အိုယ် ဘေ ဒူအီ အီ ညှိုမ် ဇဝ် ယေဆူ၊ အုဝ် အာယာကူပ် အီ မုး ဒဲစေန့် ဇဝ်ဖြာ၊ အုဝ် ဟဲ့ ဒဲမ် ပဲ့ နီ တိုယ် ဒီ ဘေ ဒူအီ အာယူဒါ ဂိုဝ် ဒီ အာ ခြိုဝ် အီ ကွယ် ကာယဝ်း ဘဲန် ပ့လုဝ့် ဘဲန် ပ့လုဝ့် ဒဲင် ကာဒါယ် နီ။ တဲး ဘေ ဂျာမ်ဆာ။

2 ဘေ ဘီနွင်၊ အီ ညှိုမ် ပီ အုဝ်၊ ဆေ ဘေ ကာဒုး ဒုက် ဘဲန် မျုဝ် ဘဲန် မျုဝ်၊ တဲး နဝ်း ဘေ ဒါခိုယ် ကာဆဝ်၊ ကွဲ့ တဲး နဝ်း ဘေ က့လိုဝ်။ 3 ခုဝ်၊ ဘေ နပ်၊ ဆေ ဘေ ကာဒုး ဒုက်၊ န့ ထေဝ် နဝ်း ဘေ ယုဝ် ဘေ ညှိုမ် ဆီချာ၊ တူ ညှိုမ် ဆီချာ။ ဟဲ့ ဟွတ့် ထေဝ် နဝ်း ဘေ ပါယ် တီ၊ ဘေ ဒီ ဘော ပဲ ဒီ ခမ် တူတ့်။ ဘေ ဒီ ဘော နပ် ဒီ ယိူန် နဝ်း။ 4 ဘေ ဘော လုဝ် ခမ် တူတ့် ဘဲန် မျုဝ် ဘဲန် မျုဝ်၊ တဲး နာ မွှိုမ် ကော နုဝ့် ခဲင် နဝ်း ဘေ၊ ကွဲ့ ဟူ တဲး န့ မိုဝ်း မာဆေ ပီ လုဝ် ဘျွင် ခဲင် နဝ်း ဘေ။ 5 ဆေ န့ ယီ မိုဝ်း ဒူအီ အူ ဝီ ကာတဲ ဘေ၊ ဆေ အန် လုဝ် အာငျာန်၊ ဟဲ့ ပွိုန် မှာန့် ဒီ ဇဝ်ဖြာ။ အန် ဒီ ဘော ပွိုန် ပီ မှာန့် အန်။ ဇဝ်ဖြာ နပ် ဒီ ဒွါ ကိူန် ဒီ ဒူအီ။ အန် မိူဝ် တူ အေး အီ မှာန့် ဒီ အန်။ 6 အာဆေ ယီ မှာန့် ဒီ ဇဝ်ဖြာ၊ အန် လုဝ် ညှိုမ် ဘိုင် ဇဝ်ဖြာ။ ကွဲ့ တဲး အန် မိုဝ်း နဝ်း ကာလိင် ကာလဲ။ အာဆေ မိုဝ်း နဝ်း ကာလိင် ကာလဲ၊ အန် ပီ မာ အိုမ် အီ ကာဘ့လျီ့ ကာဘ့လ၊ ဟာဝ် နာ ဘုတ် ခုန်၊ အာဝ် ယေန် ဒေါ မှဝ်။ 7 အာဆေ မိုဝ်း နဝ်း ဇိုဝ် တီ၊ အာဝ် လုဝ် ထာင် ဇဝ်ဖြာ ဒီ ဒွါ ပီ ဆာခိုဝ် မှာန့် အန်။ အန် တူ ပွိုန် မာဆေ။ 8 န့ ပီ အန် မိုဝ်း နဝ်း အာ မျုဝ်။ အန် ပီ ဘော ဘူင် မာဆေ မိူဝ်၊ န့ တူ အွင် ဒေါ မှဝ်။

9 ဆေ န့ မိုဝ်း ဘီနွင် ဘေ၊ ဆေ ဂေ အီ ဟဝ် တူ ရုဝ်ဆေ အန် ဘော ထာင် အန် အာဝ် အး၊ တဲး ဒူအီ တီ ဘဲန် နဝ်း ဒါခိုယ်။ ခုဝ်၊ ဇဝ်ဖြာ ဟဲ့ မွင့်ကာရာ ဒွါ အီ ဘွတ် ဒီ အန်။ 10 ဆေ န့ ယီ မုး ဒါ တာင်၊ ကွဲ့ တဲး အန် ပီခိုက် နဝ်း အန်။ ခုဝ်၊ အန် ပီ ဘုဝ်း အီ ကွယ် ခဲင် ပြဲ။ အန် ကွယ် အူ ကာစန်၊ ဟဲ့ ဟွတ့် အာဝ် ဟူ မိုဝ်း။ 11 ဆီငဲ ဟီ လေး၊ ဟီ ဆောဒါတ် ကာဆဝ်။ န့ တဲး ဘုဝ်း ဝီ ဟျီ့ ဝီ ရး၊ အာဝ် ဟူ စှိတ်။ ဘော ကာယူင့် အန် ဝီ ကာဟဝ်း ယမ်။ ပါယ် တီ ဘော ဒူအီ အီ မုး ဒါ တာင် ဒီ ဟြာယ် ဒေါ ဆီ ဘူင် အန် ဂါန် အန်။

12 ခုဝ် အန် တီ အုဝ် တဝ်း၊ ဆေ ဘေ ကာဒုး ဒုက် ဒွန် မျုဝ်၊ တဲး ဘေ ဒါခိုယ်။ ဆေ ဘေ ဟဲ့ ဟွတ့် ခမ် အီ ထေဝ် နဝ်း ဘေ တီ၊ ဇဝ်ဖြာ ဒီ တဲး ဘေ ကွယ် ရိုမ် ဒူပ် အန် ဆေဆေ။ န့ ပီ ဇဝ်ဖြာ ဒွါ မင်ဂိုမ် ဒီ ဘေ။ လွင် မင်ဂိုမ် တီ ဇဝ်ဖြာ ဟဲ့ ဒွိုမ် တဝ်း၊ အန် ဒီ ဒွါ ဒီ ဒွန် အီ အီ ရွက့် အန်။

13 ဆေ ဒူအီ အူ ဝီ မိုဝ်း နဝ်း ဆီ ဘူင် နာ တူ မွှိုမ်၊ ကွဲ့ တဲး အန် တဝ်း၊ ဇဝ်ဖြာ ဟဲ့ ကာဆုး အန်။ ခုဝ်၊ အာဝ် မိုဝ်း အာဆေ အီ ပဲ ဒီ ကာဆုး ဇဝ်ဖြာ ဘူင် နာ တူ မွှိုမ်။ ဘော ဇဝ်ဖြာ တူ ကာဆုး အီ ဘူင် နာ တူ မွှိုမ် ဒေါ မှဝ်။ 14 ဒွန် အီ ဘဲန် နဝ်း ဆီ ဘူင် နာ တူ မွှိုမ်၊ ဆေ အန် ဒူပ် နဝ်း အန်။ နဝ်း အန် ဆီ ဘူင် နာ တူ မွှိုမ် ဘဲန် မျုဝ် ဘဲန် မျုဝ်။ နဝ်း လာမာက် ဆီ ပွိုန် ဇိုဝ် တီ။ န့ တူ တဲး အန် စူ။ န့ ဝဲ တဲး နဝ်း အန် ဆီ ပွိုန် ကာပွါ။ 15 ပန် တီ အန် မိူဝ် ကာဖာ ဒီ ဘူင် နာ တူ မွှိုမ်။ န့ ပီ နဝ်း လာမာက် ဟဲ့ ဒဲ ဘာဒိက် ဆန်ထေ၊ ဒီ မိုဝ်း ဂွန်။ ဂွန် တီ ယီ မုး မှာပ်။ ဆေ ဒူအီ ဟဲ့ ဟွတ့် ဘူင် မှာပ်၊ မှာပ် တီ ဝီ ကြဲ ဒီ တာင် ခဲင် နဝ်း၊ ဝီ တဲး အာဆာက် အန် စှိုမ်။

16 ဘေ ဘီနွင် ပီ ရွက့် အုဝ်၊ ကွဲ့ တဲး အာဆေ ကာလုဝ် ဘေ။ 17 ခဲ့ ပွိုန် အေ နာ ဘွတ် နာ မွှိုမ် ဒွန် မျုဝ်၊ ဇဝ်ဖြာ ဟဲ့ ဒွါ ဒီ အေ။ ဇဝ်ဖြာ ကွယ် နာ ဘ့လာင်။ အန် တူ ဘျွင် ဒေါ မှဝ်။ အန် တူ ပီ ယာပ် ဟေ အီ ဒူပ် ဘ့လာင် ဆီငဲ။

18 ဇဝ်ဖြာ ဟဲ့ ခြာမ် ပါယ် နီ။ အန် ဟဲ့ တဲး အေ နပ် ဂြုဝ်း ပီ ကာလာင် အန်၊ အီ မုး ဂြုဝ်း မှာန် အာခါခ်ု။ အန် တဲး ဂြုဝ်း တီ လိုပ် ခဲင် နဝ်း အေ၊ တဲး အေ ဘဲန် ဂွန် ဇဝ်ဖြာ။ ပီ ဘူင် အန် ဇိုဝ် တီ ဟဲ့ မွှိုမ် လွှိုမ် ပီ ဘူင် ဘ့လေး ဇဝ်ဖြာ ဒွန် မျုဝ်။ ဇဝ်ဖြာ ဟဲ့ တဲး အေ မွှိုမ် ပီ ဘ့လေ ဒင် အီ ဆိန် ဒီ ဟေ။

19 ဘေ ဘီနွင် ပီ ရွက့် အုဝ်၊ တဲး ဘေ လှုဝ်း ဆေဆေ ပီ ဒဲမ် အုဝ် ဒေါ တီ နီ။ ဘေ လုဝ် ခြန် ဒီ ထူမ် ဂြုဝ်း အီ၊ အာဝ် လုဝ် ခြန် ဒီ ကာလာင်၊ အာဝ် လုဝ် ငှိုယ် ရူ ဒီ အီ။ 20 ခုဝ်၊ အာဆေ ငှိုယ် ရူ ဒီ အီ၊ န့ တူ တဲး အန် ပွိုန် နဝ်း လုယ် ပီ ဒွါ ဇဝ်ဖြာ။ 21 ခုဝ် အန် တီ အုဝ် စ်ု ဘေ၊ တဲး ဘေ ဝဲန် အီ မွှိုမ် ကာအိး အီ တူ မွှိုမ် ဒွန် မျုဝ် ပီ ကာဖာ ဒူအီ ကိူန်။ ကွဲ့ တဲး ဘေ ပီခိုက် နဝ်း ဘေ။ တဲး ဘေ ယီ ဒူပ် ဂြုဝ်း ဇဝ်ဖြာ အီ ဟဲ့ လိုပ် ခဲင် နဝ်း ဘေ။ ဆေ ဘေ ဘူင် ပါယ် တီ၊ ဂြုဝ်း ဇဝ်ဖြာ တီ ဒီ ဘော ချွတ် ဘေ။

22 ဘေ လုဝ် ဒူပ် လုဝ် ဘူင် ပီ စ်ု ဇဝ်ဖြာ ဘေ ဘူင်။ ဆေ ဘေ ထူမ် ပီယေန့် ဂြုဝ်း ဇဝ်ဖြာ၊ ယီ တူ ဘူင် ဒူပ်၊ န့ ပီ ဘေ ကာလုဝ် ဒီ ဒုဝ် ဘြိမ် ဘေ။ 23 အာဆေ ထူမ် ပီယေန့်၊ တူ ဒူပ် ဂြုဝ်း ဇဝ်ဖြာ၊ အန် ပီ ဒူအီ အီ ယွတ် အာရိုပ် အန် ခဲင် အဲပ် ဇမ်။ 24 အန် ဟီ ဟွတ့် ယွတ် အာရိုပ် အန်၊ အန် ဝီ ဟာဝ် ပေါ အူ ပ့လုဝ့်၊ ဝီ ပိဝ် အူ ဇေန့် အာရိုပ် အန်။ 25 အေ ယီ လုဝ် ယွတ် ဆီချာ ဒါရာ ပီ ဒွါ ဇဝ်ဖြာ။ န့ မုး ဒါရာ ဘွတ်၊ ဒါရာ အီ တဲး အီ လွတ် တ မှာပ်။ အေ ဘော လုဝ် ယွတ် လှေန့်၊ ကွဲ့ တဲး အေ ပိဝ်၊ တဲး အေ ဘူင် ပီ စ်ု ဒါရာ တီ။ အာဆေ ဘူင် ပါယ် တီ၊ ဇဝ်ဖြာ ဒီ မွင့်ကာရာ တဲး ခဲ့ ပီ ဘူင် အန် ဒွန် မျုဝ်။

26 အာဆေ ယီ တဝ်း၊ အန် ညှိုမ် ဇဝ်ဖြာ၊ အန် ယီ တူ ခမ် ဒီ ယိူန် ဂြုဝ်း အန်၊ န့ ပီ၊ အန် ကာလုဝ် ဒီ ဒုဝ် ဘြိမ် အန်။ ပီ ညှိုမ် အန် အာဝ် မိုဝ်း ဒီခုဝ်။ အာဝ် မိုဝ်း အာဂျိုဝ် မာဆေ။ 27 အာဆေ ယီ စွယ် ယာ ဆီပြး ဂေ ဂွန် ဆီပြး အီ ကာဒုး ဒုက်၊ အာဆေ တူ ဘူင် နာ တူ မွှိုမ် ပီ ပီ ဘူင် ဂေ အီ ဟဝ် အီ ကွယ် ဒဲင် ကာဒါယ် နီ၊ ဒူအီ အီ ဘူင် ဇိုဝ် တီ ဒွန် မျုဝ်၊ အန် ညှိုမ် ဆီချာ ဇဝ်ဖြာ အီ မုး ဂုန့် အေ။ ပီ ဘူင် အန် ဇိုဝ် တီ ဒီ ဘော လဝ့် နဝ်း ဇဝ်ဖြာ။