆေ။ ဆေ အန် ညှိုမ် ပါယ် တီ၊ န့ တူ ပဲ ဒီ ချွတ် အန်။ 15 အူဖာမာ အန်၊ ဆေ န့ မိုဝ်း ဘီနွင် အေ အူ ဝီ၊ အီ တူ မိုဝ်း ပီ ဒီ ဟူမ် ပီ ဒီ တာ၊ 16 ဒူအီ အူ ဝီ ကာတဲ ဘေ ယီ တဝ်း ဒီ အန်၊ “တဲး မဲ ဝေန့် ကာင် မဲ၊ တဲး မဲ ဂျာမ်ဆာ။ တဲး ပီ ဒီ ဟူမ် ပီ ဒီ တာ မဲ ကော ဂ့လိုမ်။” ဆေ အန် တဝ်း ပါယ် တီ၊ ယီ တူ ဒွါ ဒီ အန် ခဲ့ ပီ လုဝ် အန်၊ ဂြုဝ်း အန် ပီယေန့်။ 17 န့ ဘော ပါယ် တီ။ ဘော ဘေ၊ ဆေ ဘေ ညှိုမ် ဇဝ် ယေဆူ၊ ဘေ ယီ တူ ဘူင် ပီ ကာအာပ် ဘူင်၊ ပီ ညှိုမ် ဘေ အာဝ် မိုဝ်း ဒီခုဝ်။

18 ဆေ န့ ယီ မိုဝ်း ဒူအီ အူ ဝီ၊ အန် တဝ်း၊ “မဲ၊ တဲး မဲ ညှိုမ်။ အီ မုး အုဝ်၊ အုဝ် ယီ တူ လုဝ် ညှိုမ်။ အုဝ် ဒီ ဘူင် နာ ဘွတ်၊” ဘော ဇိုဝ် တီ အာဝ် မှာန်။ အုဝ် ဒီ ဝီ ဝျီ့ ဂြုဝ်း တီ တဝ်း၊ “အုဝ် တူ ပွိုန် ယိုဝ် ခဲ့ ပီ ညှိုမ် မဲ ဆေ မဲ တူ ဘူင် နာ မွှိုမ် ပီ ပွိုန် ယိုဝ် အုဝ်။ အီ မုး အုဝ်၊ အုဝ် ယီ ညှိုမ်။ အုဝ် ဒီ တဲး မဲ ယိုဝ် ဘော နာ မွှိုမ် ပီ ဘူင် အုဝ်၊ တဲး မဲ ကော နပ် လွင် နဝ်း အုဝ် ဟဲ့ ညှိုမ် ဇဝ် ယေဆူ။”

19 ဆေ ဘေ တဝ်း၊ ဘေ ညှိုမ် န့ မိုဝ်း မီ ဇဝ်ဖြာ အူ ကာဒင်၊ ပီ ညှိုမ် ဘေ တီ ဟဲ့ မှာန်။ ဘော ဂေ ကာနမ် ဟဲ့ ညှိုမ် ပါယ် တီ။ ဂေ ယီ ယုဝ် ကာဆဝ် ဇဝ်ဖြာ ဒီ တဲး ဂေ စုဝ်း ကာလုဝ့် ငါရာယ်။

20 ဆေ ဘေ ညှိုမ် မီ ခဲ့ တီ၊ ဘေ ရိုဝ်၊ တူ မိုဝ်း အာငျာန်။ တဲး ဘေ နပ် ဆီချာ၊ ဆေ ဘေ ညှိုမ်၊ ဘေ ယီ တူ ဘူင် နာ မွှိုမ် ပီ အိုင် ဇဝ်ဖြာ၊ ပီ ညှိုမ် ဘေ တီ အာဝ် မိုဝ်း ဒီခုဝ်။ အုဝ် ဒီ ဘျ ဒီ ဘေ လွင် အန် တီ။ 21 ဘေ နပ် လွင် ဒါ အာဘြာဟမ် တွိုန်၊ အီ မုး ဂုန့် ဒင် အေ။ အန် ဟဲ့ ဒွိုမ် ဒိုဝ်း ဂွန် အန် အီ စိူဝ် အာဆဲက်၊ ဟဲ့ ဘ့လေး အန် ဒဲင် ကာစှူင့် လှူ၊ တဝ်း ဒီ ဆတ် ငဝ်း လှူ အန်။ ကူပ် ဘူင် အန် ပါယ် တီ၊ ဇဝ်ဖြာ ဟဲ့ တဲး အန် မိုဝ်း နဝ်း လုယ်။ 22 ဒေါ ဘူင် အန် ပါယ် တီ အန် ဘော ညှိုမ် ဆီချာ ဇဝ်ဖြာ။ န့ ဘော လိုဝ်း ဆီချာ၊ အန် ညှိုမ် ဘိုင် ဇဝ်ဖြာ။ 23 ပါယ် တီ၊ န့ ဟဲ့ ဘဲန် ပီ ဒွိုမ် ဘ့လေး အုန် ဇဝ်ဖြာ ခဲင် ဘပ် အန် တဝ်း၊ “အာဘြာဟမ် ညှိုမ် အန် ဇဝ်။ ကူပ် ညှိုမ် အန် ပါယ် တီ၊ ဇဝ်ဖြာ တဲး အန် မိုဝ်း နဝ်း လုယ်။” ဒူအီ ဟဝ် မိူဝ် တဝ်း၊ အန် မုး ဂိုက် ဇဝ်ဖြာ။ 24 ပါယ် တီ န့ လိုဝ်း ဆီချာ၊ ဆေ ဒူအီ အူ ဝီ ညှိုမ် ဘော ဘူင် နာ မွှိုမ် ပီ အိုင် ဇဝ်ဖြာ၊ အန် ဒီ ပွိုန် နဝ်း လုယ်။ အာဆေ ယီ တဝ်း၊ အန် ညှိုမ်၊ အန် ယီ တူ ဘူင် ပီ အိုင် ဇဝ်ဖြာ၊ အန် တူ ပွိုန် နဝ်း လုယ်။

25 ပါယ် တီ ဘော ယာ မာလမ် အီ စိူဝ် နာင် ရာဟာပ် တွိုန်၊ ဘော အန် ဟဲ့ ပွိုန် နဝ်း လုယ် ကူပ် ပဲ့ ဟဲ့ ဘူင် အန်။ ဒေါ ဟဲ့ မိုဝ်း ဒူအီ အာ ဝီ ပြာ ဒီ ချွင် ဒီ ယွတ် မိူင် ဒူင် ကွယ် အန်။ အန် ဟဲ့ တဲး ဂါယ် တမ် ခဲင် ကာင် အန်။ ဟဲ့ ဟွတ့်၊ အန် ဝီ တဲး ဂါယ် လေး ပေါ အူ ပ့လုဝ့်။ 26 န့ ဘော ပီ ဒုဝ် ဘူင့် အေ။ ဆေ နဝ်း ဖွိုမ် အေ တူ ကွယ် ခဲင် ဒုဝ် ဘူင့် အေ၊ အေ တူ အိမ်၊ ဟဲ့ ယမ်။ ဘော ပီ ညှိုမ် အေ ဘော ပါယ် တီ။ ဆေ အေ ညှိုမ်၊ ယီ တူ ဘူင် နာ မွှိုမ် ပီ အိုင် ဇဝ်ဖြာ၊ ပီ ညှိုမ် အေ အာဝ် မိုဝ်း အာဂျိုဝ်။