တဲး ဘေ လာယ် ရွက့် ပီ အူ ဘီနွင် လာယ် ရွက့်။ 2 ကွဲ့ တဲး ဘေ ပိဝ် ဒီ ရွုး ခဲတ့် ပီ တူ နပ် ဘေ၊ အီ တး ဒီ ကာင် ဘေ။ ခုဝ်၊ န့ ဟဲ့ ဒွိုမ် မိုဝ်း ဒူအီ အီ ဟဲ့ ရွုး အာမူ အာမာတ် ဇဝ်ဖြာ လိုပ် ခဲင် ကာင် ဂေ။ ဂေ ယီ တူ နပ် လွင် အန် တီ။ 3 တဲး ဘေ လှုဝ်း ဘော ဂေ အီ ဟဲ့ စုဝ်း ကာပိုမ်။ မာတ် တဲး န့ ပီ ဘော ဘေ ဟဲ့ စုဝ်း ကာပိုမ်။ တဲး ဘေ လှုဝ်း ဘော ဂေ ဒူအီ ပီ ခါနှာပ် အီ ဟဝ်၊ မာတ် တဲး န့ ပီ၊ ဘော ဘေ ဟဲ့ ခမ် ဒုက် တီ။

4 ဆေ ဒူအီ ဟဲ့ ခတ်၊ တဲး ဘေ ဒွန် အီ မာတ်၊ န့ မုး အီ မွှိုမ်။ တဲး ဘော အီဘိုန့် ဘော အီမာယ် လာယ် မိုဝ်း နဝ်း ဆိူဝ်။ ခုဝ်၊ ဇဝ်ဖြာ ဒီ ဒမ် မှာပ် ဒီ ဂေ အီ လာယ် လုတ့် လာယ် လာယ်။ 5 ဘော စုဝ် ဘေ၊ ကွဲ့ တဲး ဘေ မိုဝ်း နဝ်း လောဖ ဆီ ပွိုန် ရွိုန် ဂေ ခြိဝ်။ တဲး နဝ်း ဘေ စူ ခဲ့ ကြုဝ်ကြာမ် ပဲ့ ဟဲ့ မိုဝ်း ဘေ။ ခုဝ်၊ ဇဝ်ဖြာ ဟဲ့ တဝ်း၊ “အုဝ် တူ ကာဂဝ်း ဒီ ဘေ၊ အုဝ် တူ ဘ့လေး ဝဲန် ဘေ ဒေါ မှဝ်။” 6 ခုဝ် အန် တီ တဲး အေ မိုဝ်း နဝ်း ယ ဒီ ကာလာင် တဝ်း၊ “ဇဝ်ဖြာ ဟဲ့ စွယ် အုဝ်၊ အုဝ် မိူဝ် တူ လုဝ် ယုဝ် မာဆေ။ အာဝ် မိုဝ်း အာဆေ အီ ပွိုန် ဘူင် နာ စာဝ် ဒီ အုဝ်။”

7 တဲး ဘေ လှုဝ်း ဂေ ဒါ တာင် အီ ဟဲ့ ယဲတ့် ဘေ၊ အီ ဟဲ့ ကာလာင် ဂြုဝ်း ဇဝ်ဖြာ တဲး ဘေ ထူမ်။ တဲး ဘေ ကာဒွါ့ ကာဖာ လွင် အာဂျိုဝ် ပဲ့ ဟဲ့ ဘူင် ဂေ၊ တဲး ဘေ ဝီ ညှိုမ် ပီ ဂေ။ 8 ဇဝ် ယေဆူ ယီ တူ ဘျွင် ဒေါ မှဝ်။ ဘော အာမှိုဝ် ဘော အာတိုဝ်၊ ဘော နာ အာတ့် ဟာဝ် ဒွန် စုဝ် ဒွန် ဘာန်၊ အန် ပီ ဘြိမ်။

9 ကွဲ့ တဲး ဘေ ဝီ ထူမ် ဂြုဝ်း ပီ မာနုဝ် အီ ဟဝ် ဘဲန် မျုဝ် ဘဲန် မျုဝ် အီ တူ ပီ ပီ မာနုဝ် ယေ။ ခုဝ်၊ အေ ဒီ မိုဝ်း ပ့လူမ် မိုဝ်း ဟဲန့် ခဲင် နဝ်း ကူပ် ပီ ဂေဇူ ဇဝ်ဖြာ။ အာဝ် မုး ပီ ဒီ ဟူမ် အီ တဲး နဝ်း အေ မိုဝ်း ပ့လူမ်။ ဆေ ဒူအီ ဂျုဝ်ဂျာ ဒီ ဟူမ် မီ ပီ ဒီ ဟူမ် ပီ ဒမ် ဒါရာ၊ န့ တူ မိုဝ်း အာဂျိုဝ် မာဆေ။ 10 န့ ပီ အေ ဟဲ့ မိုဝ်း ကာစှူင့် လှူ ပေါ အူ ဘူင့်။ ဂေ ဒါ အီ လှူ ဒီ ဇဝ်ဖြာ အီ ဘူင် ဂါန် ခဲင် ထိုပ် ဘိက် ဘွတ် တွိုန်၊ ဂေ ယီ တူ ပွိုန် ဒိုဝ်း ဟူမ် ပီ လှူ အီ ကွယ် ဒဲင် ကာစှူင့် လှူ အေ တီ။

11 ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ၊ အန် ဟဲ့ ဒိုဝ်း နှာမ် ဒုဝ် ပီ လှူ ဂေ တွိုန်၊ ဘ့လေး အုန် ခဲင် ဒူင် အီ ဆီငါ ဘွတ် လွှိုမ် တူတ့်၊ တဲး န့ ဘဲန် ပီ ဒီ လှူ အီ ဂဝ်း ဝဲန် မှာပ်။ ဟဲ့ ဟွတ့်၊ ဂေ ပီ ဝီ ဒိုဝ်း ဒုဝ် ဆတ် ပီ လှူ ဂေ တီ၊ ဝီ ဟာဝ် ဒုဝ့် နာ ရေတ့် ဒူင် ချ ဂေ။ 12 ဇဝ် ယေဆူ မိူဝ် ဟဲ့ ခမ် ဒီ ယမ် နာ ရေတ့် မိူင်၊ တဲး အန် ပွိုန် ဒီ ဂဝ်း ဝဲန် မှာပ် ဒူအီ ဘောကာဂ့လျီတ်၊ တဲး ဂေ ဝီ ဘဲန် ဒူအီ အီ ဆီငါ ဘွတ်။ 13 ကူပ် န့ ပါယ် တီ၊ တဲး ဘော အေ ဟာဝ် ဒူင် ကွယ် ဇဝ် ယေဆူ နာ ရေတ့် ဒူင် ချ ဒူအီ။ တဲး အေ ခမ် အီ မွှိုမ် ဆာယ် ပီ ဇဝ် ယေဆူ ဟဲ့ ခမ်။ 14 ခုဝ်၊ ဒေါ ကွယ် အေ ဒဲင် ကာဒါယ် နီ၊ န့ တူ မိုဝ်း မိူင် အီ ဒီ တဲး အေ ပွိုန် ကွယ် ဆေဆေ။ အေ ယီ ဆီ လိုပ် ခဲင် မိူင် အီ ဒီ ဝီ တး ဝါယ် နီ။

15 ဆေ န့ ပါယ် တီ၊ တဲး အေ ဘိုင် ဇဝ် ယေဆူ ဘော အိူပ် ဇဝ်ဖြာ ဆေဆေ၊ တဲး န့ ပီ အေ လှူ ပီ ဒီ လှူ ဒုဝ် ဆတ်။ ပီ ဒီ လှူ အေ တီ၊ န့ ဘော မုး ဂြုဝ်း အေ အီ တဝ်း၊ အန် ဇဝ် မုး ဇဝ်ဖြာ အီ အိုပ် အေ။ 16 ကွဲ့ တဲး အေ ပိဝ် ဒီ လာယ် စွယ် လာယ် ဂေဇူ။ ဆေ အေ ဘူင် ပါယ် တီ၊ န့ ဘော ပီ၊ အေ ဟဲ့ လှူ ပီ ဒီ လှူ အီ ဟဲ့ လဝ့် နဝ်း ဇဝ်ဖြာ။

17 တဲး ဘေ ထူမ် ဂြုဝ်း ဂေ ဒါ တာင် အီ ဟဲ့ ယဲတ့် ဘေ။ ဒူအီ ဂေ တီ၊ ဂေ မိူဝ် တူ ကွယ် ပီယေန့်၊ တူ ဒီလှဝ်။ ဂေ ဘော ဘူင် ဆေဆေ၊ တဲး န့ ဘဲန် အာဂျိုဝ် ဒီ ဘေ။ ဂေ ဘူင် ပါယ် တီ ခုဝ်၊ ဂေ ဟဲ့ နပ်၊ ဂေ လုဝ် ဝီ ကာလာင် တူတ့် ဒီ ဇဝ်ဖြာ၊ တဲး အန် ဆုင်ဖျာတ် ယုဝ် န့ မွှိုမ် တူ မွှိုမ်။ ဆေ ဘေ ထူမ် ဂြုဝ်း ဂေ၊ န့ တဲး ဂေ ဝီ ခူယ် ဒါခိုယ် ဒီ ဘူင် ဂါန် ဂေ။ ဆေ ဘေ တူ ဘူင် ပါယ် တီ၊ န့ ဒီ ဘော ဘဲန် နဝ်း က့လိုဝ် နဝ်း တျီ့ ဒီ ဂေ။ ဘော ဒီ ဘေ အာဝ် ဘဲန် အာဂျိုဝ် မာဆေ။

18 တဲး ဘေ ဆာခိုဝ် ဘော ဒါင် ယေ။ ယေ ဟဲ့ နပ် ဆီချာ၊ ယေ မိုဝ်း နဝ်း လုယ်။ ယေ မိူဝ် မိုဝ်း နဝ်း ဆီ ဘူင် မီ နာ ဘွတ် ဆေဆေ။ 19 ခုဝ်၊ အုဝ် ကာဆုး ဘေ၊ တဲး ဘေ ဆာခိုဝ် ဒါင် အုဝ်၊ တဲး အုဝ် ဘော ပွိုန် ဒီ စေဝ် ဟာဝ် ဒူင် ကွယ် ဘေ။ 20-21 ယေ ယီ မှာန့်၊ တဲး ဇဝ်ဖြာ အီ တဲး အေ မိုဝ်း နဝ်း ဂျီတ်၊ ဒွါ ဒီ ဘေ ဒွန် မျုဝ် ခဲ့ ပီ လုဝ် ဘေ၊ တဲး ဘေ ပွိုန် ဒီ ဘူင် ဒူပ် ပီ အိုင် အန် ဇဝ်။ ဇဝ်ဖြာ ဟဲ့ တဲး ဇဝ် ယေဆူ ဝီ ယိတ့် ဝီ အိမ် ဝါယ် ဟဲ့ ဟွတ့် ယမ် အန်၊ တဲး န့ ဒူပ် ပီ ကာဆဲန့် ဇဝ်ဖြာ။ ပီ ကာဆဲန့် အန် တီ ယီ ဟဲ့ မှာန် ဆေဆေ။ ပါယ် တီ၊ ဇဝ် ယေဆူ ဟဲ့ ဘဲန် ပီ ဒါ အီ ဟျီင် မာဘူ အီ တာင် အီ ဘွတ်။ ယေ ဘော မှာန့်၊ တဲး ဇဝ်ဖြာ ဘူင် ခဲ့ ပီ အိုင် အန် ခဲင် နဝ်း အေ၊ တဲး န့ လဝ့် နဝ်း အန်။ တဲး အန် ဇဝ် ဘူင် ဇိုဝ် တီ၊ ကူပ် ညှိုမ် ဘိုင် အေ ဇဝ် ယေဆူ။ န့ ဟဲ့ ကာအာပ် အေ အိူပ် အာဖုင် ဒင်ခုဝ် ဇဝ် ယေဆူ ဆေဆေ ဒွန် စုဝ် ဒွန် ဘာန်။ ဆာတူ။

22 အိုယ် ဘေ ဘီနွင်၊ ပဲ့ ပီ ဒဲမ် တိုယ် အုဝ် ဒီ ဘေ နီ၊ န့ တူ တူင့် ခဲ့ မှဝ်။ ခုဝ်၊ အုဝ် မှာန့်၊ တဲး ဘေ ဘော ထူမ် ဆီချာ ဂြုဝ်း ပီ မာနုဝ် အုဝ် ဒီ ဘေ နီ။ 23 အုဝ် ဆီ တဲး ဘေ နပ် ဘော လွင် အာထီမုဝ်ထေ အီ ဟဲ့ ပီ ဝါ အေ။ အန် ဟဲ့ ဟွတ့် လေး ခဲင် ကာပိုမ်။ ဆေ အန် ဘော စေဝ် တး၊ အုဝ် ဒီ ဟာဝ် ရိုမ် ဒူပ် အန်၊ တဲး ယာယ် ဇမ် ဒူင် ကွယ် ဘေ။

24 တဲး ဘေ ကာလာင် ပီ နမ်လှုဝ်း ယေ ဒီ ဘေ၊ တဲး ဘော ဒါ တာင် အီ ယဲတ့် ဘေ၊ ဘော ဂေ အီ ဟဲ့ ညှိုမ် ဇဝ် ယေဆူ ဒွန် အီ ပွိုန် ဒီ ထူမ်။ ဂေ ဘီနွင် အီ ကွယ် ခဲင် မိူင် အီတာလီ မိူဝ်၊ ဟဲ့ နမ်လှုဝ်း ဘေ။

25 တဲး ဇဝ်ဖြာ ဂေဇူ ဘေ ဒွန် အီ။ ဆာတူ။